Wiyaegü 22 - Tupanaarü Ore

¡Ngúxü̃ yangexü̃gagu aita naxü, natürü Tupanaxü̃ nicua̱xüxü̃!

¹ Pa Chorü Tupanax, Pa Chorü Tupanax ¿tü̱xcüü̃ choxna quixũgachi? ¿Rü tü̱xcüü̃ choxna cuyáxü̃gu rü tama choxü̃ curüngü̃xẽxẽ rü tama nüxü̃ cuxĩnü i chorü axu?

² Pa Chorü Tupanax, ngunecü cuxna chaca rü chütacü cuxna chaca rü tama choxü̃ cungãxü̃ rü düxwa chipamare.

³ Natürü i cumax rü cuxüüne, rü torü ãẽ̱xgacü quixĩ. Rü cuxü̃ nixĩ i ticua̱xüü̃güxü̃ i toma i Iraéanecüã̱xgü.

⁴ Rü torü o̱xigü rü cuxü̃́ nixĩ i yaxõgüãxü̃, rü cuma rü ícunanguxü̃xẽxẽ naxme̱xwa i norü uanügü.

⁵ Rü curü ngü̃xẽẽca̱x cuxna nacagüe rü cuma rü nüxü̃ curüngü̃xẽxẽ. Rü cuxü̃́ nayaxõgü rü norü uanügüme̱xẽwa ícunanguxü̃xẽxẽ rü tama cunawomüxẽxẽ.

⁶ ¿Rü ñu̱xma rü ta̱xacüca̱x tama cunangãxü̃ i chorü yumüxẽ? ¿Ẽ̱xna wüxi i õxmi chixĩ rü tama wüxi i duü̃xü̃ chixĩ? Rü duü̃xü̃gü rü choxü̃ naxoe.

⁷ Rü ngẽxguma choxü̃ nadaugügu i duü̃xü̃gü rü choxü̃ nacugüe rü choxna nabia̱xgü rü nanexáerugü rü chixri chauchiga nidexagü.

⁸ Rü ñanagürügü: —Ñaa nixĩ i ngẽma yatü i Cori ya Tupanaaxü̃́ yaxõxü̃. ¡Rü ẽcü ínanguxuchixẽẽã rü namaxẽẽã ega aixcüma nüxü̃ nangechaü̃gu! —ñanagürügü.

⁹ Natürü cumax, Pa Corix, nixĩ i chauéanüwa choxü̃ cubuxẽẽxü̃ rü chauéarü mixĩwa choxna cudau rü choxü̃ cupexẽẽxü̃.

¹⁰ Rü yexguma tauta chabuxgucürüwa choxna cudau. Rü yexguma noxri chabuxgumama rü chorü Tupana quixĩ.

¹¹ ¡Rü ñu̱xma nax ãũcümaxü̃wa changexmaxü̃ rü taxṹ i choxna quixũgachixü̃! Erü tataxuma nax texé choxü̃ rüngü̃xẽẽxü̃.

¹² Rü chorü uanügü rü ñoma wocagü i iyatüxü̃ i Bacháü̃cüã̱x i düraexü̃rüxü̃ choxü̃ ínachomaeguãchi nax choxü̃ yama̱xgüxü̃ca̱x.

¹³ Rü ñoma leóü̃ i norü taiyamaxã ichogüxü̃ rü aita üexü̃rüxü̃ choxna nayu̱xgu.

¹⁴ Rü ngẽma chorü pora rü ñoma dexá i baxü̃rüxü̃ nixĩ. Rü chauxchina̱xãgü rü marü nayatüxüchigü. Rü yima chorü maxü̃ne rü ñoma werarüxü̃ inadexe i chauxü̃nütagügu.

¹⁵ Rü chaua̱x rü nipamare ñoma waixü̃mü i paxü̃rüxü̃. Rü yimá chorü conü rü chauxmanaxãwa nayaxũ̱x. Rü waixü̃müte̱xegu choxü̃ cuta̱x ñoma chayuxü̃rüxü̃.

¹⁶ Rü ñoma airugü i düraexü̃rüxü̃ choxü̃ ínachomaeguãchi i chorü uanügü. Rü cha̱u̱xme̱xwa rü chaucutüwa choxü̃ ínipotagü.

¹⁷ Rü nango̱x ya guxü̃nema ya chauxchina̱xãremügü, rü ngẽmaca̱x chayaxugü. Rü ngẽma chorü uanügü rü choxü̃ narüdaunüecha.

¹⁸ Rü nügüna nanaxãgü ga chauxchiru rü sortéuãcü nügüna nanaxãgü ga chauxchiru ga mámüxü̃.

¹⁹ Natürü cumax, Pa Corix, nax chorü poraxẽẽruxü̃ quixĩxü̃ ¡rü taxṹ i choxna quixũgachixü̃! ¡Rü paxa nua naxũ rü choxü̃ rüngü̃xẽxẽ!

²⁰ ¡Rü choxü̃ ínapoxü̃ nax tama taramaxã choxü̃ yama̱xgüxü̃ca̱x i ñaa chorü uanügü i ñoma airugürüxü̃ ixĩgüxü̃!

²¹ ¡Rü choxü̃ ínapoxü̃ nüxna i ñaa duü̃xü̃gü i ñoma leóü̃gürüxü̃ ixĩgüxü̃ rü ñoma wocagü i iyatüxü̃ i düraexü̃rüxü̃ ixĩgüxü̃!

²² Rü chauenexẽgümaxã tá cuchigaxü̃ chixu, rü curü duü̃xü̃güarü ngutaque̱xegüwa tá cuxü̃ chicua̱xüxü̃.

²³ Rü choma rü ñacharügü: —Guxãma ya yíxema Tupanaxü̃ ngechaü̃güxe ¡rü nüxü̃ picua̱xüü̃gü! Rü guxãma i pema i Acóbutaagü ixĩgüxe ¡rü penataxẽxẽ! ¡Rü guxãma i pema i Iraétaagü ixĩgüxe ¡rü nüxü̃ pengechaxü̃! —ñachagürü.

²⁴ Erü nüma ya Cori ya Tupana rü taguma tüxü̃ inarüngüma ya yíxema ngearü diẽruã̱xgüxe ya ngúxü̃ ingegüxe rü taguma tümacha̱xwa inicu̱x. Rü nüma ya Tupana rü tüxü̃ naxĩnü ega nüxna ica̱xgu, rü tüxü̃ narüngü̃xẽxẽ.

²⁵ Rü ngẽmaca̱x, Pa Cori Pa Tupanax, rü tá cuxü̃ chicua̱xüxü̃ nape̱xewa i ngẽma muxü̃ i curü duü̃xü̃gü. Rü tá nüxü̃ chixu nax quixaixcümaxü̃. Rü nape̱xewa i ngẽma duü̃xü̃gü i cuxü̃ taxẽẽgüxü̃ rü tá chayanguxẽxẽ i ngẽma cumaxã ichaxunetaxü̃.

²⁶ Rü pema i ngearü diẽruã̱xgüxex ¡nua pexĩ rü meama pechibüe rü ñu̱xmata mea pexü̃́ yangu! Rü pema i Tupanaca̱x daugüxe ¡rü nüxü̃ picua̱xüü̃gü rü guxü̃gutáma petaãẽgü!

²⁷ Rü Pa Guxãma i Pema i Ñoma i Naanewa Maxẽxex ¡rü nüxna pecua̱xãchie ya Cori ya Tupana rü naxca̱x pexĩ! ¡Rü nape̱xegu pecaxã́pü̱xügü rü nüxü̃ picua̱xüü̃gü!

²⁸ Erü nüma ya Cori ya Tupana rü guxãarü ãẽ̱xgacü nixĩ rü guxü̃ i nachixü̃anegümaxã inacua̱x.

²⁹ Rü guxãma i pema ya diẽruã̱xgüxe rü Cori ya Tupanape̱xegu tá pecaxã́pü̱xügü nax nüxü̃ picua̱xüü̃güxü̃ca̱x. Rü guxãma i pema i ñoma i naanewa maxẽxe rü wena tá waixü̃müxü̃ pixĩgü, erü pewa rü nataxuma i maxü̃.

³⁰ Rü ngẽma tataagü i tawena buexü̃ rü tá Cori ya Tupanaaxü̃́ napuracüe rü tá nüxü̃ nicua̱xüü̃gü. Rü tá nüxü̃ naxĩnüe i nachiga.

³¹ Rü ngẽmaãcü i ngẽma duü̃xü̃gü i tawena buexü̃ rü tá nüxü̃ naxĩnüechiga ga yema taxü̃ ga mexü̃gü ga Cori ya Tupana üxü̃.