Wiyaegü 124 - Tupanaarü Ore

Tupana rü Iraétanüxü̃arü poxü̃ruxü̃ nixĩ

¹ Rü yexguma chi Cori ya Tupana tama tüxü̃ ípoxü̃gu rü tórü uanügü rü chi tüxü̃ nadai, rü name nixĩ i ngẽma ñapegürügü, Pa Iraétanüxü̃x.

^2-3 Rü yexguma chi Cori ya Tupana tama tüxü̃ rüngü̃xẽẽgu ga yexguma taxca̱x íyaxüãchigu ga yema tüxü̃ daixchaü̃xü̃ rü chi norü numaxã tüxü̃ nagu̱xẽxẽ.

^4-5 Rü ñoma wüxi i natüarü dexá i poraxü̃chíüxü̃ tüxü̃ ichagüxẽẽxü̃ rü taétüwa ya̱xpetüxü̃rüxü̃ chi tamaxã nixĩgü nax tüxü̃ nada̱i̱xü̃.

⁶ Rü namexẽchi ya Cori ya Tupana ya tama naxwa̱xecü nax tórü uanügü naxnemaxã tüxü̃ daixü̃.

⁷ Rü yemaacü nawa ítanguxü̃ ga yema ãũcümaxü̃ ga tórü uanügü taxca̱x mexẽẽxü̃ ñoma wüxi i weri i norü yauxruü̃wa iñaxü̃rüxü̃. Rü yema yauxruxü̃ ga tórü uanügü taxca̱x mexẽẽxü̃ rü narügáu rü tibuxmü.

⁸ Rü yimá Tupana ya daxũguxü̃ i naanearü üruxü̃ rü ñoma i naanearü üruxü̃, rü yimá nixĩ ya tüxü̃ rüngü̃xẽẽcü.