Wiyaegü 147 - Tupanaarü Ore

Tupana rü poraãcü Iraétanüxü̃xü̃ narüngü̃xẽxẽ

¹ ¡Rü ngĩxã nüxü̃ ticua̱xüü̃gü ya Cori ya Tupana! Rü name nixĩ i naxca̱x tawiyaegü. Erü wüxi i taãxẽ nixĩ nax nüxü̃ icua̱xüü̃güxü̃.

² Rü nüma ya Cori ya Tupana rü wena ínanadaxẽxẽ ya Yerucharéü̃ rü nananutaque̱xe i ngẽma Iraétanüxü̃ i to i nachixü̃anegügu woonexü̃.

³ Rü nüma rü tüxü̃ nataãẽxẽxẽ ya yíxema poraãcü ngechaü̃ ingegüxe rü tüxü̃́ nayana̱i̱xgü i tümaarü o̱xrigü.

⁴ Rü nüma rü nüxü̃ nacua̱x nax ñuxre yixĩxü̃ ya ẽxtagü rü wüxichigü rü naégamaxã nüxna naca.

⁵ Rü nüma ya tórü Tupana rü guxü̃étüwa ücü nixĩ rü naporaxüchi. Rü norü cua̱x rü taguma inayagu̱x.

⁶ Rü nüma rü nüxü̃ narüngü̃xẽxẽ i ngẽma duü̃xü̃gü i tama nügü icua̱xüü̃güxü̃ natürü nanaxãneexẽxẽ i ngẽma chixexü̃ ügüxü̃.

⁷ ¡Rü árpamaxã naxca̱x pewiyaegü rü moxẽ nüxna pexãgü ya tórü Tupana!

⁸ Rü nüma rü caixanexü̃maxã nanatüxchipeta i ñaa naane. Rü nanamexẽxẽ ya pucü nax ñaa naanexü̃ yawaixẽẽxü̃ca̱x, rü ma̱xpǘnegüwa nanaxügüxẽxẽ ya maxẽ.

⁹ Rü nüma rü nanachibüexẽxẽ i naeü̃gü. Rü ngẽxgumarüxü̃ ta nanachibüexẽxẽ i ngẽma ngurucuxacügü i ngẽxguma naxauxegu.

¹⁰ Rü tama ngẽma cowaruarü poramaxã nataãxẽ ya Tupana rü bai i yatügüarü poragu narüxĩnü.

¹¹ Natürü ngẽma aixcüma namaxã nataãẽxü̃ nixĩ nax nüxü̃ ticua̱xüü̃güxü̃ ya yíxema nagu yaxõgüxe i norü ngechaü̃.

¹² Pa Yerucharéü̃cüã̱xgüx ¡Cori ya Tupanaxü̃ picua̱xüü̃gü! Rü Pa Chióü̃x ¡curü Tupanaxü̃ icua̱xüxü̃!

¹³ Erü nüma rü nanataixẽxẽ i perü ĩanearü ĩã̱x naxcha̱xwa i perü uanügü. Rü mea nüxna nadau i pexacügü i perü ĩanewa.

¹⁴ Rü nüma nixĩ i pexü̃ nangüxmüexẽẽxü̃ i pechixü̃anewa rü muxũchixü̃ i trigumaxã pexü̃ nataãẽxẽẽgü.

¹⁵ Rü nüma rü ñoma i naanewa nanamu i norü ore. Rü ngẽma norü ore rü paxãma nixũ.

¹⁶ Rü nüma rü nanango̱xẽxẽ i cherena i gáuxü̃ i pamüemaxü̃ i ñoma carnéruta̱xarüxü̃ cómüxü̃. Rü ngẽma gáuxü̃ i ãte̱xexü̃maxã nanagüane.

¹⁷ Rü nüma rü nanayixẽxẽ i gáuxü̃ i ãpü̱xüxü̃. Rü ngẽma gáuanexü̃ i núma namuxü̃maxã rü ngẽma dexá rü ínitai.

¹⁸ Natürü yixcüama ínananguxẽxẽ ya buanecü ya naicü. Rü yimá buanecü rü inanadexẽxẽ i ngẽma gáuxü̃. Rü ngẽxguma i ngẽma dexá rü iniya̱x.

¹⁹ Rü nüma nixĩ ga Acóbutanüxü̃ ga Iraétanüxü̃xü̃ nüxü̃ nacua̱xẽẽxü̃ ga norü ore rü norü mugü.

²⁰ Natürü yema togütücumü ga duü̃xü̃gü rü taguma nüxü̃ nüxü̃ nacua̱xẽxẽ ga yema norü ore rü norü mugü. ¡Rü ngĩxã nüxü̃ ticua̱xüü̃gü ya Cori ya Tupana!