Wiyaegü 110 - Tupanaarü Ore

Nüma ya Cori rü ãẽ̱xgacüna pora naxã

¹ Rü nüma ya Tupana rü chorü Corixü̃ ñanagürü: —¡Chorü tügünecüwawa rüto rü ñu̱xmatáta i ngẽma curü uanügü rü curü chicutüxü̃ chayaxĩxẽẽgü! —ñanagürü.

² Rü nüma ya Tupana rü Chióü̃wa cuxü̃ naxuneta nax ãẽ̱xgacü quixĩxü̃ca̱x rü namaxã icucuáxü̃ca̱x i ngẽma curü uanügü.

³ Rü ngẽma ngunexü̃ i curü uanügüxü̃ curüporamaegu rü curü duü̃xü̃gü rü tá cuxme̱xwa nügü nangẽxmagüxẽxẽ. Rü nimexchiruãcüma tá cupe̱xewa nangugü. Rü ngẽma curü pora rü guxü̃gutáma nitachigü ñoma pucü ya guxü̃guma pa̱xmama rüngucürüxü̃.

⁴ Rü nüma ya Tupana rü cuxü̃ naxuneta nax Melquichedéxrüxü̃ guxü̃guma chacherdóte quixĩxü̃. Rü nüma rü taxũtáma inayanaxoxẽxẽ i ngẽma nüxü̃ yaxuxü̃.

⁵ Rü nüma ya Tupana rü curü tügünecüwawa nangẽxma nax cuxü̃ ínapoxü̃xü̃ca̱x. Rü ngẽma ngunexü̃ i nagu nanuxü̃gu rü tá nanadai i muxü̃ma i ãẽ̱xgacügü.

⁶ Rü ngẽma nachixü̃anegüca̱x rü tá poxcu naxuegu. Rü ngẽxma tá nayue i muxũchixü̃ i duü̃xü̃gü. Rü guxü̃wama i ñoma i naanewa rü muxü̃tama i ãẽ̱xgacügü tá ínawoxü̃.

⁷ Natürü nümatama ya Tupana rü ngẽma namacüwawa ngẽxmaxü̃ i natüxacüarü dexáwa tá naxaxe. Rü ngẽma dexá rü tá nayaporaxẽẽchigü.