Wiyaegü 20 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃ nax ngẽma uanüxü̃ narüporamaegüxü̃ca̱x

¹ ¡Cori ya Tupana cuxü̃ ĩnü, Pa Ãẽ̱xgacüx, ngẽxguma guxchaxü̃wa cungexmagu! ¡Rü yimá Acóbuarü Tupana cuxü̃ ípoxü̃ nüxna i curü uanü!

² ¡Rü Chióü̃wa ngẽxmane ya napatawa cuxca̱x ne nanamu i ngü̃xẽxẽ nax curü uanügüpe̱xewa cuporaxü̃ca̱x!

³ ¡Rü nüma ya Cori ya Tupana cuxü̃́ nanayaxu i guxü̃ma i curü ãmaregü i nüxna cuxãxü̃, rü cuxü̃́ nanayaxu i ngẽma ãmaregü i naxca̱x ícuguxü̃!

⁴ ¡Rü Cori ya Tupana cuxna nanaxã i ngẽma cuma cunaxwa̱xexü̃, rü nüma cuxü̃ nangüxẽxẽ nax yanguxü̃ca̱x i guxü̃ma i ngẽma nagu curüxĩnüxü̃!

⁵ Rü toma rü tá tanaxüchiga, Pa Ãẽ̱xgacüx, i ngẽxguma curü uanügüxü̃ curüporamaegu. Rü Tupanaégagu tá tórü woneragümaxã taxunagügü. ¡Rü Tupana yanguxẽxẽ i guxü̃ma i ngẽma nüxna naxca̱x cuca̱a̱xü̃!

⁶ Rü yimá ãẽ̱xgacü ya Tupana nüxü̃ unetacü, rü choma nüxü̃ chacua̱x nax norü uanügüxü̃ Tupana tá naporamaexẽẽxü̃. Rü nüma ya Tupana rü tá nüxü̃ naxĩnü i norü yumüxẽ, rü dauxü̃guxü̃ i naanewa tá nüxü̃ nangãxü̃. Rü norü poramaxã tá ngẽma uanügüxü̃ nanaporamaexẽxẽ ya yimá ãẽ̱xgacü.

⁷ Rü nümaxü̃ i uanügü rü norü carugümaxã nügü ínarüporae. Rü togü rü norü cowarugümaxã nügü ínarüporae. Natürü i yixema rü yimá tórü Cori ya Tupanamaxã yigü ítarüporae.

⁸ Rü ngẽma tama Cori ya Tupanaxaxü̃́ yaxõgüxü̃ rü tá nayuemare, natürü yíxema i yaxõgüxe rü tá nüxü̃ tarüporamae i ngẽma uanügü.

⁹ Pa Cori Pa Tupanax ¡naporamaexẽxẽ ya yimá ãẽ̱xgacü rü toxü̃́ nüxü̃ naxĩnü i torü yumüxẽ!