Wiyaegü 121 - Tupanaarü Ore

Cori ya Tupana rü curü poxü̃ruxü̃ nixĩ

¹ Rü ngẽxguma ma̱xpǘnegu chadawenügu rü chaugüna chaca rü ñachagürü: —¿Ngextá tá nixĩ i ne naxũxü̃ i chorü ngü̃xẽxẽ? —ñachagürü.

² Rü ngẽma chorü ngü̃xẽxẽ rü tá naxü̃tawa ne naxũ ya Cori ya Tupana i daxũguxü̃ i naanearü üruxü̃ rü ñoma i naanearü üruxü̃ ixĩcü.

³ Rü nüma rü tagutáma nanaxwa̱xe nax cuyanguxü̃ rü tagutáma nape ya yimá cuxna daucü.

⁴ Rü nüma rü guxü̃guma ínadau rü naxuãxẽ. Rü taguma nape ya yimá Iraétanüxü̃na daucü.

⁵ Rü nüma ya Cori ya Tupana nixĩ i cuxna nadauxü̃ rü cuxü̃ ínapoxü̃xü̃, erü guxü̃guma cuxü̃tawa nangẽxma nax cuxü̃ nangü̃xẽẽxü̃ca̱x.

⁶ Rü ngunecü rü yima üa̱xcü rü taxuxü̃táma chixexü̃ cumaxã naxü rü woo ya tauemacü i chütacü.

⁷ Rü nüma ya Cori ya Tupana rü naguxü̃raü̃xü̃ i ãũcümaxü̃wa cuxü̃ ínapoxü̃ erü nüma nixĩ i nüxna nadauxü̃ i curü maxü̃.

⁸ Rü ngẽmaãcü i nüma ya Cori ya Tupana rü guxü̃wama cuxü̃ ínapoxü̃ i ñu̱xma rü guxü̃gutáma.