Wiyaegü 101 - Tupanaarü Ore

Ãẽ̱xgacü ga Dabí rü Tupanamaxã inaxuneta

¹ Pa Cori Pa Tupanax, chorü wiyaemaxã cuxü̃ chicua̱xüxü̃ naxca̱x nax toxü̃ cungechaxü̃xü̃ rü tomaxã mea icucuáxü̃.

² Rü chanaxwa̱xe nax aixcüma mea cuxca̱x chamaxü̃xü̃. ¿Rü ñuxgu tá chauxü̃tawa cuxũ nax choxü̃ curüngü̃xẽẽxü̃ca̱x? Rü ngẽmaãcü i chorü maxü̃ rü aixcüma tá name nape̱xewa i chopatacüã̱xgü.

³ Rü taxũtáma marü naxca̱x íchidau i ta̱xacürü chixexü̃. Rü tama namaxã chataãxẽ i ngẽma duü̃xü̃gü i tama Tupanaga ĩnüexü̃. Rü taxũtáma chanayaxu.

⁴ Rü tá nüxü̃ chaxo i ngẽma ĩnügü i chixexü̃ i chauãẽwa íngugüxü̃. Erü taxuxü̃ma i ta̱xacürü chixexü̃ chaxüxchaü̃.

⁵ Rü tá chayanangea̱xgüxẽxẽ i ngẽma duü̃xü̃gü i namücügüechita chixri tümachiga idexagüxü̃. Rü taxũtáma yáxna namaxã chaxĩnü i ngẽma duü̃xü̃gü i to̱xguã̱xétüwa nügü ügüxẽxẽchaü̃xü̃ rü ngẽma norü poramaxã nügü icua̱xüxü̃güxü̃.

⁶ Rü tá naxca̱x chadau i yatügü i aixcüma mea maxẽxü̃ nax chauxü̃tawa nangẽxmagüxü̃ca̱x rü chorü ngü̃xẽẽruü̃gü yixĩgüxü̃ca̱x.

⁷ Rü ngẽma womüxẽẽwa̱xegüxü̃ rü tá nangechica i chopatawa. Rü taxuxü̃táma idorata̱xáxü̃ chauxü̃tawa nangẽxma.

⁸ Rü wüxichigü i ngunexü̃gu rü tá naxca̱x chadau i guxü̃ma i ngẽma chauchixü̃anewa chixexü̃ ügüxü̃ nax íchanawoxü̃xü̃ca̱x nawa ya daa Cori ya Tupanaarü ĩane.