Wiyaegü 137 - Tupanaarü Ore

Babiróniaanearü natücutügüwa Yerucharéü̃ca̱x taxauxe

¹ Rü yexguma Babiróniaanearü natücutügüwa tarütogügu rü taxauxe yerü nüxna tacua̱xãchi ga Chióü̃.

² Rü Babiróniaanearü naixtanügu tanachogü ga torü paxetaruü̃gü ga árpagü.

³ Rü yema Babiróniaanecüã̱x ga yéma toxü̃ gagüxü̃ ga torü yemaxü̃gü ga toxna puxü̃xü̃, rü toxü̃ namu nax taãẽãcü naxca̱x tawiyaegüxü̃ nagu ga wiyaegü ga Chióü̃cüã̱x.

⁴ ¿Rü ñuxãcü tá nagu tawiyaegü ya torü Cori ya Tupanaarü wiyaegü i ngẽxguma ngẽma naane i tama toxrü ixĩxü̃wa tangexmagügu?

⁵ Rü ngẽxguma chi Tupanape̱xewa cuxü̃ icharüngümagu, Pa Yerucharéü̃x ¡rü daa chorü tügünechacüxü rü nüxü̃ iyanangüma nax cuxca̱x napaxetaxü̃!

⁶ Rü ngẽxguma cuxü̃ charüngümagu rü tama choxrütama taãẽétüwa cuxü̃ chaxǘxẽẽgu, Pa Yerucharéü̃x ¡rü daa chorü conü rü name i nua chauxmanaxãwa yaxũ nax taguma wena chawiyaexü̃ca̱x!

⁷ Pa Cori Pa Tupanax ¡taxṹ i cunangupetüxẽxẽmarexü̃ nax cupoxcuexü̃ i ngẽma Edóü̃tanüxü̃ ga Babiróniacüã̱xgüxü̃ muxü̃ nax noxtacüma iyanaxoxü̃ca̱x ga torü ĩane ga Yerucharéü̃!

⁸ Rü cumax, Pa Babiróniax, rü tá icuyarüxo. Rü tá nataãxẽ ya yimá cuxü̃ iyarüxoxẽẽcü naxca̱x ga yema tomaxã cuxüxü̃.

⁹ Rü tá nataãxẽ ya yimá curü buxü̃güxü̃ íyauxü̃cü nax nutagu yachi̱xgüãcüma nadaiaxü̃ca̱x.