Wiyaegü 1 - Tupanaarü Ore

Taãxẽ i aixcüma ixĩxü̃

¹ Tataãxẽ ya yíxema tama naga ĩnüxe i ngẽma chixexü̃ i duü̃xü̃güarü ucu̱xẽ rü tama nagu ixũxẽ i nacümagü i ngẽma pecadu ügüxü̃, rü tama nanaãẽraxü̃xe i ngẽma duü̃xü̃gü i Tupanagu idaucüraxü̃güxü̃.

² Natürü tümaarü taãxẽ nixĩ nax nagu tamaxü̃xü̃ i Tupanaarü mugü rü guxü̃guma chütacü rü ngunecü ngẽmagu tarüxĩnü.

³ Rü yíxema duü̃xẽ rü ñoma wüxi i nanetü i natücutü toxü̃ i guxü̃guma oxü̃ rü taguma rüñẽ̱xátüxü̃rüxü̃ tixĩ. Rü guxü̃ma i ta̱xacü i taxüxü̃wa rü mea tüxü̃́ ínanguxuchi.

⁴ Natürü ngẽma duü̃xü̃gü i chixexü̃gu maxẽxü̃ rü tama ngẽmaãcü mexü̃ nüxü̃ naxüpetü. Rü ñoma maxẽ i paxü̃ ya buanecü cuenagüxü̃rüxü̃ nixĩgü.

⁵ Rü ngẽmaca̱x i ngẽma duü̃xü̃gü i chixexü̃gu maxẽxü̃ rü ngẽxguma Tupana nüxü̃ icagügu, rü taxumaxãtama nügü ínapoxü̃gü i ngẽxguma poxcu namaxã naxuegugu. Rü ngẽma chixexü̃gu maxẽxü̃ rü tá nangechica natanüwa i ngẽma duü̃xü̃gü i Tupanape̱xewa imexü̃.

⁶ Erü nüma ya Cori ya Tupana rü meama tüxna nadau ya yíxema aixcüma naga ĩnüexe, natürü ngẽma chixexü̃ i duü̃xü̃gü i tama naga ĩnüechaü̃xü̃ rü nagagutama poxcuwa naxĩ.