Ore i mexü̃ ga Márcu ümatüxü̃ 11 - Tupanaarü Ore

Ngechuchu rü Yerucharéü̃gu naxücu

¹ Rü marü Yerucharéü̃arü ngaicamana nangugü ga Oribunecüarü Ma̱xpǘnearü ngaicamana yexmagüne ga ĩanexacügü ga Bexchagué rü Betánia. Rü yexguma yéma nangugügu, rü Ngechuchu nanamu ga taxre ga norü ngúexü̃gü.

² Rü ñanagürü nüxü̃: —¡Gua tórü to̱xma̱xtawa ngẽxmane ya ĩanexacüwa pexĩ! Rü ngẽxguma nawa pengugügu, rü ngẽxma tá nüxü̃ peyangau i wüxi i búru i ngẽxma ngãxü̃xü̃ i taguma texé natagu aunagüxü̃. ¡Rü peyawẽxü̃ rü nua penaga!

³ Rü ngẽxguma texé pexna caxgux nax ta̱xacüca̱x peyawẽxü̃xü̃ i ngẽma búru, ¡rü tümamaxã nüxü̃ pixu rü ñapegügü: “Torü Cori nanaxwa̱xe, rü ñu̱xma tátama nanatáeguxẽxẽ”, ñapegügü —ñanagürü!

⁴ Rü yéma naxĩ ga yema taxre ga ngúexü̃gü. Rü namacüwagu nüxü̃ nayangaugü ga wüxi ga búru ga wüxi ga ĩpataarü ĩã̱xü̃tagu ngãxü̃xü̃.

⁵ Rü ñuxre ga duü̃xü̃gü ga yéma yexmagüxü̃ rü nüxna nacagüe, rü ñanagürügü: —¿Ta̱xacü ípexüe? ¿Rü tü̱xcüü̃ peyawẽxü̃ i ngẽma búru? —ñanagürügü.

⁶ Rü nümagü ga yema ngúexü̃gü, rü yema ore ga Ngechuchu namaxã nüxü̃ ixuxü̃ãcü nanangãxü̃gü. Rü yemaca̱x tama nüxna nanachu̱xgü nax yagagüãxü̃.

⁷ Rü natagu nanachagümü ga naxchirugü. Rü yemaacü Ngechuchuxü̃tawa nanagagü. Rü nüma ga Ngechuchu rü natagu naxaunagü.

⁸ Rü muxü̃ma ga duü̃xü̃gü rü naxchirumaxãtama nayacha̱xamagü. Rü togü rü naixatügü ga naanewa nadaü̃xü̃maxã nayacha̱xamagü.

⁹ Rü yema duü̃xü̃gü ga nape̱xegu ãgüxü̃ rü yema togü ga wixweama ãgüxü̃, rü tagaãcü ñanagürügü: —Cuxü̃ ticua̱xüü̃gü. Rü namecüma ya daa Tupanaégagu núma ũcü.

¹⁰ Rü ãẽ̱xgacü ya Dabírüxü̃ namecümaxüchi ya daa ãẽ̱xgacü ya núma ngucü. ¡Rü pema rü ta, Pa Daxũcüã̱x, rü nüxü̃ picua̱xüü̃gü ya Tupana! —ñanagürügü.

¹¹ Rü Yerucharéü̃gu naxücu ga Ngechuchu, rü Tupanapata ga taxü̃neca̱x nixũ. Rü meama guxü̃wama inanadauaxü̃ne. Rü ñu̱xũchi yema norü 12 ga ngúexü̃gümaxã Betániaarü ĩaneca̱x nataegu, yerü marü nayáuane.

Ngechuchu rü ori̱x ga igunecü ga ngearü oṍxü̃maxã chixexü̃ naxuegu

¹² Rü moxü̃ãcü yexguma Betániawa inaxĩãchigu ga Ngechuchu rü nataiya.

¹³ Rü yáxü̃gu nüxü̃ nadau ga wüxi ga nanetü ga igunecü ga ãátüxü̃. Rü nüma ga Ngechuchu rü naxca̱x nixũ nax íyadauãxü̃ca̱x rü aixcüma nayexma̱x ga norü o. Natürü yexguma naxü̃tawa nanguxgu, rü taxuxü̃ma ga norü o inayangau, rü naatüxü̃xicatama, yerü taxũta norü owa nangu.

¹⁴ Rü yexguma rü ñanagürü igunecüxü̃: —¡Tagutáma texé wena cuxü̃ tamúarü oõ̱x! —ñanagürü. Rü norü ngúexü̃gü rü nüxü̃ naxĩnüe ga yema.

Ngechuchu ínanawoxü̃ ga yema Tupanapata ga taxü̃newa taxegüxü̃ ga duü̃xü̃gü

¹⁵ Rü yexguma Yerucharéü̃wa nangugügu, rü Ngechuchu rü Tupanapata ga taxü̃nea̱xtügu naxücu. Rü inanaxügü ga nax ínawoxü̃ãxü̃ ga yema yéma ta̱xacümaxã taxegüxü̃ rü naxca̱x taxegüxü̃. Rü nanangüegutanü ga norü mechagü ga yema duü̃xü̃gü ga togü ga nachixü̃anecüã̱xarü diẽru ngĩxü̃ üchicüügüxü̃ rü muxtucumaxã taxegüxü̃.

¹⁶ Rü nanachu̱xu nax texé tümaarü taxeruxü̃ yéma ngexü̃ ga Tupanapata ga taxü̃nea̱xtüwa.

¹⁷ Rü inanaxügü nax nangúexẽẽtaexü̃, rü ñanagürü: —Tupanaarü ore i ümatüxü̃wa rü: “Chopata rü yumüxẽpataxü̃ tá nixĩ naxca̱x i guxü̃ma i nachixü̃anecüã̱xgü”, ñanagürü. Natürü i pema rü ngĩ́ta̱a̱xgüxü̃pataxü̃ peyaxĩxẽxẽ —ñanagürü.

¹⁸ Natürü yexguma yemaxü̃ naxĩnüegu ga chacherdótegüarü ãẽ̱xgacügü rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü inanaxügüe ga naxca̱x nax nadaugüxü̃ ga ñuxãcü Ngechuchuxü̃ nax yama̱xgüxü̃. Natürü duü̃xü̃güxü̃ namuü̃e, rü yemaca̱x taxucürüwama duü̃xü̃güpe̱xegu nayayauxgü. Yerü nüma ga duü̃xü̃gü rü namaxã nataãẽgü ga yema Ngechuchuarü ngu̱xẽẽtae.

¹⁹ Natürü yexguma marü nachütachaü̃gu, rü Ngechuchu rü norü ngúexü̃gümaxã ínachoxü̃ nawa ga guma ĩane.

Narüñexẽ ga yema igunecü ga ngearü oṍxü̃

²⁰ Rü moxü̃ãcü pa̱xmama rü igunecüxü̃tawa nachopetü. Rü yéma nüxü̃ nadaugü nax nañexẽxü̃ ñu̱xmata naxchúma̱xãwa nangu.

²¹ Rü yexguma ga Pedru rü nüxna nacua̱xãchi ga yema ĩneacü ngupetüxü̃, rü ñanagürü Ngechuchuxü̃: —Pa Ngúexẽxẽruxü̃x, dücax i yea igunecü ga chixexü̃ namaxã cuxueguxü̃, rü marü narüñexẽ —ñanagürü.

²² Rü Ngechuchu nanangãxü̃, rü ñanagürü: —¡Nüxü̃́ peyaxõgü ya Tupana!

²³ Rü aixcüma pemaxã nüxü̃ chixu rü ngẽxguma chi texé tama chixri yaxõõcüma daa ma̱xpǘnexü̃ ñagügu: “Ixũgachi i nua rü márwa cugü yatáe”, ñagügu, rü chi tümaga naxĩnü ega aixcüma tayaxõõcüma ngẽmaãcü namaxã nüxü̃ tixuxgu.

²⁴ Rü ngẽmaca̱x pemaxã nüxü̃ chixu rü guxü̃ma i ta̱xacü i naxca̱x ípecaxü̃ i perü yumüxẽwa, rü name nax peyaxõgüxü̃ nax marü penayaxuxü̃, rü tá penayaxu.

²⁵ Rü ngẽxguma peyumüxẽgügu, natürü nangẽxmagu i ta̱xacürü guxchaxü̃ i toguemaxã pexü̃́ ngẽxmaxü̃, rü name i tüxü̃́ nüxü̃ perüngü̃ma i ngẽma nax Penatü ya daxũgucü rü ta pexü̃́ nüxü̃ iyanangümaxü̃ca̱x i perü pecadugü.

²⁶ Natürü ngẽxguma pema tama tüxü̃́ nüxü̃ perüngümagu i ngẽma guxchaxü̃ i toguemaxã pexü̃́ ngẽxmaxü̃, rü Penatü ya daxũgucü rü taxũtáma pexü̃́ nüxü̃ narüngüma i perü pecadugü —ñanagürü.

Texéarü mugagu Tupanapatawa nangu̱xẽxẽtaexü̃ ga Ngechuchu

²⁷ Rü yemawena rü Yerucharéü̃ca̱x nawoegu. Rü yexguma Ngechuchu Tupanapata ga taxü̃negu ixũgüchigüyane, rü naxca̱x naxĩ ga chacherdótegüarü ãẽ̱xgacügü, rü ngúexẽẽruü̃gü ga Moichéarü mugüwa ngu̱xẽẽtaegüxü̃, rü Yudíugüarü ãẽ̱xgacügü.

²⁸ Rü nüxna nacagüe, rü ñanagürügü: —¿Texéarü mugagu nixĩ i cunaxüxü̃ i ngẽma núma cuxüxü̃? ¿Rü texé cuxü̃ tamu nax cunaxüxü̃ca̱x i ngẽma? —ñanagürügü.

^29-30 Rü yexguma ga Ngechuchu rü nanangãxü̃, rü ñanagürü nüxü̃: —Choma rü tá ta pexna chaca, rü ngẽxguma choxü̃ pengãxü̃gu i ngẽma pexna naxca̱x chacaxü̃, rü choma rü tá ta pemaxã nüxü̃ chixu nax texé choxü̃ muxü̃ nax chanaxüxü̃ca̱x i ngẽma chaxüxü̃. ¿Rü texé tanamu ga Cuáü̃ nax duü̃xü̃güxü̃ ínabaiü̃xẽẽxü̃? ¿Rü Tupana yixĩxü̃ ga namucü rü ẽ̱xna duü̃xü̃gümare? —ñanagürü.

³¹ Rü yexguma ga nümagü rü inanaxügüe ga nügümaxã nax yaporagatanücüüxü̃, rü ñanagürügü: —Rü ngẽxguma chi: “Tupana núma nanamu”, ñagügügu, rü nüma rü chi ñanagürü tüxü̃: “¿Tü̱xcüü̃ ga tama nüxü̃́ peyaxõgüxü̃?” ñanagürü chi tüxü̃.

³² ¿Rü ñuxũcürüwa rü: “Yatügümare núma nanamu”, ñatarügügü tá? —ñanagürügü. Rü yema ñanagürügü yerü duü̃xü̃güxü̃ namuü̃e. Yerü guxü̃ma ga duü̃xü̃gü rü nayaxõgü nax Tupana yixĩxü̃ ga namuxü̃ ga Cuáü̃ nax nüxü̃ yaxuxü̃ca̱x ga norü ore.

³³ Rü yemaca̱x Ngechuchuxü̃ nangãxü̃gü, rü ñanagürügü: —Tama nüxü̃ tacua̱x nax texé núma namuxü̃ ga Cuáü̃ ga báiü̃xẽẽruxü̃ —ñanagürügü. Rü yexguma ga Ngechuchu rü nanangãxü̃ rü ñanagürü nüxü̃: —Choma rü ta taxũtáma pemaxã nüxü̃ chixu nax texé choxü̃ muxü̃ nax chanaxüxü̃ i ngẽma choxna naxca̱x pecaxü̃ —ñanagürü.