Ucu̱xẽgüchiga 31 - Tupanaarü Ore

Ãẽ̱xgacü ga Lemuéxarü mamaarü ucu̱xẽgü

¹ Ñaa nixĩ i ucu̱xẽgü ga Macháarü ãẽ̱xgacü ga Lemuéxü̃ namaxã naxucu̱xẽxü̃ ga norü mama:

² Pa Chaunex, cumax rü chowa cubu erü Cori ya Tupana nanangãxü̃ i chorü yumüxẽ. Rü ñaa nixĩ i chorü ucu̱xẽ i cumaxã nüxü̃ chixuxü̃.

³ Tama name i ngexü̃gügu cunaxaiya̱xü̃xü̃ i curü pora, yerü yemagagu nixĩ ga muxü̃ma ga ãẽ̱xgacügü ga chixexü̃gu nayixü̃.

⁴ Pa Lemuéx, tama name i ãẽ̱xgacügü bínu rü ngúxü̃ i a̱xchixü nax yaxaxgüxü̃.

⁵ Erü ngẽxguma nangãxü̱̃xgu rü ngürüãchi tá nüxü̃ narüngüma i nachixü̃anearü mugü, rü ngẽmagagu taxũtáma nüxü̃ narüngü̃xẽxẽ i ngẽma ngearü diẽruã̱xgüxü̃.

^6-7 ¡Nüxü̃ rüxo nax cuyaxaxüxü̃ ya bínu ya ngúcü rü ngúxü̃ i a̱xchixü. Rü nüe yaxaxgüã i ngẽma naechita maxẽxü̃, rü ngẽma ngechaü̃güxü̃ nax ngẽmagu nüxü̃ yanangümaexü̃ca̱x nax nangearü diẽruã̱xgüxü̃ rü ngúxü̃ yangegüxü̃!

⁸ ¡Pa Lemuéx, tümaétüwa idexa ya yíxema duü̃xẽgü ya tüxü̃́ naguxchaxe nax tügüétüwa tidexagüxü̃! ¡Rü tüxü̃ ínapoxü̃ ya yíxema taxucürüwa tügü ípoxü̃xẽ!

⁹ ¡Rü tümaétüwa idexa rü tüxü̃ ínapoxü̃ ya yíxema ngearü diẽruã̱xgüxe, rü yíxema tama nüxü̃ cuáxe nax tügüétüwa tidexagüxü̃!

Ngẽma nge i aixcüma ngĩãẽxü̃ cua̱xcü

¹⁰ Tama natauxcha nax ngĩxü̃ iyarünga̱u̱xü̃ i wüxi i nge i aixcüma ngĩãẽxü̃ cua̱xcü. Ngĩma rü ñoma nutaacügü ya ngã̱xãẽruü̃arü yexera iyixĩ nax namexẽchixü̃.

¹¹ Ngĩte rü aixcümama ngĩxna narüyoe, rü ngĩma rü nüxü̃ irüngüxẽxẽ nax ngẽmaãcü taxuxü̃ma nüxü̃́ taxuxü̃ca̱x.

¹² Ngĩma rü guxü̃ma i ngunexü̃ i naxü̃tawa nax namaxü̃xü̃gu, rü poraãcü inataãẽxẽxẽ ya ngĩte.

¹³ Ngẽma nge i aixcüma ngĩãẽxü̃ cua̱xcü, rü naxca̱x idau ya tünüta ya carnéruta̱xanaxca̱x rü línuchinaxca̱x, nax ngẽmawa namuaxü̃ca̱x i meruü̃gü.

¹⁴ Ngĩma rü ñoma wüxi ya wapuru ya yáxü̃wa ne ũxü̃ne rü õnagü ngéma ngexü̃nerüxü̃ iyixĩ.

¹⁵ Naxü̃pa nax yangóonexü̃ rü marü íirüda rü ixüwemü. Rü ngĩxacügüxü̃ ichibüexẽxẽ rü ngĩxü̃taxü̃gü rü ta inachibüexẽxẽ.

¹⁶ Naxca̱x idau i wüxi i naane rü naxca̱x itaxe. Rü ngẽma diẽru i ngĩxü̃ nanutaque̱xecümaxã rü ngẽxma naanegu inato i úbagü.

¹⁷ Rü ipora rü ngĩrü ngúchaü̃maxã ipuracü.

¹⁸ Ngẽxguma nataxegu rü mea namaxã icua̱x i natanü, rü tama irüngü̃ ñu̱xmata nachüta.

¹⁹ Ngĩma rü ngĩxme̱xmaxã iyadixnüta ya tüxa̱xmü, rü inamu i ngĩxchiru.

²⁰ Rü ngĩma rü guxü̃guma tüxü̃ irüngüxẽxẽ ya yíxema ingearü diẽruã̱xgüxe rü yíxema ta̱xacü tüxü̃́ taxue.

²¹ Taxuca̱xma ixoegaãxẽ ega gáuane ixüxgu, erü guxü̃ma i ngĩxacügü rü nüxü̃́ nangẽxma i norü gáuxü̃chiru.

²² Ngĩmatama inaxü i düxruü̃gü. Rü mexẽchixü̃ i naxpümaxã ixãxchiru.

²³ Ngĩte rü ĩanewa duü̃xü̃gü meama nüxü̃ nacua̱xgü, rü yima ĩanearü ãẽ̱xgacügütanüwa nangẽxma.

²⁴ Ngĩma rü inaxü i naxchiru rü goyexü̃gü. Rü taxetanüxü̃xü̃ namaxã itaxe.

²⁵ Ngĩma rü wüxi i nge i poraãẽcü rü mecü iyixĩ, rü tama naxca̱x ixoegaãxẽ i moxü̃arü ngunexü̃.

²⁶ Ngẽxguma yadexaxgu rü ngĩãẽxü̃ nacuáãcüma iyadexa. Rü nangechaü̃ãcüma duü̃xü̃güxü̃ ingúexẽxẽ.

²⁷ Guxü̃guma ixũãxẽ nax guxü̃ma mea ixũxü̃ca̱x i ngĩpatawa. Rü ngẽma õna i nangṍxü̃ rü ngĩmatama naxca̱x napuracüxü̃ nixĩ.

²⁸ Ngẽma ngĩxacügü rü ngĩte rü ngĩxü̃ nicua̱xüxü̃gü rü ñanagürügü:

²⁹ —Imuxũchi i nge i mecümacü, natürü cuma nixĩ i guxü̃arü yexera cumecümaxü̃ —ñanagürügü.

³⁰ Ngẽxguma napaxgu i wüxi i nge rü imechametü, rü ngẽmaca̱x yatügüaxü̃́ ingúchaü̃, natürü ngẽma ngĩrü pa rü paxaãchimare nixĩ. Natürü ngẽma nge i Tupanaga ĩnücü nixĩ i namexü̃ nax yexera ngĩxü̃ icua̱xüxü̃güxü̃.

³¹ ¡Ngĩxü̃ picua̱xüü̃gü nape̱xewa i guxü̃ma i ĩanecüã̱x, rü ngĩmaxã petaãẽgü naxca̱x i guxü̃ma i ngẽma mexü̃ i naxüxü̃!