Wiyaegü 144 - Tupanaarü Ore

Ãẽ̱xgacü ga Dabí rü Tupanana moxẽ naxã

¹ Namexẽchi ya Cori ya Tupana ya chorü poxü̃ruxü̃. Rü nüma nixĩ i choxü̃ nangu̱xẽẽxü̃ rü choxü̃ nüxü̃ nacua̱xẽẽxü̃ nax daiwa chaporaxü̃.

² Rü nüma nixĩ i aixcüma chomücü yixĩxü̃ rü chorü poxü̃ruxü̃ yixĩxü̃. Rü naxca̱x nixĩ i chiñaxü̃ nax ngẽxma chicúxü̃ca̱x. Rü nüma nixĩ i chorü nguxuchixẽẽruxü̃ rü chorü tüpe̱xeruxü̃. Rü namaxã nixĩ i chaugü chatüpe̱xexü̃. Rü nüma nixĩ i cho̱xme̱xwa nangẽxmagüxẽẽãxü̃ i ĩanegü.

³ Pa Cori Pa Tupanax ¿ta̱xacüwa cuxü̃́ name ya yimá duü̃ rü ngẽmaca̱x nagu curüxĩnüxü̃? ¿Rü curü ta̱xacü nixĩ ya yimá duü̃ rü ngẽmaca̱x poraãcü nüxü̃ cungechaü̃xü̃?

⁴ Rü yimá duü̃ rü wüxi i ngü̃ãcüürüxü̃ nixĩ i norü maxü̃. Rü ngẽma norü maxü̃ rü ñoma wüxi i gáuxchipetaxü̃ üpetüxü̃rüü̃mare nixĩ.

⁵ Pa Corix ¡yawãxna i daxũguxü̃ i naane rü ñoma i naanegu írüxĩ! ¡Rü nüxü̃ ingógü ya ma̱xpǘnegü nax yana̱i̱xgüxü̃ca̱x rü yacaixquegüxü̃ca̱x!

⁶ ¡Rü inacuxgü ya cuxnegü ya ãẽmacügü ixĩgüne nax ngẽmacha̱xwa yabuxmüxü̃ca̱x i curü uanügü!

^7-8 ¡Rü ẽcü cha̱u̱xca̱x rüxue i daxũguxü̃ i naanewa nax nawa choxü̃ ícuyaxuxũchixü̃ca̱x i ñaa taxü̃ i guxchaxü̃ i nawa changexmaxü̃! ¡Rü choxü̃ napu naxme̱xwa i ñaa chorü uanügü i dorata̱xagüxü̃ i norü doramaxã choxü̃ íxuaxü̃güxü̃!

⁹ Pa Corix, ngexwaca̱xü̃xü̃ i wiyaegu tá cuxca̱x chawiyae chorü paxetaruü̃maxã. Rü ngẽmaãcü chorü wiyaemaxã tá cuxü̃ chicua̱xüxü̃.

^10-11 Rü cuma nixĩ i nachixü̃anegüarü ãẽ̱xgacügüxü̃ curüngü̃xẽẽxü̃ nax norü uanügüxü̃ naporamaegüxü̃ca̱x. Rü cuma nixĩ ga curü duü̃ ga Dabíxü̃ ícunguxũchixẽẽxü̃ naxme̱xwa ga norü uanügü. ¡Rü ñu̱xma rü choxü̃ ínapoxü̃ nax tama norü taramaxã choxü̃ yama̱xgüxü̃ca̱x i chorü uanügü! ¡Rü choxü̃ napu naxme̱xwa i ñaa chorü uanügü i dorata̱a̱xgüxü̃ i norü doramaxã choxü̃ íxuaxü̃güxü̃!

¹² Rü ngẽxguma Tupanaga ixĩnüegu rü aixcüma tataãẽgü. Rü tanegü rü mea nayae ñoma nanetügü i baxcaxü̃rüxü̃. Rü taxacügü rü iyamexẽchi ñoma Tupanapataarü caxtagürüxü̃.

¹³ Rü tórü trigupataü̃gü rü nixããcu namaxã i naguxü̃raü̃xü̃ i nabü. Rü tórü carnérugü rü poraãcü nimu i tórü nachitaxü̃wa.

¹⁴ Rü tórü wocagü nixãxacügü rü mea nabue i naxacügü. Rü tórü ĩanemaxü̃güwa rü taxúema ãũcümaxü̃gagu aita taxü.

¹⁵ Rü ngẽma duü̃xü̃gü i guxü̃ma i ngẽma mexü̃ nüxü̃́ ngẽxmagüxü̃ rü aixcüma nataãẽgü. Rü ngẽmatama taãxẽ nüxü̃́ nangẽxma i ngẽma duü̃xü̃gü i Cori ya Tupanamaxã Tupanaã̱xgüxü̃.