Wiyaegü 15 - Tupanaarü Ore

Tupana nanaxwa̱xe nax mexü̃ naxüxü̃ ya yatü

¹ Pa Corix ¿texé tá tixĩ ya yíxema cupata ya üünenewa ngẽxmaxe? ¿Rü texé tá tixĩ ya yimá curü ma̱xpǘne ya üünenegu ãchiü̃xẽ?

² Rü yíxema tüxü̃́ nataxúxe i chixexü̃, rü mexü̃ üxe, rü aixcüma mexü̃ i orexü̃ ixuxe,

³ rü tama texéchiga chixri idexaxe, rü taxuxü̃ma chixexü̃ tümamücümaxã ǘxe, rü tama chixexü̃ i oremaxã tümamücüxü̃ nga̱xe,

⁴ rü tama nanaãẽraxü̃xe i ngẽma chixexü̃ üxü̃, rü nüxü̃ ngechaü̃xe i ngẽma duü̃xü̃ i Tupanaxü̃ ngechaü̃xü̃, rü naxüamáxe i ngẽma nagu taxunetaxü̃ woo tüxü̃́ naguxchagu nax tayanguxẽẽxü̃,

⁵ rü tümaarü diẽru paxaãchi ngĩxü̃ ixãxẽ nax ngearü üétüãcüma tanatáeguxẽẽãxü̃ca̱x, rü tama diẽru yaxúxe ega texé naxütanügu nax napoxcuxü̃ca̱x i ngẽma taxuxü̃ma i chixexü̃ üxü̃. Rü yíxema ngẽmaãcü maxü̃́xẽ rü tagutáma ta̱xacürü chixexü̃gu tangu.