Wiyaegü 122 - Tupanaarü Ore

Yerucharéü̃xü̃ nicua̱xüxü̃

¹ Rü chataãxẽ i ngẽxguma choxü̃ nangĩxãgügu nax Cori ya Tupanapatawa taxĩxü̃.

² Pa Ĩane ya Yerucharéü̃x, marü curü ĩã̱xarü aixepewa tangexmagü.

³ Pa Yerucharéü̃x, cuxü̃ naxügü nax cuwa nangutaque̱xegüxü̃ i Tupanaarü duü̃xü̃gü.

⁴ Rü cuwa nixĩ i naxĩxü̃ i guxü̃ma i Tupanaarü duü̃xü̃gü i Iraétanüxü̃ nax Cori ya Tupanaxü̃ yacua̱xüü̃güxü̃ca̱x ngẽma nüma namaxã nüxü̃ yaxuxü̃rüxü̃.

⁵ Rü Yerucharéü̃wa nixĩ i nangẽxmaxü̃ i ngẽma tochicaxü̃gü i ãẽ̱xgacügü i guxchaxü̃arü mexẽẽruü̃gü nawa rütogüxü̃. Rü ngẽma tochicaxü̃gü rü ãẽ̱xgacü ga Dabípatawa nixĩ i nangẽxmagüxü̃.

⁶ ¡Rü guxü̃nema ya perü maxü̃nemaxã Tupanana peca nax Yerucharéü̃wa nangẽxmaxü̃ca̱x i taãxẽ! Rü namaxã nüxü̃ pixu ya yima ĩane rü ñaperügü: —Tanaxwa̱xe i cuwa mea namaxẽ i ngẽma cuxü̃ ngechaü̃güxü̃ —ñapegürü.

⁷ Pa Yerucharéü̃x, chanaxwa̱xe i cuwa nangẽxma i taãxẽ rü curü ãẽ̱xgacügüpatawa nax nataxuxü̃ i guxchaxü̃gü.

⁸ Rü ñu̱xma rü chauenexẽgüca̱x rü chomücügüca̱x chanaxwa̱xe i cuwa nangẽxma i taãxẽ, Pa Yerucharéü̃x.

⁹ Rü yima tórü Cori ya Tupanapatagagu cuxca̱x chayumüxẽ nax mea cuxü̃ naxüpetüxü̃ca̱x, Pa Yerucharéü̃x.