Wiyaegü 12 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃

¹ Pa Cori Pa Tupanax ¡paxa toxü̃ rüngü̃xẽxẽ! Erü marü nataxuma i aixcüma cuxü̃́ yaxõgüxü̃. Rü ñoma i naanewa marü inarüxo i ngẽma duü̃xü̃gü i aixcüma mexü̃gu rüxĩnüexü̃.

² Rü nügütanüwa i duü̃xü̃gü rü nügü nawomüxẽẽgü. Rü mea nidexagüneta rü tama aixcümaxü̃ nixugü.

³ Cori ya Tupana rü tá inayanaxoxẽxẽ i guxü̃ma i ngẽma nügü írümegünetaxü̃ rü ngẽma nügü icua̱xüü̃güxü̃.

⁴ Rü nümagü rü ñanagürügü: —Toma rü mea nüxü̃ tacua̱xgü nax tidexagüxü̃ rü torü oremaxã togü ítapoxü̃. ¿Rü texé tá toxü̃ tarüngea̱xgüxẽxẽ? —ñanagürügü.

⁵ Natürü nüma ya Cori ya Tupana rü ñanagürü: —Choma rü tá tümaétüwa chachogü rü tá tüxü̃ charüngü̃xẽxẽ ya yíxema ngearü diẽruã̱xgüxe rü turaexe rü chixri tümamaxã inacua̱xgüxe. Erü ngẽma nixĩ i tanaxwa̱xegüxü̃ ya yíxema ngúxü̃ ingegüxe —ñanagürü.

⁶ Rü ngẽma Cori ya Tupanaarü ore rü aixcüma nixĩ. Rü norü unetagü rü ñoma diẽrumü i 7 e̱xpü̱xcüna ornuwa iguxü̃rüxü̃ nixĩ nax nataxuxü̃ma i norü ãũãchixü̃.

^7-8 Pa Cori Pa Tupanax, cuma rü tá toxna cudau rü guxü̃gutáma toxü̃ ícupoxü̃ nüxna i ngẽma chixexü̃ ügüxü̃. Rü woo guxü̃wama toxü̃ ínachomaeguãchi i ngẽma duü̃xü̃gü rü woo namaxã nataãxẽ i ngẽma chixexü̃ i naxügüxü̃, natürü i cuma rü guxü̃gutáma toxna cudau rü toxü̃ ícupoxü̃ nüxna i ngẽma chixexü̃ ügüxü̃.