Wiyaegü 100 - Tupanaarü Ore

Cori ya Tupana rü tüxü̃ nangóexẽxẽ rü noxrü tixĩgü

¹ Pa Duü̃xü̃gü i Ñoma i Naanewa Maxẽxü̃x ¡rü taãxẽãcü naxca̱x pewiyaegü ya Cori ya Tupana!

² ¡Rü taãxẽãcü penataxẽxẽ ya Cori! ¡Rü taãxẽãcü naxca̱x pewiyaegü rü nüxü̃ picua̱xüxü̃gü!

³ ¡Rü nüxna pecua̱xãchie nax nüma ya Cori rü Tupana yixĩxü̃! Rü nüma nixĩ i tüxü̃ nango̱xẽẽxü̃ rü tama yigütama tango̱xẽxẽ. Rü norü duü̃xü̃gü tixĩgü, ñoma carnérugü i norü yoraarü nachitaxü̃wa ngẽxmagüxü̃rüxü̃.

⁴ ¡Rü nua naxü̃tawa pexĩ, rü napatagu pechocu, rü perü wiyaegümaxã nüxü̃ picua̱xüxü̃gü rü moxẽ nüxna pexãgü! ¡Rü nüxü̃ pixu nax aixcüma namexẽchixü̃ i nümax!

⁵ Erü nüma ya Cori rü namecüma rü ngẽma norü ngechaü̃ rü guxü̃guma nangẽxmaecha. Rü ngẽma nax yaxaixcümaxü̃ rü taguma inayacua̱x.