Wiyaegü 112 - Tupanaarü Ore

Nataãxẽ ya yimá yatü ya mexü̃gu rüxĩnücü

¹ Name nixĩ i Cori ya Tupanaxü̃ ticua̱xüü̃gü. Rü nataãxẽ ya yimá yatü ya Cori ya Tupanaxü̃ ngechaü̃cü rü norü mugügu imaxü̃cü.

² Rü yimá yatü ya mexü̃gu rüxĩnücü rü Tupana tá nüxü̃ narüngü̃xẽxẽ i ngẽma naxacügü rü tá naporae i ñoma i naanewa.

³ Rü napatawa ya yimá yatü rü namuarü ngẽmaxü̃ã̱xgü. Rü guxü̃guma norü ngẽmaxü̃gümaxã to̱xguã̱xü̃ narüngü̃xẽxẽ.

⁴ Rü yimá yatü rü ñoma wüxi i omü i ẽanexü̃wa ibáxixü̃rüxü̃ nixĩ naxca̱x i ngẽma togü i duü̃xü̃gü i mexü̃. Rü nüma rü namecüma rü nangechaü̃wa̱xe rü nixaixcüma.

⁵ Rü yimá yatü ya mecümacü rü norü ngẽmaxü̃gümaxã togüxü̃ narüngü̃xẽxẽ. Rü mea namaxã inacua̱x i guxü̃ma i ngẽma nüxü̃́ ngẽxmaxü̃.

⁶ Rü yimá yatü rü taxũtáma nagu nayarüchixe. Rü duü̃xü̃gü rü guxü̃gutáma nüxna nacua̱xãchigü naxca̱x i ngẽma mexü̃ i naxüxü̃.

⁷ Rü nüma rü taxuca̱xma naxca̱x naba̱i̱xãchi i ta̱xacürü chixexü̃ i ore i nachiga i nüxü̃ naxĩnüxü̃, erü nüxü̃ nacua̱x nax Tupana aixcüma nüxna dauxü̃.

⁸ Rü nüma ya yimá yatü rü taxuca̱xma norü uanügüxü̃ namuü̃. Rü nüxü̃ nacugüama erü Tupanagu nayaxõ.

⁹ Rü yíxema tüxü̃́ nataxúxe rü guxü̃guma norü ngúchaü̃maxã tüxna nanaxãmare i diẽru. Rü ngẽma nacüma i mexü̃ rü taguma nüxü̃ narüchau nax naxüaxü̃. Rü taxuca̱xma naxãne erü aixcüma nagu namaxü̃ i ngẽma nüxü̃ yaxuxü̃.

¹⁰ Rü ngẽma chixexü̃ ügüxü̃ rü nanue ega nüxü̃ nadaugügu. Rü norü numaxã nixü̃́xchapütagü. Natürü ngẽma norü ĩnü i ngẽma chixexü̃arü üruü̃gü rü tá nagu nayarüchixe.