Wiyaegü 141 - Tupanaarü Ore

Pa Cori Pa Tupanax, cuxü̃ nixĩ i chadawenüxü̃

¹ Rü ñu̱xma nax cuxna chaca̱xaxü̃, Pa Cori Pa Tupanax, ¡rü paxa choxü̃ rüngü̃xẽxẽ! ¡Rü choxü̃ naxĩnü i ñu̱xma nax cuxna chaca̱xaxü̃!

² Rü ñaa chorü yumüxẽ i cumaxã nüxü̃ chixuxü̃ ¡rü nayaxu ñoma pumarate̱xe i yáuanecü chaxunagüchacüxüãcüma cuxca̱x chiguxü̃rüxü̃!

³ Pa Cori Pa Tupanax ¡choxü̃ rüngü̃xẽxẽ nax tama ore i chixexü̃xü̃ chixuxü̃ca̱x i cuchiga!

⁴ ¡Rü choxna nayaxu i ngẽma chixexü̃gu nax charüxĩnüxü̃! ¡Rü taxṹ i choxü̃ quingexü̃ nax chixexü̃gu chixũxü̃ca̱x rü bai i natanü nax chaxãxü̃ca̱x i norü õnawa i ngẽma duü̃xü̃gü i chixexü̃ ügüxü̃!

⁵ Rü choxü̃́ rü wüxi i ngü̃xẽxẽ nixĩ ega ngẽxguma choxü̃ nawe̱xãchixẽẽgu i wüxi i duü̃xü̃ i cupe̱xewa mexü̃. Natürü ngẽma norü ucu̱xẽ i ngẽma chixexü̃ ügüxü̃ rü tama choxü̃́ name rü taxũtáma naga chaxĩnü. Rü guxü̃gutáma chayumüxẽ nax nüxü̃ naxoexü̃ca̱x i ngẽma chixexü̃ i nagu ínamaxẽxü̃ uxcuxẽ

⁶ Rü ngẽma chixexü̃ ügüxü̃ i duü̃xü̃güarü ãẽ̱xgacügü rü tá nayayitanü ñoma ma̱xpǘnewa nayi̱xixü̃rüxü̃. Rü ngẽxgumama tá nüxna nacua̱xãchie nax namexü̃ ga yema ore ga namaxã nüxü̃ chixuxü̃.

⁷ Rü yima naxchina̱xãgü i ngẽma chixexü̃ ügüxü̃ rü naxmaxü̃xü̃tagu tá nawoone ñoma mairaxü̃ i aixmüanexü̃ ngẽxma woonexü̃rüxü̃.

⁸ Pa Cori Pa Tupanax, cuxü̃ nixĩ i chadawenüxü̃. Rü cuxca̱x nixĩ i chiñaxü̃ nax choxü̃ ícupoxü̃xü̃ca̱x. ¡Rü taxṹ i choxna quixũgachixü̃!

⁹ ¡Rü choxü̃ ínapoxü̃ nawa i ngẽma yauxruxü̃ i cha̱u̱xca̱x yanuagüxü̃ i ngẽma chixexü̃arü üruü̃gü!

¹⁰ Natürü nümatátama nagu nayi i ngẽma yauxruxü̃ i cha̱u̱xca̱x yanuagüxü̃. Rü yoxni i chomax rü tá chiña.