Neemía 3 - Tupanaarü Ore

Nanamexẽxẽgü ga ĩanearü poxeguxü̃

¹ Rü nüma ga chacherdóte ga Eriachí rü ñu̱xũchi yema namücügü ga chacherdótegü nixĩ ga namexẽẽgüxü̃ ga yema ĩã̱x ga Carnérugügu ãégaxü̃. Rü nanaxü ga naachina̱xãgü rü ñu̱xũchi nananucu ga norü ĩã̱xgü. Rü ñu̱xũchi yema 100arü Daxũtaechicawa inanaxügüe nax namexẽẽgüaxü̃́ ga yema naxtapü̱x rü ñu̱xmata yema Ananéarü Daxũtaechicagu yacuáx.

² Rü yema norü to ga naxtapü̱xarü üye rü Yericúcüã̱xgü nixĩ ga namexẽẽgüxü̃. Rü yema norü to ga naxtapü̱xarü üye rü Chacúx ga Imrí nane nixĩ ga namexẽẽxü̃.

³ Rü yema Chenaátanüxü̃ nixĩ ga namexẽẽgüxü̃ ga yema ĩã̱x ga Choxnigügu ãégaxü̃. Rü nanaxü ga naachina̱xãgü rü ñu̱xũchi nananucu ga norü ĩã̱xgü namaxã ga norü wãtaruü̃gü rü norü tairuü̃gü.

⁴ Rü yema norü to ga naxtapü̱xarü üye rü Meremóx ga Uría nane ga Cóx nataxa nixĩ ga namexẽẽxü̃. Rü yema norü to ga naxtapü̱xarü üye rü Mechuráü̃ ga Berequía nane ga Mechechabé nataxa nixĩ ga namexẽẽxü̃. Rü yema norü to ga naxtapü̱xarü üye rü Chadóx ga Baaná nane nixĩ ga namexẽẽxü̃.

⁵ Rü yema norü to ga naxtapü̱xarü üye rü Tecóacüã̱xgü nixĩ ga namexẽẽgüxü̃ woo ga yema guma ĩanewa tachigagüxü̃ rü tama nüxü̃ narüngü̃xẽẽgüchaü̃ ga yema puracümaxã icua̱xgüxü̃.

⁶ Rü Yoadá ga Pachéa nane, rü Mechuráü̃ ga Bechodía nane nixĩ ga namexẽẽgüxü̃ ga yema ĩã̱x ga Yechanágu ãégaxü̃. Rü nanaxü ga naachina̱xãgü rü ñu̱xũchi nananucu ga norü ĩã̱xgü namaxã ga norü wãtaruü̃gü rü norü tairuü̃gü.

⁷ Rü yema norü to ga naxtapü̱xarü üye rü Meratía ga Gabaóü̃cüã̱x, rü Yadóü̃ ga Merunúcüã̱x nixĩ ga namexẽẽgüxü̃ tümamaxã ga guxema duü̃xẽgü ga Gabaóü̃cüã̱xgü rü Mispácüã̱xgü ga ãẽ̱xgacü ga Eufrátearü oéstewa yexmaxü̃me̱xẽwa yexmagüxe.

⁸ Rü yema norü to ga naxtapü̱xarü üye rü Uchié ga Araía nane ga úiruwa puracüxü̃ nixĩ ga namexẽẽxü̃. Rü yema norü to ga naxtapü̱xarü üye rü Ananía ga pumaraarü üxü̃ cuáxü̃ nixĩ ga namexẽẽxü̃. Rü yema taxre nixĩ ga namexẽẽgüxü̃ ga yema Yerucharéü̃arü poxeguxü̃tápü̱x rü ñu̱xmata yema naxtapü̱x ga ínatatachinüxü̃wa nangu.

⁹ Rü yema norü to ga naxtapü̱xarü üye rü Refaía ga Úru nane nixĩ ga namexẽẽxü̃. Rü nüma ga Refaía nixĩ ga ĩane ga Yerucharéü̃arü ngãxü̃maxã inacuáxü̃.

¹⁰ Rü yema norü to ga naxtapü̱xarü üye rü Yedaía ga Arumáx nane nixĩ ga namexẽẽxü̃ yerü napataarü to̱xma̱xtawa nayexma. Rü yema norü to ga naxtapü̱xarü üye rü Atú ga Achaxnía nane nixĩ ga namexẽẽxü̃.

¹¹ Rü yema norü to ga naxtapü̱xarü üye rü Maquía ga Aríü̃ nane, rü Achúx ga Paxá-moá nane nixĩ ga namexẽẽgüxü̃. Rü ñu̱xũchi nayamexẽẽgü ga yema daxũtaechica ga Órnogu ãégaxü̃.

¹² Rü yema norü to ga naxtapü̱xarü üye rü Charúü̃ ga Aroé nane nixĩ ga namexẽẽxü̃. Rü nüma ga Charúü̃ nixĩ ga yema to ga ngãxü̃ ga Yerucharéü̃arü ĩanemaxã inacuáxü̃. Rü naxacügü iyixĩ ga nüxü̃ rüngü̃xẽẽgücü.

¹³ Rü yema norü ĩã̱x ga Ngategu ãégaxü̃ rü Anúü̃ rü ñu̱xũchi yema Chanóacüã̱xgü nixĩ ga namexẽẽgüxü̃. Rü wena nanamexẽẽgü rü nananucu ga norü ĩã̱xgü namaxã ga norü wãtaruü̃gü rü norü tairuü̃gü. Rü 450 metru nagúxü̃ namexẽẽgü ga yema naxtapü̱x rü ñu̱xmata nawa nangu ga yema ĩã̱x ga Guxchiregu ãégaxü̃.

¹⁴ Rü Maquía ga Recáx nane nixĩ ga Bex-aqueréü̃arü ĩanemaxã icuáxü̃. Rü nüma nixĩ ga wena namexẽẽãxü̃ ga yema ĩã̱x ga Guxchiregu ãégaxü̃. Rü nananucu ga norü ĩã̱xgü namaxã ga norü wãtaruü̃gü rü norü tairuü̃gü.

¹⁵ Rü Charúü̃ ga Coroché nane ga Mispáanemaxã icuáxü̃ nixĩ ga yamexẽẽxü̃ ga yema ĩã̱x ga Dexáarü Chuxchuxü̃gu ãégaxü̃. Rü nanaxüpataétü ga yema ĩã̱x rü ñu̱xũchi nananucu ga norü ĩã̱xgü namaxã ga norü wãtaruü̃gü rü norü tairuü̃gü. Rü ñu̱xũchi nanamexẽxẽ ta ga yema Chiloéarü Dexápataxü̃arü naxtapü̱x ga Ãẽ̱xgacüarü Putüranecüwaama daxü̃ rü ñu̱xmata guma toxṍõnegü ga Dabíarü Ĩanewa rüdaenewa nangu.

¹⁶ Rü Neemía ga Abúx nane nixĩ ga ĩane ga Bex-chúarü ngãxü̃maxã icuáxü̃. Rü nüma nixĩ ga namexẽẽãxü̃ ga yema naxtapü̱xarü üye ga Dabíchique̱xewa ixügüxü̃ rü ñu̱xmata yema dexápataxü̃wa nangu rü guma churaragüpatawa nangu.

¹⁷ Rü yema norü to ga naxtapü̱xarü üye rü Lebítanüxü̃ nixĩ ga namexẽẽgüxü̃. Rü Reúü̃ ga Baní nane nixĩ ga namaxã icuáxü̃. Rü Achabía ga ngãxü̃ ga Queiráarü naanemaxã icuáxü̃ nixĩ ga norü naaneégagu namexẽẽxü̃ ga yema üye ga yexma idaxü̃.

¹⁸ Rü yema norü to ga naxtapü̱xarü üye rü Babái ga Enadáx nane nixĩ ga namexẽẽxü̃. Rü nüma nixĩ ga yema to ga ngãxü̃ ga Queiráarü naanemaxã inacuáxü̃ ga Yerucharéü̃wa.

¹⁹ Rü Éche ga Yochué nane nanamexẽxẽ ga yema to ga naxtapü̱xarü üye ga naxnegüpataxü̃arü nama ídaãchixü̃arü to̱xma̱xtawa ixügüxü̃ rü ñu̱xmata yema naxtapü̱x ínapoõchixü̃wa nangu.

²⁰ Rü Barúx ga Chabái nane rü yema naxtapü̱x ínapoõchixü̃wa inaxügü nax namexẽẽãxü̃ rü ñu̱xmata chacherdótearü ãẽ̱xgacü ga Eriachíarü ĩã̱xarü to̱xma̱xtawa nangu.

²¹ Rü yema norü to ga naxtapü̱xarü üye rü Meremóx ga Uría nane ga Cóx nataxa nixĩ ga namexẽẽxü̃. Rü Eriachíarü ĩã̱xarü to̱xma̱xtawa inaxügü ga nax namexẽẽãxü̃ ñu̱xmata guma chacherdótepata iyacuáxü̃wa nangu.

²² Rü yema norü to ga naxtapü̱xarü üye rü yema chacherdótegü ga Yudáü̃arü doxonexü̃wa maxẽxü̃ nixĩ ga namexẽẽgüxü̃.

²³ Rü nawena ga norü üye ga chacherdótegü naxügüxü̃ rü Bẽyamíü̃ rü Achúx nixĩ ga namexẽẽgüxü̃ ga yema naxtapü̱xarü üye ga napatagüarü to̱xma̱xtawa üxü̃. Rü nawena rü Acharía ga Maachía nane ga Ananía nataxa nixĩ ga namexẽẽxü̃ ga yema naxtapü̱xarü üye ga napataxü̃tawa yexmaxü̃.

²⁴ Rü yema norü to ga naxtapü̱xarü üye rü Binuí ga Enadáx nane nixĩ ga namexẽẽxü̃. Rü Acharíapataarü to̱xma̱xtawa inanaxügü rü ñu̱xmata naxtapü̱x ínapoxü̃wa nangu.

²⁵ Rü nawena rü Pará ga Uchái nane nixĩ ga namexẽẽxü̃ ga yema naxtapü̱xarü üye ga ínapoxü̃wa yexmaxü̃, norü to̱xma̱xtawa ga yema dauxü̃taechica ga máchanexü̃ ga ãẽ̱xgacüpatawa rütoxü̃ ga poxcupataxü̃a̱xtüwa. Rü yemawena rü Pedaía ga Paró nane nixĩ ga namexẽẽxü̃ ga yema naxtapü̱xarü üye ga yéama daxü̃.

²⁶ Rü yema Tupanapata ga taxü̃nearü puracütanüxü̃ ga ma̱xpǘne ga Ófegu ãchiü̃güxü̃ nixĩ ga namexẽẽgüxü̃ ga yema naxtapü̱xarü üye rü ñu̱xmata yema ĩã̱x ga Dexágu ãégaxü̃arü to̱xma̱xtawa nangu ga éstewaama. Rü yexgumarüxü̃ ta nanamexẽẽgü ga yema dauxü̃taechica ga yéma yexmaxü̃.

²⁷ Rü yema Tecóacüã̱xgü nixĩ ga namexẽẽgüxü̃ ga yema naxtapü̱xarü üye ga dauxü̃taechica ga taxü̃ írütoxü̃arü to̱xma̱xtawa ixügüxü̃ rü ñu̱xmata yema Ófearü naxtapü̱xwa nangu.

²⁸ Rü wüxichigü ga chacherdóte rü nanamexẽxẽ ga yema naxtapü̱xarü üye ga napataarü to̱xma̱xtawa yexmaxü̃ rü ñu̱xmata nawa nangu ga yema ĩã̱x ga Cowarugügu ãégaxü̃.

²⁹ Rü yemagüwena rü Chadóx ga Imé nane nixĩ ga namexẽẽxü̃ ga yema naxtapü̱xarü üye ga napataarü to̱xma̱xtawa yexmaxü̃. Rü yema naxtapü̱xarü üye ga idaxü̃ rü Chemaía ga Checanía nane nixĩ ga namexẽẽxü̃. Rü nüma ga Chemaía rü yema Éstegu ãégaxü̃ ga ĩã̱xarü dauruxü̃ nixĩ.

³⁰ Rü yemagüwena rü Ananía ga Cheremía nane rü ñu̱xũchi Anúü̃ ga norü 6 wa üxü̃ ga Chára nane nixĩ ga namexẽẽgüxü̃ ga yema naxtapü̱xarü üye ga idaxü̃. Rü yemagüwena rü Mechuráü̃ ga Berequía nane nixĩ ga namexẽẽxü̃ ga yema naxtapü̱xarü üye ga napataarü to̱xma̱xtawa yexmaxü̃.

³¹ Rü Maquía ga úiruwa puracüxü̃ nixĩ ga namexẽẽxü̃ ga yema naxtapü̱xarü üye ga Mechuráü̃pataarü to̱xma̱xtawa ixügüxü̃ rü ñu̱xmata guma Tupanapata ga taxü̃newa puracüexü̃patawa rü taxetanüxü̃patawa rü daxũtaepataü̃arü ĩã̱xarü to̱xma̱xtawa nangu. Rü yéma rü inida rü ñu̱xmata yema naxtapü̱x ínapoxü̃wa yexmane ga dauxü̃taechicawa nangu.

³² Rü yema úiruwa puracüexü̃ rü yema taxetanüxü̃ nixĩ ga namexẽẽgüxü̃ ga naxtapü̱xarü üye ga ínapoxü̃wa ixügüxü̃ rü ñu̱xmata yema ĩã̱x ga Carnérugügu ãégaxü̃wa nangu.