Ucu̱xẽgüchiga 20 - Tupanaarü Ore

Ngẽma ngúxü̃ i nacuchíxü, rü duü̃xü̃güxü̃ nanuexẽxẽ

¹ Yimá ngúcü ya bínu rü duü̃xü̃güxü̃ nuxica naxuegaxẽxẽ. Rü ngẽma ngúxü̃ i nacuchíxügü rü duü̃xü̃güxü̃ nanuexẽxẽ. Rü ngẽxguma nangãxegu rü taxúema tümaãẽxü̃ tacuáãcüma tidexa.

² Wüxi ya ãẽ̱xgacü ya nucü, rü ñoma wüxi i leóü̃ i nuxü̃rüxü̃ nixĩ, rü yíxema nachixewexe rü ãũcümaxü̃wa tanangẽxmaxẽxẽ i tümaarü maxü̃.

³ Wüxi ya yatü ya naãẽxü̃ cuácü rü tama nachoxü̃gawa̱xe. Natürü ngẽma yatü i tama naãẽxü̃ cuáxü̃, rü nuca̱x nadau.

⁴ Ngẽma oxü̃ rü tama naxüane i ngẽxguma nawa nanguxgu nax natoexü̃, rü ngẽmaca̱x ngẽxguma nanetüarü buxgüwa nanguxgu, rü taxuxü̃ma i nanetüarü oxü̃ inayangau.

⁵ Ngẽma duü̃xü̃arü ĩnü i cúxü̃, rü ñoma dexá i mátamaxü̃gu yacúxü̃rüxü̃ nixĩ. Natürü ngẽma naãẽxü̃ cuáxü̃ rü nüxü̃ inayangauama i ngẽma norü ĩnü i ngẽma duü̃xü̃.

⁶ Nangexma i muxü̃ma i duü̃xü̃gü i nügü ixugüxü̃ nax mexü̃gü yixĩgüxü̃, natürü bai i wüxi ingẽxmaxü̃ i nüxna rüyoexü̃.

⁷ Tupanape̱xewa tame ya yíxema ngearü chixexü̃ã́xe. Rü ngẽma tümaxacügü i tümacümagu ĩxü̃ rü nataãẽgü.

⁸ Yimá ãẽ̱xgacü rü ngẽxguma norü tochicaxü̃wa nato̱xgu nax guxchaxü̃ namexẽẽxü̃ca̱x, rü wüxi i norü dawenümaxãtama nüxü̃ nacua̱x i ta̱xacürü chixexü̃ nangẽxmaxü̃.

⁹ Taxucürüwa texé tügü tixu rü ñatagürü: —Chorü maxü̃ rü aixcüma name rü changearü pecaduã̱x —ñatagürü.

¹⁰ Cori ya Tupana rü naxchi naxai i ngẽma yáruü̃gü i tama aixcüma ngugügu yaxü̃ rü ngẽma ngugüruü̃gü i tama mea ããcuxü̃.

¹¹ Wüxi ya ngextü̱xücü rü nacüma i mexü̃wa nixĩ i nüxü̃ icuáxü̃ nax aixcüma wüxi ya ngextü̱xücü ya mecü nax yixĩxü̃.

¹² Nüma ya Cori ya Tupana, rü tüxna nanaxã i taxmachixẽ nax nüxü̃ ixĩnüxü̃ca̱x, rü tüxna nanaxã ya taxetü nax nüxü̃ idauxü̃ca̱x.

¹³ ¡Taxṹ i cugü cuxoxẽxẽxü̃ rü cupeechaxü̃, erü ngẽxguma ngẽmaãcü quixĩxgu rü tá cungearü diẽruã̱x! Name nixĩ nax ícudauxü̃, rü ngẽxguma rü tagutáma nataxu i curü õna.

¹⁴ Ngẽma naxca̱x taxexü̃ i curü ngẽmaxü̃, rü ñanagürü: —Ñaa curü ngẽmaxü̃, rü tama aixcüma name —ñanagürü, natürü ngẽxguma marü naxca̱x nataxegu, rü nügütama nicua̱xüxü̃ naxca̱x i ngẽma naxüxü̃.

¹⁵ Guxü̃ma i úiru rü meruü̃gü i ñoma i naanewa ngẽxmaxü̃arü yexera name ya yimá yatü ya cua̱xmaxã idexacü.

¹⁶ Cuma nax diẽru ngĩxü̃ cuxãxü̃ nüxna i wüxi i duü̃xü̃ i tama nüxü̃ cucuáxü̃, rü name i nüxna cunayaxu i wüxi i naxchiru i ngẽma nüxü̃ rüngü̃xẽẽxü̃. Rü cuxme̱xwa tá nangẽxma i ngẽma naxchiru ñu̱xmata ngĩxü̃ natáeguxẽxẽ i ngẽma diẽru.

¹⁷ Yíxema nagu ãcümaxẽ nax womüxẽẽãcü tanayaxuxü̃ i paũ, rü nawena i ngẽma paũ rü tümaã̱xwa rü ñoma waixü̃mürüxü̃ tá nixĩ.

¹⁸ Ngẽxguma ta̱xacü cuxüxchaü̃gu, rü name i toguxena ucu̱xẽca̱x cuca, nax mea ínanguxuchixü̃ca̱x i ngẽma nagu curüxĩnüxü̃. Rü ngẽxguma daiwa cuxũxchaü̃gu, rü name i mea cunangugü nax ñuxãcü tá naxca̱x ícuyaxüãchixü̃ i ngẽma curü uanü.

¹⁹ Ngẽma oregüta̱xáxü̃, rü tama nüxicatama nüxna nadau i ngẽma ore i tama mexü̃ nax guxã nüxü̃ cuáxü̃. Rü ngẽmaca̱x tama name i namaxã cuxãmücü i ngẽma oregüta̱xáxü̃.

²⁰ Yíxema tümanatümaxã rü tümaémaxã chixexü̃ ixugüxe, rü tá tayu rü ẽanexü̃wa tá tangexma.

²¹ Guxü̃ma i ngẽma tauxchaãcü iyaxuxü̃, rü yixcüra rü tama aixcüma wüxi i taãxẽ tüxna naxã.

²² Ngẽxguma chi texé ta̱xacürü chixexü̃ cuxcha̱xwa uxgu, rü tama name i nüxü̃ quixu nax cugütátama cuxütanüxü̃. Rü name nixĩ i nüxü̃́ cuyaxõ ya Cori ya Tupana, erü nüma tá nixĩ i cuxü̃ naxütanüxü̃.

²³ Nüma ya Cori ya Tupana, rü tama tümamaxã nataãxẽ ya yíxema yáruü̃netamaxã puracüxe. Rü tama norü me nixĩ i ngẽma yáruü̃gü i tama aixcüma ngugügu yaxü̃.

²⁴ Nüma ya Cori ya Tupana nixĩ i duü̃xü̃arü maxü̃maxã inacuáxü̃. Taxúema nüxü̃ tacua̱x nax ta̱xacü tá yixcüra tüxü̃ ngupetüxü̃.

²⁵ Wüxi i ãũcümaxü̃ nixĩ nax texé Tupanamaxã ixunetaxü̃, ega yixcaama tanaxüchicüügu i tümaarü uneta.

²⁶ Ngẽma ãẽ̱xgacü i naãẽxü̃ cuáxü̃, rü nügüna nayaxĩgachixẽxẽ i ngẽma duü̃xü̃gü i chixexü̃gu maxẽxü̃, rü noxtacüma inayanaxoxẽxẽ.

²⁷ Ngẽma naãxẽ ya Tupana wüxichigü i duü̃xü̃na ãxü̃, rü guxü̃ma i norü maxü̃gu nabáxi.

²⁸ Wüxi i ãẽ̱xgacü rü guxü̃gutáma ãẽ̱xgacü nixĩ ega aixcüma norü duü̃xü̃güxü̃ nangechaü̃gu rü mea namaxã inacua̱xgu.

²⁹ Ngextü̱xücügü rü norü poramaxã nügü nicua̱xüü̃gü. Rü yaxguã̱xgü, rü norü puxyaegagu duü̃xü̃gü nüxü̃ nangechaü̃gü.

³⁰ Ngẽma chixexü̃ i nacüma rü cuaxi i nawa rüpíxü̃maxã inarüwe̱xãchi. Rü ngẽma cua̱xi rü naxca̱x nayataanexẽxẽ i norü maxü̃.