Neemía 12 - Tupanaarü Ore

Chacherdótegü rü Lebítanüxü̃ ga norü naaneca̱x woeguxü̃

¹ Rü ñaagü nixĩ ga yema chacherdótegü rü Lebítanüxü̃ ga Chorobabé ga Charatié nanemaxã rü Yochuémaxã woeguxü̃. Rü ñaagü nixĩ ga yema chacherdótegü: Cheraía, rü Yeremía, rü Édra,

² rü Amaría, rü Marúx, rü Atú

³ rü Checanía, rü Reúü̃, rü Meremóx,

⁴ rü Idú, rü Guinetóü̃, rü Abía,

⁵ rü Miyamíü̃, rü Maadía, rü Bigá,

⁶ rü Chemaía, rü Yoiaríx, rü Yedaía,

⁷ rü Charú rü Amóx rü Irichía rü Yedaía. Rü yemagü nixĩ ga yema chacherdótegümaxã icua̱xgüxü̃ rü ñu̱xũchi yema natanüxü̃maxã icua̱xgüxü̃ ga yexguma Yochué maxü̱̃xgu.

⁸ Rü ñaagü nixĩ ga yema Lebítanüxü̃: Yochué rü Binuí rü Caxmié rü Cherebía rü Yudá rü Matanía. Rü nüma ga Matanía rü namücügümaxã wüxigu namaxã inacua̱xgüxü̃ ga yema wiyaegü.

⁹ Rü namücügü ga Babuquía rü Uní rü natanüxü̃ nixĩgü ga naxpe̱xewa yexmagüxü̃ ga yexguma nawiyaegügu.

¹⁰ Rü nüma ga Yochué rü Yoaquíü̃natü nixĩ, rü nüma ga Yoaquíü̃ rü Eriáchinatü nixĩ, rü nüma ga Eriachí rü Yoiadánatü nixĩ

¹¹ rü nüma ga Yoiadá rü Yoanáü̃natü nixĩ, rü nüma ga Yoanáü̃ rü Yadúanatü nixĩ.

¹² Rü yexguma Yoaquíü̃ chacherdótegüarü ãẽ̱xgacü yaxĩxgu, rü ñaagü nixĩ ga yema chacherdótegü ga natanüxü̃maxã icuáxchigüxü̃: Rü yema Cheraíatanüxü̃maxã icuáxü̃ rü Meraía nixĩ, rü yema Yeremíatanüxü̃maxã icuáxü̃ rü Ananía nixĩ,

¹³ rü yema Édratanüxü̃maxã icuáxü̃ rü Mechuráü̃ nixĩ, rü yema Amaríatanüxü̃maxã icuáxü̃ rü Yoanáü̃ nixĩ,

¹⁴ rü yema Mericútanüxü̃maxã icuáxü̃ rü Yonatáü̃ nixĩ, rü yema Chebaníatanüxü̃maxã icuáxü̃ rü Yúche nixĩ,

¹⁵ rü yema Aríü̃tanüxü̃maxã icuáxü̃ rü Axná nixĩ, rü yema Meraióxtanüxü̃maxã icuáxü̃ rü Ecái nixĩ,

¹⁶ rü yema Idútanüxü̃maxã icuáxü̃ rü Chacaría nixĩ, rü yema Guinetóü̃tanüxü̃maxã icuáxü̃ rü Mechuráü̃ nixĩ,

¹⁷ rü yema Abíatanüxü̃maxã icuáxü̃ rü Chicrí nixĩ, rü yema Miniamíü̃tanüxü̃maxã rü Moadíatanüxü̃maxã icuáxü̃ rü Pitái nixĩ,

¹⁸ rü yema Bigátanüxü̃maxã icuáxü̃ rü Chamúa nixĩ, rü yema Chemaíatanüxü̃maxã icuáxü̃ rü Yonatáü̃ nixĩ,

¹⁹ rü yema Yoaríxtanüxü̃maxã icuáxü̃ rü Matenái nixĩ, rü yema Yedaíatanüxü̃maxã icuáxü̃ rü Uchí nixĩ,

²⁰ rü yema Charáitanüxü̃maxã icuáxü̃ rü Caraí nixĩ, rü yema Amóxtanüxü̃maxã icuáxü̃ rü Ébe nixĩ,

²¹ rü yema Irichíatanüxü̃maxã icuáxü̃ rü Achabía nixĩ, rü yema Yedaíatanüxü̃maxã icuáxü̃ rü Natanaé nixĩ.

²² Rü yexguma Eriachí rü Yoiadá rü Yoanáü̃ rü Yadúa Lebítanüxü̃arü ãẽ̱xgacügü ixĩgügu, rü nayawǘgüéga ga yema Lebítanüxü̃ ga natanüxü̃maxã icua̱xgüxü̃. Rü yexgumarüxü̃ ta nayawǘgüéga ga yema chacherdótegü ga natanüxgümaxã icua̱xgüxü̃. Rü yemaacü nixĩ ga yexguma Daríu Pérchiaanearü ãẽ̱xgacü yixĩxgu.

²³ Rü yema Lebítanüxü̃ ga natanüxü̃maxã icua̱xgüxü̃ rü yema popera ga nagu yawǘgüégaxü̃gu nayawǘgüéga ñu̱xmata Yoanáü̃ ga Eriachí nataxawa nangu nax Lebítanüxü̃arü ãẽ̱xgacü yixĩxü̃.

²⁴ Rü yema Lebítanüxü̃maxã icua̱xgüxü̃ rü ñaagü nixĩ: Achabía, rü Cherebía, rü Yochué ga Caxmié nane. Rü yexguma nawa nanguxgu nax nawiyaegüxü̃ rü nüma ga natanüxü̃ rü nape̱xegu nayachigü nax Cori ya Tupanaxü̃ yacua̱xüü̃güxü̃ca̱x rü moxẽ nüxna naxãgüxü̃, gumá Dabí ga Cori ya Tupanaarü duü̃ ixĩcü namugüxü̃ãcüma.

²⁵ Rü yema ĩã̱xgü ga nawa yachocuxü̃arü ngaicamana nayexma ga õnachicagü. Rü norü dauruü̃gü nixĩ ga Matanía rü Babuquía rü Adía rü Mechuráü̃ rü Tamóü̃ rü Acúx.

²⁶ Rü guxü̃ma ga yemagü rü namaxẽ ga yexguma ãẽ̱xgacü yixĩxgu ga Yoaquíü̃ ga Yochué nane ga Yochadáx nataxa. Rü yexguma Neemía ãẽ̱xgacü ixĩxgu rü chacherdóte ga Édra poperaarü ümatüruxü̃ ixĩxgu nixĩ ga namaxẽxü̃ ga yema õnachicagüarü dauruü̃gü.

Yerucharéü̃arü poxeguü̃ruxü̃arü ãxü̃chichiga

²⁷ Rü yexguma nawa nanguxgu ga yema ngunexü̃ ga Yerucharéü̃arü poxeguxü̃ nagu yaxãxü̃chigüxü̃, rü guxü̃nema ga guma ĩanegü ga Lebítanüxü̃ nawa maxẽnegu Lebítanüxü̃ca̱x nayadaugü. Rü ñu̱xũchi Yerucharéü̃wa nanagagü nax yemaacü taãẽãcü Tupanaxü̃ yacua̱xüü̃güxü̃ca̱x wiyaegümaxã rü norü platíyugümaxã rü árpagümaxã rü árpaxacügümaxã nax naxüchigagüãxü̃ca̱x ga yema Yerucharéü̃arü poxeguruü̃arü ãxü̃chichiga.

^28-29 Rü yema wiyaetanüxü̃ ga Lebítanüxü̃ ga Yerucharéü̃cüwawa yemagüne ga ĩanexacügüwa ne ĩxü̃ rü nangutaque̱xegü. Rü gumá Netopátanüxü̃arü ĩanexacügüwa rü Guirigáarü ĩanexacügüwa rü Guébaanewa rü Amábeanewa ne naxĩ. Yerü yema wiyaetanüxü̃ rü Yerucharéü̃cüwagu norü ĩanexacügü naxügü.

³⁰ Rü yema chacherdótegü rü Lebítanüxü̃ rü Tupanape̱xewa nügü nimexẽẽgü. Rü yemawena ga yema chacherdótegü rü Lebítanüxü̃ rü Tupanape̱xewa duü̃xü̃güxü̃ nimexẽẽgü. Rü yexgumarüxü̃ ta Tupanape̱xewa nayamaxcugü ga yema ĩanetapü̱xarü ĩ̱ã̱xgü. Rü yema naxtapü̱x rü ta Tupanape̱xewa nayamaxcugü.

³¹ Yemawena rü yema Yudátanüxü̃arü ãẽ̱xgacügüxü̃ chamu nax yema naxtaxpü̱xétügu naxĩgüxü̃ca̱x. Rü ñu̱xũchi taxretücumügu ichayanu ga wiyaetanüxü̃. Rü yema norü wüxitücumü rü yema naxtapü̱xétü ga tügünewaama yexmaxü̃wa naxĩ ga Guxchirearü ĩã̱xwaama.

^32-34 Rü yema wiyaetanüxü̃weama naxügü ga Ochaía namaxã ga yema norü ngãxü̃tücumü ga Yudátanüxü̃arü ãẽ̱xgacügü ga Acharía, rü Édra, rü Mechuráü̃, rü Yudá, rü Bẽyamíü̃, rü Chemaía, rü Yeremía.

^35-36 Rü yema chacherdótegü ga cornétagu yacuegüãcüma naxümücügüxü̃ ga yema wiyaegüxü̃ rü wüxi rü Chacaría ga Yonatáü̃ nane nixĩ. Rü yema Chacaríaarü o̱xigü nixĩ ga Chemaía, rü Matanía, rü Micaía, rü Chacúx, rü Acháx. Rü Chacaríamücügü nixĩ ga natanüxü̃ ga Chemaía, rü Acharé, rü Mirarái, rü Guirarái, rü Maái, rü Natanaé, rü Yudá, rü Ananí. Rü Chacaría rü namücügü nanapaxgü ga yema paxetaruü̃gü ga gumá Tupanaarü duü̃ ga Dabí íxüxüxü̃. Rü nüma ga poperaarü ümatüruxü̃ ga Édra nixĩ ga nape̱xegu ixũcü.

³⁷ Rü yexguma yema ĩã̱x ga Puchugu ãégaxü̃wa nangugügu rü yema naxtaxpü̱xétügu nixĩxü̃tanü. Rü yexguma guma Yerucharéü̃arü üye ga Dabíarü Ĩanegu ãégaxü̃wa nangugügu, rü yema naxtaxpü̱xétüarü toxṍõnewa naxĩgü. Rü ãẽ̱xgacü ga Dabípatawa nachopetü rü ñu̱xmata nawa nangugü ga yema ĩã̱x ga Dexágu ãégaxü̃ ga ĩanearü éstewaama yexmaxü̃.

³⁸ Rü yema totücumü ga wiyaetanüxü̃ rü norü to̱xwecüwawaama naxĩ yema naxtaxpü̱xétüwa. Rü choma rü yema wiyaetanüxü̃we chixũchigü namaxã ga yema to ga ngãxü̃tücumü ga Yudátanüxü̃arü ãẽ̱xgacügü. Rü yema dauxü̃taechica ga Yapunagügu ãégaxü̃wa tachopetü. Rü itixĩxü̃tanü rü ñu̱xmata nawa tangugü ga ínayaxcüxü̃wa ga naxtapü̱x.

³⁹ Rü nüxü̃ tachopetü ga yema ĩã̱x ga Efraíü̃gu ãégaxü̃ rü yema ĩã̱x ga Yechanágu ãégaxü̃ rü yema ĩã̱x ga Choxnigügu ãégaxü̃ rü yema daxũtaechica ga Ananégu ãégaxü̃ rü yema daxũtaechica ga 100gu ãégaxü̃ rü ñu̱xmata nawa tangugü ga yema ĩã̱x ga Carnérugügu ãégaxü̃. Rü nawa tayachaxãchitanü ga yema ĩã̱x ga Dauxü̃taeruü̃gu ãégaxü̃.

⁴⁰ Rü yemawena ga yema taxretücumü ga wiyaetanüxü̃ rü nachicawa naxĩchigü ga Tupanapata ga taxü̃newa. Rü choma namaxã ga yema norü ngãxü̃tücumü ga ãẽ̱xgacügü ga choxü̃ ümücügüxü̃ rü tochicawa taxĩ ga Tupanapata ga taxü̃newa.

^41-42 Rü yema chacherdótegü ga cornéta icuexgüxü̃ nixĩ ga: Eriaquíü̃, rü Maacheía, rü Miniamíü̃, rü Micaía, rü Erioenái, rü Chacaría, rü Ananía, rü Maachía, rü Chemaía, rü Ereachá, rü Uchí, rü Yoanáü̃, rü Maquía, rü Eráü̃, rü Éche. Rü Icharía nixĩ ga namaxã icuáxü̃ ga yema wiyaetanüxü̃. Rü nümagü ga yema wiyaetanüxü̃ rü tagaãcü nawiyaegü.

⁴³ Rü yema ngunexü̃gu rü muxü̃ma ga ãmare Tupanaca̱x ínagugü. Rü poraãcü nataãẽgü ga duü̃xü̃gü yerü Tupana nixĩ ga nataãẽxẽẽgüxü̃. Rü ngexü̃gü rü buxü̃gü rü ta poraãcü nataãẽgü. Rü yema taãxẽ ga Yerucharéü̃wa naxügüxü̃ rü yáxü̃guma nüxü̃ taxĩnü.

Chacherdótegüca̱x rü ñu̱xũchi Lebítanüxü̃ca̱x ixĩxü̃ ga õna

⁴⁴ Rü yema ngunexü̃gu rü nüxü̃ taxuneta ga yatügü nax namaxã inacua̱xgüxü̃ca̱x ga guma ĩpatagü ga nagu nanuxü̃ne ga Tupanaarü yemaxü̃gü ga ãmaregü, rü nüxíraxü̃xü̃ ga nanetüarü ogü, rü yema duü̃xü̃güarü naanegüarü owa nüxna üxü̃ ga chacherdótegü rü Lebítanüxü̃ ngẽma Tupanaarü mugü nüxü̃ ixuxü̃rüxü̃. Yerü yema Yudátanüxü̃ rü namaxã nataãẽgü ga yema puracü ga chacherdótegü rü Lebítanüxü̃ ügüxü̃.

⁴⁵ Rü yema chacherdótegü rü Lebítanüxü̃ nixĩ ga wüxigu yema wiyaetanüxü̃maxã rü ĩã̱xgüarü dauruü̃gümaxã naxügüxü̃ nax Tupanaxü̃ yacua̱xüü̃güxü̃. Rü yexgumarüxü̃ ta nanaxügü nax Tupanape̱xewa nügü yamexẽẽgüxü̃ yema Dabí rü nane ga Charomóü̃ namuxü̃rüxü̃.

⁴⁶ Yerü nũxcüma ga yexguma Dabí rü Achá maxẽgu, rü nayexma ga ãẽ̱xgacügü ga wiyaetanüxü̃maxã icua̱xgüxü̃. Rü yemagü nixĩ ga wiyaegüãcüma Tupanaxü̃ icua̱xüü̃güxü̃ rü moxẽ nüxna ãgüxü̃xü̃.

⁴⁷ Rü yexguma Chorobabé rü Neemía maxẽgu rü guxü̃ma ga Iraétanüxü̃ rü wüxichigü ga ngunexü̃gu inanaxãgü ga õna nüxna ga yema wiyaetanüxü̃ rü ĩã̱xarü dauruü̃gü. Rü yexgumarüxü̃ ta Lebítanüxü̃na nanaxãgü ga yema nüxna üxü̃. Rü nüma ga Lebítanüxü̃ rü Aróü̃taagü ga chacherdótegüna nanaxãgü ga yema nüxna üxü̃.