Ucu̱xẽgüchiga 12 - Tupanaarü Ore

¹ Yíxema nayaxúxe i ucu̱xẽ rü cua̱x tüxü̃́ nangẽxma, natürü yíxema tama nayaxúxe i ucu̱xẽ rü tama tümaãẽxü̃ tacua̱x.

² Yimá yatü ya mecümacü, rü Tupana rü namaxã nataãxẽ, natürü yimá yatü ya idorata̱xácü, rü Tupana poxcu namaxã naxuegu.

³ Ngẽma chixexü̃ i nacüma, rü taxúeãxü̃ma name, natürü ngẽma duü̃xü̃gü i mexü̃ i nacümagu ĩxü̃, rü nimuetanü rü taguma inayarüxo.

⁴ Ngẽma mecümacü i nge, rü ngĩtexü̃ itaãẽxẽxẽ rü nüxü̃ iyacua̱xüxü̃, natürü ngẽma ngexü̃ i chixecümaxü̃, rü tama natexü̃ nataãẽxẽxẽ rü nanachixeãxẽ.

⁵ Ngẽma yatügü i mexü̃gu maxẽxü̃ rü mexü̃ i nacümagu narüxĩnüe, natürü ngẽma chixexü̃gu maxẽxü̃, rü womüxẽẽguxicatama narüxĩnüe.

⁶ Rü ngẽma norü ore i ngẽma duü̃xü̃ i chixexü̃gu maxü̃xü̃ rü yuwa nanaga, natürü ngẽma norü ore ya yimá yatü ya mexü̃gu rüxĩnücü rü maxü̃wa nanaga.

⁷ Ngẽma duü̃xü̃gü i chixexü̃gu maxẽxü̃, rü ngẽma norü chixexü̃gagu ngẽxma narüxo, natürü ngẽma duü̃xü̃gü i mexü̃gu maxẽxü̃, rü nimuetanü rü taguma inayarüxo.

⁸ Yimá yatü ya mea naãẽxü̃ cuácü, rü duü̃xü̃gü nüxü̃ nicua̱xüü̃gü naxca̱x i norü cua̱x. Natürü ngẽma yatü i tama naãẽxü̃ cuáxü̃, rü duü̃xü̃gü nüxü̃ naxoe.

⁹ Taxuwama name nax cuxü̃ yacua̱xüü̃güxü̃ i duü̃xü̃gü ega cuxü̃́ nataxu̱xgu i curü õna. Narümemae nixĩ nax taxúema cuxü̃ icua̱xüxü̃güxü̃ ega cuxü̃́ nangẽxmagu i curü õna.

¹⁰ Yimá yatü ya mexü̃gu rüxĩnücü, rü mea nüxna nadau i naxü̃nagü. Natürü ngẽma yatü i chixexü̃gu maxü̃xü̃, rü tama nüxü̃́ nangechaü̃tümüxü̃.

¹¹ Yíxema tümaanewa puracüxe rü taguma tangebü, natürü ngẽma taxuwama mexü̃gu rüxĩnüxü̃, rü tama naãẽxü̃ nacua̱x.

¹² Ngẽma ngĩ́ta̱xáxü̃ rü nüxü̃́ nangúchaü̃ i ngẽma namücü naxca̱x ngĩ́xü̃, rü ngẽmaca̱x nügümaxã nanue, natürü ngẽma duü̃xü̃gü i mexü̃gu maxẽxü̃, rü nimuetanü rü taguma inayarüxo.

¹³ Ngẽma duü̃xü̃ i chixexü̃gu maxü̃xü̃ rü norü doragutama nangu, natürü yimá yatü ya mexü̃gu rüxĩnücü, rü ngẽxguma guxchaxü̃ naxca̱x ínguxgu, rü na̱xcha̱xwa nixũgachi.

¹⁴ Wüxichigü rü nanayauxtanü i ngẽma ore i nüxü̃ yaxuxü̃, rü nanayauxtanü i ngẽma naxüxü̃.

¹⁵ Ngẽma duü̃xü̃ i tama naãẽxü̃ cuáxü̃, rü guxü̃ma i ngẽma nagu naxĩnüxü̃ rü ngẽma naxüxü̃ rü naxca̱x rü name. Natürü ngẽma duü̃xü̃ i naãẽxü̃ cuáxü̃, rü nanayaxu i ucu̱xẽgü.

Nacüma i mexü̃chiga rü nacüma i chixexü̃chiga

¹⁶ Ngẽma duü̃xü̃ i tama naãẽxü̃ cuáxü̃ rü nanuãchiwa̱xe, natürü ngẽma duü̃xü̃ i naãẽxü̃ cuáxü̃, rü nüxü̃́ nanataxuraxü̃mare ega woo texé chixri nachiga idexagu.

¹⁷ Yimá yatü ya poxü̃ruxü̃ ya aixcüma mecü, rü ãẽ̱xgacüpe̱xewa ore i aixcümaxü̃ nixu, natürü ngẽma poxü̃ruxü̃ i dorata̱xáxü̃ rü doraxü̃ nixu.

¹⁸ Nangexma i duü̃xü̃gü i norü dexamaxã ngúxü̃ tüxü̃ ingexẽẽxü̃, natürü ngẽma duü̃xü̃ i aixcüma nüxü̃ cuáxü̃, rü norü dexamaxã tüxü̃ nataãẽxẽxẽ.

¹⁹ Yíxema ore i aixcümaxü̃ ixuxe, rü ngẽma tümaarü ore rü taguma inarüxo. Natürü ngẽma doraxü̃ ixuxü̃, rü ngẽma norü ore, rü paxa tá inarüxo.

²⁰ Ngẽma duü̃xü̃gü i chixexü̃gu maxẽxü̃, rü norü ĩnüwa nangẽxma i doramare, natürü ngẽma yatü i mexü̃gu rüxĩnüxü̃arü ucu̱xẽwa, rü nangẽxma i taãxẽ.

²¹ Yimá yatü ya mexü̃gu maxü̃cü, rü taxũtáma guxchaxü̃gü naxca̱x ínangu, natürü ngẽma yatü i chixexü̃gu maxü̃xü̃, rü muxü̃ma i chixexü̃ tá naxca̱x ínangu.

²² Nüma ya Cori ya Tupana, rü naxchi naxai i ngẽma idorata̱a̱xgüxü̃, natürü tümamaxã nataãxẽ ya yíxema aixcümaxü̃ ixugüxe.

²³ Ngẽma duü̃xü̃ i naãẽxü̃ cuáxü̃, rü tama nügü nicua̱xüxü̃ namaxã i norü cua̱x, natürü ngẽma duü̃xü̃ i naechita maxü̃xü̃, rü nanango̱xẽxẽ nax tama naãẽxü̃ nacuáxü̃.

²⁴ Yíxema puracüxe, rü tá duü̃xü̃gümaxã itacua̱x, natürü ngẽma oxü̃, rü togü tá namaxã inacua̱x.

²⁵ Ngẽma ĩ̱xãchiãxẽ i yatüca̱x ínguxü̃, rü nanamaãchixẽxẽ, natürü ngẽma ore i mexü̃ rü nanataãẽxẽxẽ.

²⁶ Yimá yatü ya mea maxü̃cü rü mexü̃wa nanaga i namücü, natürü ngẽma chixexü̃gu maxẽxü̃, rü chixexü̃wa nanaga i namücügü.

²⁷ Ngẽma cueneecü i oxü̃, rü tama nüxü̃ inayangau i naeü̃. Natürü yimá aixcüma puracüta̱xácü, rü nüxü̃́ nangẽxma i norü ngẽmaxü̃gü.

²⁸ Ngẽma mexü̃ i nacümagü, rü maxü̃wa tüxü̃ naga, natürü ngẽma chixexü̃ i nacümagü, rü yuwa tüxü̃ naga.