Wiyaegü 25 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃

¹ Pa Cori Pa Tupanax, cuxna nixĩ i chacaxü̃ i chorü yumüxẽwa.

² Pa Chorü Tupanax, cuxü̃́ chayaxõ. ¡Rü taxṹ i cunaxüchicaxü̃ i chorü uanügü nax ãne choxü̃ yangexẽxẽgüxü̃ca̱x rü choxü̃ nacugüexü̃ca̱x!

³ Rü yíxema cuxü̃́ yaxṍxe rü tagutáma ãne tinge. Natürü ngẽma tama cuga ĩnüexü̃ rü natüca̱xma cumaxã nuexü̃, rü ãne tá ningegü.

⁴ Pa Corix ¡choxü̃ nawe̱x i cucümagü rü ngẽma cucümagügu choxü̃ ixũxẽxẽ!

⁵ ¡Rü chomaxã inacua̱x rü choxü̃ nangu̱xẽxẽ i ngẽma curü ore i aixcüma ixĩxü̃! Erü cuma nixĩ i chorü Tupana rü chorü maxẽẽruxü̃ quixĩxü̃. Rü guxü̃ma i oragu rü cuxü̃́ chayaxõ.

⁶ Pa Cori Pa Tupanax ¡nüxna nacua̱xãchi nax guxü̃guma toxü̃ cungechaü̃xü̃ rü cuxü̃́ tangechaü̃tümüxü̃güxü̃!

⁷ ¡Natürü taxṹ i nüxna cucua̱xãchixü̃ i ngẽma chorü pecadugü rü yema chixexü̃gü ga chaxüxü̃ ga yexguma changextü̱xügu! Pa Cori Pa Tupanax ¡choxna nacua̱xãchi, erü curü ngechaü̃ rü curü mecüma rü nataxüchi!

⁸ Nüma ya Cori ya Tupana rü namecüma rü nixaixcüma. Rü nüma rü tüxü̃ narüwe̱xãchixẽxẽ ya yíxema chixexü̃ ügüxe.

⁹ Rü nügücümagu tüxü̃ naxĩxẽxẽ ya yíxema tama tügü icua̱xüü̃güxe, rü mexü̃wa tüxü̃ nagagü.

¹⁰ Rü nüma ya Tupana rü tüxü̃ nangechaü̃ rü tümamaxã nixaixcüma ya yíxema yanguxẽẽgüxe i ngẽma uneta i namaxã taxügüxü̃ rü naga ĩnüexe i norü mugü.

¹¹ Pa Cori Pa Tupanax, nata i chorü chixexü̃ i cupe̱xewa chaxüxü̃ ¡Rü choxü̃́ nüxü̃ irüngüma i ngẽma nax taxúema chixri cuchiga idexaxü̃ca̱x!

¹² Rü yíxema Cori ya Tupanaxü̃ ngechaü̃xe, rü nüma rü tá tüxü̃ nanawe̱x i nacüma i mexü̃ nax nagu tixũxü̃.

¹³ Rü tüma rü tá tataãxẽ rü tümaxacügü tá nixĩ i norü yora i ñaa nachixü̃ane.

¹⁴ Rü nüma ya Cori ya Tupana rü tümamücü nixĩ ya yíxema nüxü̃ ngechaü̃güxe. Rü tümaca̱x nanango̱xẽxẽ i norü uneta.

¹⁵ Rü guxü̃guma Cori ya Tupanaarü ngü̃xẽẽca̱x chadau, erü nüma nixĩ i choxü̃ ínapoxü̃xü̃ nawa i guxü̃ma i ãũcümaxü̃.

¹⁶ Pa Corix ¡choxü̃ rüngü̃xẽxẽ erü chanaxĩ̱xãchiãxẽ, rü cuxü̃́ changechaü̃tümüxü̃ erü chaxicatama charüxã̱ũ̱x!

¹⁷ Choma rü yexera chanaxĩ̱xãchiãẽchigü. ¡Rü nawa choxü̃ ínanguxuchixẽxẽ i ñaa ngúxü̃ i chingexü̃!

¹⁸ ¡Choxü̃́ nüxü̃ nadau i ñaa ngúxü̃ i chingexü̃ rü chorü guxchaxü̃gü! ¡Rü choxü̃́ nüxü̃ yarüngüma i chorü pecadugü!

¹⁹ ¡Rü dücax i ñuxre i chorü uanügü i chauxchi aiexü̃ rü choxü̃ ima̱xgüchaü̃xü̃!

²⁰ ¡Rü choxna nadau rü choxü̃ ínapoxü̃ nax tama choxü̃ yama̱xgüxü̃ca̱x! ¡Rü taxṹ i cunaxüchicaxü̃ i chorü uanügü nax ãne choxü̃ yangexẽxẽgüxü̃ca̱x! Erü cuma nixĩ i chorü poxü̃ruxü̃ quixĩxü̃, rü cuxü̃tagu nixĩ i nüxü̃ ichayangauxü̃ i ngü̃xẽxẽ.

²¹ Rü ngẽma chaugü namaxã íchapoxü̃xü̃ nixĩ nax aixcümaxü̃ chixuxü̃ rü taxuxü̃ma i chixexü̃ chaxüxü̃. Rü ngẽmaãcü chamaxü̃ erü cuxü̃́ chayaxõ.

²² Pa Chorü Tupanax ¡ínapoxü̃ i Iraéanecüã̱xgü nawa i norü guxchaxü̃gü rü norü ĩ̱xãchiãẽxü̃gü!