Yema Cuáü̃ nüxü̃ dauxü̃ i yixcüra tá ngupetüxü̃chiga 16 - Tupanaarü Ore

Yema 7 ga copugü ga Tupanaarü numaxã ixããcuxü̃

¹ Rü ñu̱xũchi nüxü̃ chaxĩnü ga wüxi ga naga ga tagaãcü gumá Tupanapata ga taxü̃newa inaxũxü̃ ga ñaxü̃ nüxü̃ ga yema 7 ga orearü ngeruü̃gü: “¡Ngéma pexĩ, rü naaneétügu peyabagüãcu i ngẽma 7 i copugü i Tupanaarü numaxã ixããcuxü̃!” ñanagürü.

² Rü yéma naxũ ga Tupanaarü orearü ngeruxü̃ ga nape̱xewa üxü̃, rü naaneétügu nayabaãcu ga norü copu. Rü guxü̃ma ga duü̃xü̃gü ga yema ngo̱xoégamaxã ixãégaxü̃ rü yema ngo̱xochicüna̱xãxü̃ icua̱xüü̃güxü̃, rü nawa inayarügogü ga taixna ga ngu̱xuchixü̃ ga taguma ixẽxü̃.

³ Rü yema norü taxre ga orearü ngeruxü̃, rü márétügu nayabaãcu ga norü copu. Rü nagüxü̃ nananguxuchi ga dexá, rü gumá nagü rü ñoma wüxi i duü̃xü̃ i imáxü̃gürüxü̃ nixĩ ga dexá. Rü guxü̃ma ga ta̱xacü ga márwa maxẽxü̃ rü nayue.

⁴ Rü yema norü tomaepü̱x ga orearü ngeruxü̃ rü natügüétügu rü natüxacügüétügu nayabaãcu ga norü copu. Rü guxü̃ma ga yema natügü rü natüxacügü, rü nagüxü̃ nanaca̱xichi.

⁵ Rü ñu̱xũchi nüxü̃ chaxĩnü ga yema Tupanaarü orearü ngeruxü̃ ga guxü̃ma ga dexámaxã icuáxü̃ ga ñaxü̃: “Pa Torü Cori ya Tupana ya Üünecü ya Woetama Yexmaechacü rü Ñu̱xma Ngẽxmaechacüx, cuma rü wüxi i mexü̃ cuxü nax ngẽmaãcü dexá nagüxü̃ cunaca̱xichixẽẽxü̃ na̱xcha̱xwa i ngẽma duü̃xü̃gü.

⁶ Yerü nümagü rü nanadai ga curü duü̃xü̃gü rü curü orearü uruü̃gü, rü inanaba ga nagü. Rü ñu̱xma i cuma rü wüxi i mexü̃ nixĩ i cuxüxü̃ nax ngẽma dexá nagüxü̃ cunaca̱xichixẽẽxü̃ nax nawa naxaxegüxü̃ca̱x i ngẽma duü̃xü̃gü i chixexü̃ ügüxü̃. Erü ngẽma nixĩ i norü natanü naxca̱x nax curü duü̃xü̃güxü̃ nada̱i̱xü̃ rü nagüxü̃ nabaxẽxẽxü̃”, ñanagürü.

⁷ Rü nüxü̃ chaxĩnü ga wüxi ga naga ga yema ãmarearü guruü̃wa ínaxũxü̃ ga ñaxü̃: “Ngü̃, Pa Cori ya Tupana ya Guxü̃étüwa Ngẽxmaxex, aixcüma nixĩ i namexü̃ i ngẽma nagu curüxĩnüxü̃ rü ngẽma cuxüxü̃”, ñaxü̃.

⁸ Rü yema norü ãgümücü ga orearü ngeruxü̃ rü üa̱xcüétügu nayabaãcu ga norü copu. Rü yemaacü poraãcü nananaiemaxẽxẽ ga üa̱xcü nax yema norü naiemaxü̃maxã ínaguãxü̃ca̱x ga duü̃xü̃gü.

⁹ Rü guxü̃ma ga duü̃xü̃gü rü poraãcü nüxü̃́ nangu̱xema, natürü tama nüxü̃ narüxoe ga nacüma ga chixexü̃ rü tama Tupanaxü̃ nicua̱xüü̃gü. Rü naguxchigagüama namaxã ga Tupana ya guxü̃ma i ngẽma poxcuruü̃maxã icuácü.

¹⁰ Rü yema norü wüxime̱e̱xpü̱x ga orearü ngeruxü̃, rü yema ngo̱xoarü tochicaxü̃étügu nayabaãcu ga norü copu. Rü guxü̃wama ga ngextá ãẽ̱xgacü íyixĩxü̃wa ga yema ngo̱xo, rü naxẽane. Rü yema nax poraãcü nüxü̃́ nangúxü̃ ga duü̃xü̃gü, rü nügü nangóorü conüã̱xgü.

¹¹ Natürü woo yemaacü nüxü̃ nax nangupetüxü̃ ga duü̃xü̃gü, rü tama nüxü̃ narüxoechaü̃ ga yema chixexü̃ ga naxügüxü̃. Rü yema nax poraãcü nüxü̃́ nangúxü̃ ga norü taixnagü, rü naguxchigagüama namaxã ga Tupana ya daxũgucü.

¹² Rü yema norü 6 ga orearü ngeruxü̃, rü yema taxtü ga Eufráteétügu nayabaãcu ga norü copu. Rü inayache ga yema taxtü nax wüxi ga nama nax yixĩxü̃ca̱x naxca̱x ga yema nachixü̃anegüarü ãẽ̱xgacügü ga éstewa ne ĩxü̃.

¹³ Rü nüxü̃ chadau rü yema coyaa̱xwa, rü yema nüxíraxü̃xü̃ ga ngo̱xoã̱xwa, rü yema orearü uruü̃netaa̱xwa, rü ínaxũxũ ga tomaepü̱x ga naãxẽgü ga chixexü̃ ga ñoma curururüxü̃ ixĩgüxü̃.

¹⁴ Rü yema ngo̱xoãxẽgü nixĩ ga naxügüxü̃ ga taxü̃ ga cua̱xruü̃gü. Rü ínachoxü̃ nax nangutaque̱xexẽẽgüãxü̃ca̱x i guxü̃ma i ñoma i naanewa ngẽxmagüxü̃ i nachixü̃anegüarü ãẽ̱xgacügü nax Tupana ya Guxü̃étüwa Ngẽxmacümaxã nügü nada̱i̱xü̃ca̱x nagu i ngẽma ngunexü̃ ya Tupana nüxü̃ unetaxü̃.

¹⁵ Rü pexuãẽgü erü tórü Cori ya Ngechuchu ya Cristu rü ñanagürü: “Choma rü ngürüãchi taxúetama choxü̃ ínanguxẽẽyane íchangu, ñoma wüxi i ngĩ́ta̱xáxü̃ ínguxü̃rüxü̃. Rü tataãxẽ ya yíxema ímemarexe rü ãxchiruxe nax ngẽmaãcü tama taxãneexü̃ca̱x i ngẽxguma íchanguxgu”, ñanagürü.

¹⁶ Rü yema ngo̱xoãẽgü, rü nanangutaque̱xexẽxẽ ga guxü̃ma ga ñoma ga naanewa yexmagüxü̃ ga nachixü̃anecüã̱xgüarü ãẽ̱xgacügü. Rü yema nachica ga nawa nangutaque̱xegüxü̃, rü Armaguedóü̃ nixĩ i naéga i Yudíugügawa.

¹⁷ Rü yema norü 7 ga orearü ngeruxü̃, rü buanecügumare nayabaãcu ga norü copu. Rü guma Tupanapata ya daxũguxü̃ i naanewa ngẽxmanewa inanaxũ ga wüxi ga naga ga tagaxü̃ ga yema Tupanaarü tochicaxü̃wa inaxũxü̃ ga ñaxü̃: “Marü ningu i ngẽma 7 i poxcu”, ñaxü̃.

¹⁸ Rü ñu̱xũchi naxãẽmacüane, rü poraãcü nicuxcuane, rü poraãcü nidu̱xruane. Rü poraãcü naxĩã̱xãchiane. Rü noxri Tupana duü̃xü̃güxü̃ üxgumama rü taguma nayexma ga wüxi ga ĩã̱xãchiane ga yemarüxü̃ poraxü̃.

¹⁹ Rü guma ĩane ga taxü̃ne ga Babirónia, rü tomaepü̱xgu ningüxyeane. Rü guma ĩanegü ga ñoma ga naanewa yexmagüne rü niwa̱xgü ga norü ĩgü. Rü Tupana rü norü chixexü̃ca̱x nüxna nacua̱xãchi ga guma ĩane ga Babirónia. Rü yemaca̱x norü numaxã poraãcü nanapoxcu ga guma ĩane, yerü poraãcüxüchi namaxã nanu.

²⁰ Rü guxü̃ma ga capaxũgü rü guxü̃nema ga ma̱xpǘnegü, rü inayarüxogü.

²¹ Rü daxũwa narüyi ga gáuxü̃ ga itapütaxü̃, rü duü̃xü̃güétügu nayi. Rü wüxipütachigü ga yema gáuxü̃, rü 40 ga quírugu nixĩ ga nayaxü̃. Rü ga duü̃xü̃gü rü Tupanamaxã naguxchigagü nagagu ga yema poxcuruxü̃ ga gáuxü̃, yerü poraãcü nüxü̃́ nangu̱x ga yema poxcu ga Tupana namaxã napoxcuexü̃.