Wiyaegü 148 - Tupanaarü Ore

Tupanaxü̃ nicua̱xü̃gü i ngẽma nüma naxüxü̃

^1-2 Rü name nixĩ i Tupanaxü̃ ticua̱xüü̃gü. Rü pemax, Pa Dauxü̃cüã̱x, rü name nixĩ i ngéma dauxü̃wa nüxü̃ picua̱xüü̃gü. Rü pemax, Pa Orearü Ngeruü̃gü i Dauxü̃cüã̱x, rü name nixĩ i nüxü̃ picua̱xüü̃gü. Rü pemax, Pa Tupanaarü Churaragü i Dauxü̃cüã̱x, rü name nixĩ i nüxü̃ picua̱xüü̃gü.

³ Rü cumax, Pa Üa̱xcüx, rü cumax, Pa Tauemacüx, rü pemax, Pa Ẽxtagüx, rü name nixĩ i nüxü̃ picua̱xüü̃gü.

⁴ Rü cumax, Pa Daxũguxü̃ i Naanex, rü cumax, Pa Dexá i Caixanexü̃étüwa Ngẽxmaxü̃x, rü name nixĩ i nüxü̃ picua̱xüü̃gü.

⁵ ¡Rü nüxü̃ pixuchiga ya Cori ya Tupana! Erü nüma nixĩ ga namaxã nadexaãchixü̃ nax nangóxü̃ca̱x i guxü̃ma i ta̱xacü ingexmaxü̃.

⁶ Rü yemaacü nanango̱xẽxẽ ga guxü̃ma nax guxü̃gutáma nüma nanaxwa̱xexü̃ãcüma nangẽxmaxü̃ca̱x. Rü inanaxã ga mugü ga taxúema üchicüxüxü̃.

⁷ ¡Rü ñoma i naanewa rü nüxü̃ picua̱xüü̃gü ya Cori ya Tupana, Pa Naeü̃gü i Taxüchigüxü̃ i Már arü Mátamaxü̃wa Maxẽxü̃!

⁸ Rü name nixĩ i nüxü̃ picua̱xüü̃gü, Pa Ãẽmacü, rü Gáuxü̃ i Ãpü̱xüxü̃, rü Gáuxü̃ i Ãte̱xexü̃, rü Cherena, rü Tacü ya Buanecü ya Tupanaarü Ngúchaü̃ Ücüx.

^9-10 Rü pemax ya ma̱xpǘnegü, rü máxpü̱xanegü, rü guxü̃ma i naigü i taxü̃ne, rü nanetügü, rü naxü̃nagü, rü naeü̃gü, rü werigü, rü guxü̃ma i ta̱xacü i naxtanecamaxã ixĩxü̃, rü name nixĩ i nüxü̃ picua̱xüü̃gü.

¹¹ ¡Rü guxü̃ma i ãẽ̱xgacügü i wüxichigü i nachixü̃anemaxã icuáxü̃, rü guxü̃ma i norü ngü̃xẽẽruü̃gü i ãẽ̱xgacügü, rü guxü̃ma i norü duü̃xü̃gümaxã rü Tupanaxü̃ picua̱xüxü̃gü!

¹² ¡Rü yatügü rü ngexü̃gü rü ngextü̱xücügü rü paxü̃gü rü o̱xigü, rü Tupanaxü̃ picua̱xüxü̃gü!

¹³ Rü ngẽmaãcü i guxãma i pema rü name nixĩ i nüxü̃ picua̱xüü̃gü. Erü nüma ya Tupana rü guxãétüwa nangẽxma. Rü nüma rü mea namaxã inacua̱x i guxü̃ma i daxũguxü̃ i naanewa ngẽxmaxü̃ rü guxü̃ma i ñoma i naanewa ngẽxmaxü̃.

¹⁴ Rü nüma ya Tupana rü nüxü̃ narüngü̃xẽxẽ ga norü duü̃xü̃gü ga Iraétanüxü̃ nax norü uanügüxü̃ naporamaegüxü̃ca̱x. Rü ngẽmaca̱x, Pa Iraétanüxü̃ i Aixcüma Tupanaarü Duü̃xü̃gü Ixĩgüxe, rü name nixĩ i nüxü̃ picua̱xüü̃gü. Erü nümatama nixĩ i pexü̃ naxunetaxü̃ nax norü duü̃xü̃gü pixĩgüxü̃ca̱x. ¡Rü ngĩxã nüxü̃ ticua̱xüxü̃gü ya Cori ya Tupana!