Wiyaegü 149 - Tupanaarü Ore

Tupana rü guxü̃arü üruxü̃ nixĩ rü guxü̃arü ãẽ̱xgacü nixĩ

¹ ¡Rü nüxü̃ picua̱xüxü̃gü ya Cori ya Tupana! ¡Rü naxca̱x pewiyae nagu i wüxi i wiyae i ngexwaca̱xü̃xü̃! ¡Rü ngẽmaãcü nüxü̃ picua̱xüxü̃gü i norü duü̃xü̃güarü ngutaque̱xewa!

² Rü pemax, Pa Iraétanüxü̃ i Chióü̃cüã̱x i Tupanaarü Duü̃xü̃gü Pixĩgüxex ¡rü namaxã petaãxẽgü! Erü nüma nixĩ i perü ãẽ̱xgacü ga pexü̃ nango̱xẽẽxü̃.

³ Rü pemax, Pa Iraétanüxü̃x ¡rü Tupanaégagu ípiyüxe rü ngẽmaãcü nüxü̃ picua̱xüxü̃gü! ¡Rü perü árpagümaxã rü perü paü̃derugümaxã pepaxetagüãcüma naxca̱x pewiyaegü!

⁴ Erü nüma ya Cori ya Tupana rü namaxã nataãxẽ i norü duü̃xü̃gü i nüxü̃ icua̱xüü̃güxü̃. Rü nüma rü tüxü̃ namaxẽxẽxẽ ya yíxema tama tügü icua̱xüxü̃güxe.

⁵ Rü pemax, Pa Norü Duü̃xü̃güx ¡rü Corimaxã petaãxẽgü! ¡Rü woo i pechicawa rü naxca̱x pewiyaegü!

^6-7 ¡Rü peã̱xmaxã nüxü̃ picua̱xüxü̃gü! ¡Rü pexme̱xwa peyange i tara i guxü̃cüwawa téxü̃ nax ngẽmamaxã penada̱i̱xü̃ca̱x i ngẽma duü̃xü̃gü i tama Tupanaxü̃ cua̱xgüxü̃, rü ngẽmaãcü penapoxcuexü̃ca̱x i ngẽma togü i nachixü̃anegücüã̱x!

^8-9 Rü ngẽma norü ãẽ̱xgacügü rü norü ngü̃xẽẽruü̃gü i poraexü̃ ¡rü cadénamaxã peyachotagü nax ngẽmaãcü peyanguxẽẽxü̃ca̱x i ngẽma poxcu ya Tupana namaxã ueguxü̃! Rü nüma ya Tupana rü aixcüma tá tümamaxã nataãxẽ ya guxãma ya yíxema aixcüma naga ĩnüexe. ¡Nüxü̃ picua̱xüxü̃gü ya Cori ya Tupana!