Wiyaegü 21 - Tupanaarü Ore

Wiyae i poramaechiga

¹ Pa Cori Pa Tupanax, curü poragagu, rü nataãẽxü̃chi ya yimá ãẽ̱xgacü. Rü aixcüma nataãxẽ erü cuma rü norü uanügüxü̃ cunaporamaexẽxẽ.

² Rü cuma rü marü nüxna cunaxã i ngẽma norü ngúchaü̃ ixĩxü̃, rü tama nüxna cunachu̱xu i ngẽma naxca̱x cuxna naca̱xaxü̃.

³ Rü cuma rü mea cunayaxu rü poraãcü nüxü̃ curüngü̃xẽxẽ. Rü úirunaxca̱x i nga̱xcueruxü̃ naeruwa quinga̱xcuchi.

⁴ Rü cuxna naca nax cunamáarü maxü̃ã̱xẽẽxü̃ca̱x, rü cuma rü cunama̱xẽxẽ i norü maxü̃.

⁵ Rü cuma rü norü uanügüxü̃ cunaporamaexẽxẽ, rü ngẽmaca̱x natachiga ya yimá ãẽ̱xgacü. Rü cuma rü nüxü̃ curüngü̃xẽxẽ rü ngẽmaca̱x namaxã nataãẽgü i duü̃xü̃gü.

⁶ Rü cuma rü guxü̃guma nüxü̃ curüngü̃xẽxẽ. Rü naxü̃tawa cungexmaecha rü ngẽmaca̱x poraãcü nataãẽxü̃chi.

⁷ Rü nüma ya ãẽ̱xgacüx, rü Cori ya Tupanaaxü̃́ nayaxõ. Rü yimá Guxãmaxã Icuácü rü poraãcü yima ãẽ̱xgacüxü̃ nangechaü̃, rü ngẽmaca̱x tagutáma chixexü̃gu nangu.

⁸ Pa Chorü Tupanax, cuchacüxümaxã tá nüxü̃ curüporamae i guxü̃ma i curü uanügü. Rü yima curü tügünechacüxümaxã tá nüxü̃ curüporamae i ngẽma cuxchi aiexü̃.

⁹ Pa Tupanax, ngẽxguma núma cuxũxgu rü ñoma wüxi i guruü̃wa yaguxü̃rüxü̃ tá ícunagu i curü uanügü. Rü curü numaxã tá üxüwa cuyawocu nax ngẽxma yanaxogüxü̃ca̱x i ngẽma curü uanügü.

¹⁰ Rü ngẽxgumarüxü̃ ta ñoma i naanewa tá icuyanaxoxẽxẽ i naxacügü rü nataagü i ngẽma curü uanügü.

¹¹ Erü ngẽma curü uanügü rü nagu narüxĩnüe nax chixexü̃gu cuxü̃ nagu̱xẽẽgüxü̃ca̱x, natürü taxũtáma mea nüxü̃́ ínanguxuchi i ngẽma nagu naxĩnüexü̃.

¹² Erü cuma rü tá cuyabuxmüxẽxẽ, rü yima curü würa rü naguama cunatoenü.

¹³ ¡Rü ẽcü inawe̱x i curü pora, Pa Cori Pa Tupanax! Rü toma rü wiyaegümaxã tá cuxü̃ ticua̱xüxü̃gü rü tá tanaxüchiga i curü pora.