Wiyaegü 120 - Tupanaarü Ore

Yumüxẽ i ngẽxguma ãũcümaxü̃wa nangexmagu

¹ Rü ngẽxguma ãũcümaxü̃wa changexmagu, rü nüxna chaca ya Cori ya Tupana. Rü nüma rü choxü̃ nangãxü̃.

² Pa Corix, ¡choxü̃ ínanguxuchixẽxẽ nüxna i ngẽma duü̃xü̃gü i dorata̱xgüxü̃ i chixriãcü chauchiga idexagüxü̃!

³ ¿Rü ta̱xacü tá nixĩ i curü poxcu, Pa Conüx i Dorata̱xáxü̃?

⁴ Rü cuma rü tá naxne ya ãmagunemaxã quingóxnatachinü. Rü ã́xwe ya naicümaxã tá quixa.

⁵ Rü chaugümaxã changechaü̃ erü natanüwa changexma i ngẽma Méchecüã̱xgü. Rü ngẽma Quedáxtanüxü̃ ínaxãchiü̃güxü̃gu chamaxü̃.

⁶ Rü marütama nixĩ nax norü ngãxü̃wa changexmaxü̃ i ngẽma chauxchi aiexü̃ i nuegu rüxĩnüexü̃.

⁷ Rü ngẽxguma ngüxmüchiga namaxã chidexagu, rü nümagü rü daichigagu nidexagü.