Wiyaegü 26 - Tupanaarü Ore

Yimá norü maxü̃maxã mea icüácüarü yumüxẽ

¹ Pa Cori Pa Tupanax ¡choxü̃ nadau nax taxuxü̃ma i pecadu chaxüxü̃! Rü chorü maxü̃wa rü nataxuma i chixexü̃. Rü aixcüma cuxü̃́ chayaxõ, Pa Cori Pa Tupanax.

² ¡Rü ẽcü choxü̃ nangugü! ¡Rü choxü̃ naxü! ¡Rü nüxü̃ naxü i chorü ĩnü rü chorü ngúchaü̃ i chaxica nüxü̃ chacuáxü̃!

³ Choma nüxü̃ chacua̱x nax choxü̃ cungechaü̃xü̃, rü guxü̃guma mea cuga chaxĩnüxü̃.

⁴ Rü taguma namaxã chaxãmücü i ngẽma idorata̱a̱xgüxü̃ rü bai i ñuxgu wüxiwa namaxã changexma i ngẽma nügü írümegünetaxü̃.

⁵ Rü choxü̃́ nawa̱xtümüxü̃ i norü ngutaque̱xe i ngẽma chixexü̃ ügüxü̃. Rü taguma namaxã chaxãmücü i ngẽma duü̃xü̃gü i chixecümaxü̃.

^6-7 Rü cupe̱xewa chaugü chayauxme̱x, rü chowa rü nataxuxü̃ma i ta̱xacürü pecadu. Rü ngẽmaãcü, Pa Cori Pa Tupanax, curü ãmarearü guruü̃wa changu nax cuxca̱x chawiyaexü̃ca̱x rü cuxü̃ chicua̱xüü̃xü̃ca̱x rü nüxü̃ chixuxü̃ca̱x i ngẽma mexü̃gü i cuxüxü̃.

⁸ Pa Corix, choma nüxü̃ changechaü̃ ya yima cupata, rü nüxü̃ changechaü̃ i ngẽma nachica i nawa nangẽxmaxü̃ ya curü üüne.

⁹ Rü tama chanaxwa̱xe i choxü̃ quima̱x wüxigu namaxã i ngẽma pecaduã̱xgüxü̃. Rü tama chanaxwa̱xe i ngẽma máetagüxü̃rüxü̃ chomaxã quixĩ.

¹⁰ Erü nümagü rü taxü̃ i chixexü̃ naxügü rü diẽruca̱x chixri duü̃xü̃gümaxã inacua̱xgü.

¹¹ Natürü i choma rü taxuwama nachixe i chorü maxü̃. ¡Rü ngẽmaca̱x chanaxwa̱xe i choxü̃ curüngü̃xẽxẽ rü cuxü̃́ changechaü̃tümüxü̃!

¹² Pa Cori Pa Tupanax, choma rü aixcüma cuxü̃́ chayaxõ. Rü guxü̃ i duü̃xü̃güpe̱xewa tá cuxü̃ chicua̱xüxü̃.