Wiyaegü 129 - Tupanaarü Ore

Tupana rü Iraéanexü̃ ínanguxuchixẽxẽ nüxna i norü uanügü

¹ Rü ñu̱xma i Iraéane rü ñanagürü: —Choma rü muxü̃ma ga ngúxü̃wa chaxüpetü noxritama changextü̱xügu.

² Rü aixcüma muxü̃ma ga ngúxü̃wa chaxüpetü noxritama changextü̱xügu, natürü taxuxü̃ma choxü̃ narüporamae i chorü uanügü.

³ Rü poraãcü choxü̃ nacua̱i̱xgü rü choxü̃ nanapi̱xẽẽgü.

⁴ Natürü nüma ya Cori ya aixcüma mecümacü rü choxü̃ ínanguxuchixẽxẽ naxme̱xwa i ngẽma chorü uanügü i chixexü̃gu maxẽxü̃ —ñanagürü i Iraéane.

⁵ Rü ngẽma Chióü̃arü uanügü rü chanaxwa̱xe nax yaxãneetanüãchixü̃ rü taxcha̱xwa yabuxmüxü̃.

⁶ Rü ngẽma uanügü rü name nixĩ i ñoma maxẽ i ĩpataétüwa rüxüxü̃ i taxũtáma nayaegu yuexü̃rüxü̃ nixĩgü.

⁷ Rü name nixĩ i ñoma trigu i taguma norü owa nguxü̃ rü taguma ibuxarü oṍxü̃rüxü̃ nixĩgü.

⁸ Rü ngẽxguma texé nüxü̃ da̱u̱xgu rü taxúematama ñatagürü nüxü̃: —¡Tupana pexü̃ rüngü̃xẽxẽ! ¡Rü Cori ya Tupanaégagu mexü̃ pexü̃ ngupetü! —ñatagürü nüxü̃.