Wiyaegü 17 - Tupanaarü Ore

Yumüxẽwa Tupanaarü ngü̃xẽxẽca̱x ínaca

¹ Pa Corix ¡choxü̃́ nüxü̃ naxĩnü i ngẽma cuxna naxca̱x chacaxü̃, erü wüxi i mexü̃ nixĩ! ¡Rü choxü̃́ nüxü̃ naxĩnü i ngẽxguma tagaãcü curü ngü̃xẽxẽca̱x cuxna chacaxgu! ¡Rü choxü̃́ nüxü̃ naxĩnü i chorü yumüxẽ! Erü choma rü tama wüxi i dorata̱xáxü̃ chixĩ.

² Rü chanaxwa̱xe i choxü̃ ícupoxü̃, erü cuma nüxü̃ cucua̱x nax aixcüma wüxi i mexü̃ yixĩxü̃ i ngẽma cuxna naxca̱x chaca̱xü̃.

³ Rü cuma rü marü mea nüxü̃ cucua̱x i ngẽma chauãẽwa nagu charüxĩnüxü̃. Rü chütacü rü choxü̃ cuxü rü taxuxü̃ma i chixexü̃ chowa icuyangau. Rü nüxü̃ cucua̱x nax aixcüma yixĩxü̃ i ngẽma nüxü̃ chixuxü̃.

⁴ Rü mea nagu chamaxü̃ i ngẽma nüxü̃ quixuxü̃. Rü chayanguxẽxẽ i curü ore. Rü tama nüxü̃ chayadauxü̃ i ngẽma máetagüxü̃.

⁵ Rü aixcüma mea nagu chixũ i ngẽma cuma cunaxwa̱xexü̃ rü taguma nüxna chixũgachi.

⁶ Pa Tupanax, cumaxã nixĩ i chidexaxü̃ erü nüxü̃ chacua̱x rü cuma rü choxü̃́ nüxü̃ cuxĩnü i chorü yumüxẽ rü choxü̃ cungãxü̃. ¡Rü choxü̃́ nüxü̃ naxĩnü i chorü ore!

⁷ Rü chanaxwa̱xe i choxü̃ cunawe̱x nax aixcüma choxü̃ cungechaü̃xü̃. Erü cuma rü tüxü̃ curüngü̃xẽxẽ ya yíxema cuxü̃tawa tümaarü ngü̃xẽẽca̱x ícagüxe naxcha̱xwa i tümaarü uanügü.

⁸ ¡Rü choxna nadau ñoma cugüpü̱xüxetüna cudauxü̃rüxü̃! ¡Rü choxü̃ ídüxü namaxã ya cuxpe̱xatügü!

⁹ Erü ngẽma chixexü̃ i duü̃xü̃gü rü cha̱u̱xca̱x ínayaxüãchi rü chorü uanügü choxü̃ ínachomaeguãchi nax choxü̃ yama̱xgüxü̃ca̱x.

¹⁰ Rü taxúema nüxü̃́ tangechaü̃tümüü̃gü. Rü nügü yacua̱xüü̃güãcüma nidexagü.

¹¹ Rü ngẽma chixexü̃ i duü̃xü̃gü choxü̃ nangugügü nax ngextá chaxũxü̃ nax ngẽmaãcü waixü̃mügu choxü̃ iyanguxẽẽgüxü̃ca̱x.

¹² Rü nümagü rü ñoma leóü̃gürüxü̃ choxü̃ nicu̱xeü̃gü rü choxna nayu̱xgu nax choxü̃ yama̱xgüxü̃ca̱x.

¹³ Pa Corix ¡ẽcü inachi rü nüxna nayuxu rü nadai i ngẽma chorü uanügü! ¡Curü taramaxã choxü̃ ínapoxü̃ nüxna i ngẽma duü̃xü̃gü i chixexü̃ ügüxü̃, rü yabuxmüxẽxẽ!

¹⁴ Pa Corix ¡curü poramaxã choxü̃ ínanguxuchixẽxẽ naxme̱xwa i ngẽma duü̃xü̃gü i chixexü̃! ¡Rü ñoma i naanewa ínawoxü̃! Rü ngẽma nixĩ i nüxna üxü̃ i ñoma i naanewa nax namaxẽxü̃. Rü nüetama nixĩ nax namuarü ngẽmaxü̃ã̱xgüxü̃. Rü nüetama nixĩ nax naxacügü rü meama nachibüexü̃. Rü nüetama nixĩ nax nataagüca̱x íyaxüxü̃ i õna.

¹⁵ Natürü i chomax rü ngẽma namaxã chataãẽxü̃ nixĩ nax cuxü̃ tá chadauxü̃ rü cuxü̃tawa tá changexmaxü̃ i ngẽxguma tá ícharüdaxgux.