Wiyaegü 143 - Tupanaarü Ore

Pa Corix cugu nixĩ i chayaxõxü̃

¹ Pa Cori Pa Tupanax ¡choxü̃́ nüxü̃ naxĩnü i chorü yumüxẽ! ¡Rü naxca̱x irüxĩnü i ngẽma cuxna naxca̱x chaca̱xaxü̃! ¡Rü ẽcü choxü̃ nangãxü̃! Erü cumecüma rü aixcüma cuyanguxẽxẽ i ngẽma nüxü̃ quixuxü̃.

² ¡Rü taxṹ i choxna naxca̱x cucaxü̃ i chorü chixexü̃gü nax poxcu chomaxã cuxueguxü̃ca̱x! Erü cupe̱xewa rü tataxuma ya texé ya tama nüxü̃ cuáxe nax chixexü̃ taxüxü̃.

³ Rü ngẽma chorü uanügü rü chowe ningẽxü̃tanü rü waixü̃müwa choxü̃ nayapotügü. Rü ẽanexü̃gu choxü̃ napoxcu nax ngéma chamaxü̃xü̃ca̱x naxrüxü̃ ga yema nũxcüma yuexü̃.

⁴ Rü ñu̱xma rü chayaxĩ̱xãchiãẽxü̃chi rü chauãẽwa poraãcü chamuü̃.

⁵ Rü nagu charüxĩnü ga yema mexü̃gü ga taxü̃ ga nũxcüma toxca̱x cuxüxü̃. Rü nüxna chacua̱xãchi nax poraãcü toxü̃ curüngü̃xẽẽxü̃.

⁶ Rü ngẽma nax chacuxwa̱xexüchixü̃ ñoma waixü̃mü i paxü̃ i dexá naxwa̱xexüchixü̃rüxü̃, rü cuxca̱x chaxunagüme̱xẽ chayumüxẽ.

⁷ Pa Cori Pa Tupanax ¡paxa choxü̃ nangãxü̃! Erü ngẽmatama chayu. ¡Rü taxṹ i cuxoxü̃ nax choxü̃ curüngü̃xẽxẽxü̃! Erü ngẽxguma tama choxü̃ curüngü̃xẽẽgu rü tá chayu naxrüxü̃ i ngẽma yuexü̃.

⁸ ¡Rü pa̱xmama choxü̃ nawe̱x nax poraãcü choxü̃ cungechaxü̃xü̃! Erü cuxü̃́ nixĩ i chayaxõxü̃. ¡Rü choxü̃ nüxü̃ nacua̱xẽxẽ nax ñuxãcü cunaxwa̱xexü̃ nax cupe̱xewa chamaxü̃xü̃! Erü cumaxã nixĩ i nüxü̃ chixuxü̃ i ngẽma chorü ngúchaü̃.

⁹ Pa Cori Pa Tupanax ¡nüxna choxü̃ ínanguxuchixẽxẽ i ngẽma chorü uanügü! Erü cuxca̱x nixĩ i chiñaxü̃ nax cuxü̃tagu chaugü chicúxü̃ca̱x.

¹⁰ ¡Rü choxü̃ nangu̱xẽxẽ nax chanaxüxü̃ca̱x i curü ngúchaü̃! Erü cuma nixĩ i chorü Tupana quixĩxü̃. Rü chanaxwa̱xe i cuãxẽ i üünexü̃ rü mexü̃ i nacümagu choxü̃ nixũxẽxẽ.

¹¹ Pa Corix, cuégagu cuxna chaca nax choxü̃ cumaxẽẽxü̃ca̱x. ¡Rü choxü̃ ínanguxuchixẽxẽ nawa i ñaa ngúxü̃ i chingexü̃! Erü cuma rü cumecüma.

¹² Rü cuma rü aixcüma cuyanguxẽxẽ i ngẽma nüxü̃ quixuxü̃. ¡Rü ngẽmaca̱x nadai i ngẽma chorü uanügü! ¡Rü ẽcü guxü̃xü̃ma nadai! Erü choma rü curü duü̃xü̃ chixĩ.