Ore i mexü̃ ga Márcu ümatüxü̃ 10 - Tupanaarü Ore

Tama namexü̃ nax texé tümama̱xü̃ ítáxü̃

¹ Rü Ngechuchu rü Capernáü̃arü ĩanewa inaxũãchi. Rü Yudéaanewa naxũ rü nawa nangu ga yema naane ga natü ga Yudáü̃arü tocutüwa yexmaxü̃. Rü wenaxarü naxca̱x nangutaque̱xegü ga duü̃xü̃gü. Rü nüma rü inanaxügü nax guxü̃gurüxü̃ nangúexẽẽãxü̃.

² Rü ñuxre ga Parichéugü rü naxca̱x naxĩ nax chixexü̃gu nangu̱xẽẽgüãxü̃ca̱x. Rü yemaca̱x nüxna nacagüe, rü ñanagürügü: —¿Namexü̃ i wüxi ya yatü rü naxma̱xü̃ ínatáxü̃? —ñanagürügü.

³ Rü nüma nanangãxü̃, rü ñanagürü nüxü̃: —¿Rü ta̱xacü yixĩxü̃ ga Moiché pexü̃ muxü̃? —ñanagürü.

⁴ Rü nümagü nanangãxü̃gü, rü ñanagürügü: —Moiché nüxü̃ nixu nax tama nachu̱xuxü̃ nax wüxi ya yatü rü ínatámaxü̃, ega wüxi i popera i ta̱xgüpane ngĩxna naxãxgu —ñanagürügü.

⁵ Rü yexguma ga Ngechuchu rü nanangãxü̃, rü ñanagürü nüxü̃: —Pema rü taxúega pexĩnüe rü yemaca̱x nixĩ ga Moiché ga tama pexna nachúãxü̃ nax pexma̱xü̃ ípetáxü̃.

⁶ Natürü noxriarü ügügu, rü Tupana nanaxü ga yatüxü̃ rü ngexü̃.

⁷ Rü ngẽmaca̱x ya yatü rü tá nanatüna rü naéna nixũgachi nax naxma̱xmaxã inaxã́ũxü̃ca̱x.

⁸ Rü ngẽmaãcü i ngẽma taxre rü ñoma wüxitama i duü̃xü̃rüxü̃ tá nixĩgü. Rü marü taxũtáma taxre nixĩ, erü wüxi tátama nixĩ.

⁹ Rü ngẽmaca̱x tama name nax texé nügüna tayaxĩgachixẽẽxü̃ i ngẽma taxre ya Tupana nügüna mugüxü̃ —ñanagürü.

¹⁰ Rü yexguma marü ĩpatawa nangugügu, rü norü ngúexü̃gü wenaxarü nüxna nacagüe naxca̱x ga yema ngu̱xẽẽtae.

¹¹ Rü Ngechuchu rü ñanagürü nüxü̃: —Rü yíxema tümama̱xü̃ ítáxe rü nai i ngexü̃maxã ãmaxe rü pecadu taxü ngĩxü̃tawa i ngẽma noxriü̃cü i tümama̱x.

¹² Rü ngẽxgumarüxü̃ ta, ega wüxi i nge íta̱xtegu rü nai ya yatümaxã naxãtegu, rü ngĩma rü ta pecadu ixü —ñanagürü.

Ngechuchu rü buxü̃gümaxã mexü̃ naxuegu

¹³ Rü yéma Ngechuchuxü̃tawa tüxü̃ nagagü ta ga ñuxre ga buxegü nax tüxü̃ yangógügüxü̃ca̱x. Natürü ga yema norü ngúexü̃gü rü inanaxügüe ga tüxü̃ nax yangagüxü̃ ga guxema tümaxacügü Ngechuchuxü̃tawa gagüxe.

¹⁴ Rü yexguma yemaxü̃ nada̱u̱xgu ga Ngechuchu, rü naãxẽwa nangu̱x, rü ñanagürü nüxü̃: —Chanaxwa̱xe i chauxü̃tawa naxĩ i buxü̃gü. ¡Rü taxṹ i nüxna penachu̱xuxü̃! Erü Tupana ãẽ̱xgacü ixĩxü̃wa rü tümaca̱x nixĩ ya yíxema ñaa buxü̃gürüxü̃ taxuxü̃ma i chixexü̃xü̃ icuáxe.

¹⁵ Rü aixcüma pemaxã nüxü̃ chixu rü texé ya tama wüxi i buxü̃rüxü̃ Tupanaxü̃ yaxúxe nax tümaarü ãẽ̱xgacü yixĩxü̃ca̱x, rü taxũtáma nagu taxücu ya Tupana ãẽ̱xgacü íyixĩxü̃wa —ñanagürü.

¹⁶ Rü nüma rü tüxü̃ naganagütanü ga guxema bua̱xta, rü tümaerugügu naxǘxme̱xãcüma ñanagürü tüxü̃: —¡Tupana pexü̃ rüngü̃xẽxẽ! —ñanagürü.

Wüxi ga yatü ga diẽruã̱xü̃chixü̃ Ngechuchumaxã nidexa

¹⁷ Rü yexguma marü inaxũãchichaü̃gu ga Ngechuchu, rü yéma naxca̱x niña ga wüxi ga yatü. Rü nape̱xegu nayacaxã́pü̱xü, rü nüxna naca rü ñanagürü nüxü̃: —Pa Ngúexẽxẽruxü̃ ya Mecü, ¿ta̱xacü tá chaxüxü̃ nax chanayaxuxü̃ca̱x i maxü̃ i taguma gúxü̃? —ñanagürü.

¹⁸ Rü Ngechuchu nanangãxü̃, rü ñanagürü nüxü̃: —¿Tü̱xcüü̃, “Mecü”, ñacurügü choxü̃? Erü Tupanaxicatama nixĩ ya mecü ixĩcü, rü nataxuma i to.

¹⁹ Cuma rü marü nüxü̃ cucua̱x i Tupanaarü mugü i ñaxü̃: “¡Taxũtáma cumáeta, rü taxũtáma nai i ngexü̃maxã icupe, rü taxũtáma cungĩ́ta̱a̱x, rü taxũtáma doraxü̃ quixu i togüchiga, rü taxũtáma texéxü̃ cuwomüxẽxẽ, rü tümaga naxĩnü ya cunatü rü cué!” ñaxü̃ —ñanagürü.

²⁰ Rü yexguma ga gumá yatü rü ñanagürü nüxü̃: —Pa Ngúexẽxẽruxü̃, chorü bucümatama mea chanaxaure i guxü̃ma i ngẽma mugü i nüxü̃ quixuxü̃ —ñanagürü.

²¹ Rü yexguma ga Ngechuchu rü nüxü̃ nangechaü̃ãcüma nüxü̃ nadawenü, rü nanangãxü̃ rü ñanagürü: —Rü wüxixicatama cuxü̃́ nataxu. ¡Rü íixũ, rü namaxã yataxe i guxü̃ma i curü ngẽmaxü̃gü, rü ñu̱xũchi togü i ngearü ngẽmaxü̃ã̱xgüxü̃na naxã i ngẽma curü natanü! Rü ngẽmaãcü tá cuxü̃́ nangẽxma i cuchica i daxũguxü̃ i naanewa. Rü ngẽmawena rü marü name i chowe curüxũ —ñanagürü.

²² Natürü nüma ga gumá yatü rü nanaxĩ̱xãchiãxẽ ga yexguma nüxü̃ naxĩnügu ga yema ore. Rü nangechaü̃ãcüma ínixũ, yerü namuxũchi ga norü yemaxü̃gü.

²³ Rü Ngechuchu rü nüxü̃ nidaugüãchi, rü ñanagürü norü ngúexü̃güxü̃: —Naguxchaxüchi tá nixĩ nax Tupana ãẽ̱xgacü íyixĩxü̃wa yachocuxü̃ i ngẽma diẽruã̱xü̃chigüxü̃ —ñanagürü.

²⁴ Rü naba̱i̱xãchiãẽgü ga norü ngúexü̃gü namaxã ga yema ore. Natürü ga Ngechuchu rü wenaxarü namaxã nüxü̃ nixu, rü ñanagürü: —Pa Chaunegüx, wüxi i guxchaxüchixü̃ nixĩ nax Tupana ãẽ̱xgacü íyixĩxü̃wa ixücuxü̃.

²⁵ Rü aixcüma pemaxã nüxü̃ chixu rü ñoma wüxi i caméyu nax taxucürüwama wüxi ya ucumaxetüwa naxüpetüxü̃arü yexera narüguxchamae naxca̱x i wüxi i duü̃xü̃ i diẽruã̱xü̃chixü̃ nax yaxücuxü̃ i ngextá Tupana ãẽ̱xgacü íyixĩxü̃wa —ñanagürü.

²⁶ Rü yexguma yemaxü̃ naxĩnüegu ga norü ngúexü̃gü, rü yexeraãcü naba̱i̱xãchiãẽgü. Rü nügüna nacagüe, rü ñanagürügü: —¿Rü texé tá ẽ̱xna tixĩ ya nawa ichocuxe ya Tupana ãẽ̱xgacü ixĩxü̃wa? —ñanagürügü.

²⁷ Rü Ngechuchu rü nüxü̃ nadawenü, rü nanangãxü̃ rü ñanagürü nüxü̃: —Yatügü rü taxuacüma nügü namaxẽxẽ, natürü Tupanaaxü̃́ rü natauxcha i ngẽma, erü Tupanaca̱x rü nataxuma i ta̱xacü i guxchaxü̃ —ñanagürü.

²⁸ Rü yexguma inanaxügü ga Pedru nax yadexaxü̃, rü ñanagürü nüxü̃: —Toma rü marü yéma tanawogü ga guxü̃ma ga torü yemaxü̃gü nax cuwe tarüxĩxü̃ca̱x —ñanagürü.

^29-30 Rü Ngechuchu nanangãxü̃, rü ñanagürü: —Aixcüma pemaxã nüxü̃ chixu rü texé ya chaugagu rü ore i maxẽxẽxẽruü̃gagu tümapatana, rüe̱xna tümaenexẽgüna, rüe̱xna tümaeya̱xgüna, rüe̱xna tümaéna, rüe̱xna tümanatüna, rüe̱xna tümaxacügüwa, rüe̱xna tümaanegüna ngéma ixũxẽ, rü tá tanayaxu i tümaarü natanü. Rü aixcüma ñu̱xma i ñoma i naanewa rü tá tanayaxu i 100 e̱xpü̱xcüna ya tümapatagü, rü tümaenexẽgü, rü tümaeya̱xgü, rü tümaégu, rü tümaxacügü, rü tümaanegü. Natürü ngẽxgumarüxü̃ tá ta tanayaxu i ngúxü̃gü i togü tá tüxü̃ ingexẽẽgüxü̃. Natürü yixcamaxü̃ra i daxũguxü̃ i naanewa rü tá tanayaxu i maxü̃ i taguma gúxü̃.

³¹ Natürü muxü̃ma i nümaxü̃ i ñu̱xma ñoma i naanewa duü̃xü̃gü wixpe̱xewa ügüxẽẽxü̃, rü daxũguxü̃ i naanewa rü Tupana tá wixweama nanaxügüxẽxẽ. Rü muxü̃ma i nümaxü̃ i ñu̱xma ñoma i naanewa duü̃xü̃gü wixweama ügüxẽẽxü̃, rü daxũguxü̃ i naanewa rü Tupana tá wixpe̱xewa nanaxügüxẽxẽ —ñanagürü.

Ngechuchu rü wenaxarü norü yuchigaxü̃ nixu

³² Rü Yerucharéü̃waama naxĩ. Rü nüma ga Ngechuchu rü norü ngúexü̃güpe̱xegu nixũ. Rü nümagü rü naba̱i̱xãchiãẽgü, rü yema togü ga duü̃xü̃gü ga wixweama ãgüxü̃ rü namuü̃e. Rü Ngechuchu rü wenaxarü noxrüwama naxca̱x naca ga yema 12 ga norü ngúexü̃gü. Rü inanaxügü nax namaxã nüxü̃ yaxuxü̃ ga ta̱xacü tá nüxü̃ ngupetüxü̃.

³³ Rü ñanagürü nüxü̃: —Pema nüxü̃ pecua̱x nax marü ingaicaxü̃ nax Yerucharéü̃wa ingugüxü̃. Rü ngéma rü Tupana Nane ya duü̃xü̃xü̃ ixĩcü rü tá chacherdótegüarü ãẽ̱xgacügüna rü mugüwa ngúexẽẽtaegüxü̃na nanamugü. Rü nümagü rü tá yu namaxã naxuegugü, rü ñu̱xũchi tá ngẽma Rómacüã̱xgüna nanamugü.

³⁴ Rü ngẽmagü tá nagu nidauxcüraxü̃gü. Rü tá nüxna nacua̱i̱xgüe, rü tá nanacua̱i̱xgü, rü tá nayama̱xgü. Natürü tomaepü̱x i ngunexü̃guwena rü tá wena namaxü̃ —ñanagürü.

Chantiágu rü Cuáü̃ rü wüxi ga ngü̃xẽxẽca̱x ínacagü

³⁵ Rü Ngechuchuca̱x naxĩ ga Chantiágu rü Cuáü̃ ga Chebedéu nanegü, rü ñanagürügü nüxü̃: —Pa Ngúexẽxẽruxü̃, tanaxwa̱xe i toxca̱x cunaxü i ngẽma ngü̃xẽxẽ i naxca̱x tá cuxna tacaxü̃ —ñanagürügü.

³⁶ Rü nüma rü nüxna naca, rü ñanagürü: —¿Ta̱xacü nixĩ i penaxwa̱xexü̃ nax pexca̱x chanaxüxü̃? —ñanagürü.

³⁷ Rü ñanagürügü: —Rü ngẽxguma ãẽ̱xgacüxü̃ quingucuchigu, rü tanaxwa̱xe nax wüxíe i toma rü curü tügünecüwawa tarütoxü̃, rü togue i curü to̱xwecüwawa —ñanagürügü.

³⁸ Rü Ngechuchu nanangãxü̃, rü ñanagürü nüxü̃: —Pema rü tama nüxü̃ pecua̱x nax ta̱xacüca̱x ípecaxü̃. ¿Rü pexü̃́ chi natauxchaxü̃ nax peyaxaxüxü̃ i ngẽma axexü̃ i üxchíüxü̃ i choma tá chixaxüxü̃? ¿Rü namaxã chi peporaexü̃ i ngẽma ngúxü̃ i tá chingexü̃? —ñanagürü.

³⁹ Rü nümagü nanangãxü̃gü rü ñanagürügü: —Ngẽmáacüx, namaxã tá taporae —ñanagürügü. Rü Ngechuchu nanangãxü̃, rü ñanagürü nüxü̃: —Aixcüma tá nixĩ i chauxrüxü̃ peyaxaxüxü̃ i ngẽma axexü̃ i üxchíüxü̃ rü chauxrüxü̃ ngúxü̃ nax pingegüxü̃.

⁴⁰ Natürü ngẽma chorü tügünecüwawa rü chorü to̱xwecüwawa nax perütogüxü̃ca̱x, rü tama cho̱xme̱xwa nangẽxma nax pexna chanaxãxü̃, erü Chaunatü tá tüxna nanaxã ya yíxema tümaca̱x íyixĩxẽ —ñanagürü.

⁴¹ Rü yexguma yemaxü̃ naxĩnüegu ga yema togü ga 10 ga ngúexü̃gü, rü Chantiágumaxã rü Cuáü̃maxã nanue.

⁴² Natürü Ngechuchu naxca̱x naca rü ñanagürü nüxü̃: —Pema nüxü̃ pecua̱x i togü i nachixü̃anegüwa rü nangẽxmagü i ãẽ̱xgacügü i nagu naxĩnüegu nax namexü̃ nax nuãcü namaxã inacuáxü̃ i norü duü̃xü̃gü. Rü ngẽma duü̃xü̃gü i pora nüxü̃́ ngẽxmagüxü̃ rü duü̃xü̃güétüwa nügü naxügüxẽxẽ.

⁴³ Natürü taxũtáma ngẽmaãcü nixĩ i petanüwa. Erü ngẽxguma petanüwa texé naxwa̱xegu nax togüétüwa tangexmaxü̃, rü name nixĩ i tümamücügüarü mugüruxü̃ tixĩxü̃.

⁴⁴ Rü ngẽxguma texé i petanüwa naxwa̱xegu nax tümamücügüeru nax tixĩxü̃, rü name nixĩ i tümamücügüarü mugüruxü̃ tixĩxü̃.

⁴⁵ Rü woo ya Tupana Nane ya duü̃xü̃xü̃ ixĩcü, rü tama nüxü̃ nangü̃xẽẽgüxü̃ca̱x núma naxũ. Natürü núma naxũ nax duü̃xü̃güxü̃ yanangü̃xẽẽxü̃ca̱x rü naxca̱x inaxããxü̃ca̱x i norü maxü̃, nax ngẽmaãcü muxü̃ma i duü̃xü̃güarü maxü̃ naxütanüxü̃ca̱x —ñanagürü.

Bartiméo ga ngexetücüxü̃ narümexẽxẽ ga Ngechuchu

⁴⁶ Rü Yericúarü ĩanewa nangugü. Rü Ngechuchuwe narüxĩ ga norü ngúexü̃gü rü muxü̃ma ga togü ga duü̃xü̃gü. Rü yexguma guma ĩanewa ínachoxü̃gu, rü yéma namacüwawa narüto ga wüxi ga ngexetücü ga Bartiméo ga Timéo nane.

⁴⁷ Rü yexguma gumá ngexetücü nüxü̃ ĩnügu ga Ngechuchu ga Nacharétucüã̱x nax yixĩxü̃ ga gumá yéma üpetücü, rü inanaxügü ga tagaãcü aita nax naxüxü̃, rü: —Pa Ngechuchu ya Dabí Nanex, ¡cuxü̃́ changechaü̃tümüxü̃! —ñanagürü.

⁴⁸ Natürü muxü̃ma ga yema duü̃xü̃gü rü ínanangaxüchigüama nax yanangeáxü̃ca̱x. Natürü ga nüma rü yexeraãcü tagaãcü aita naxüama, ñaxü̃maxã: —Pa Dabí Nanex, ¡cuxü̃́ changechaü̃tümüxü̃! —ñaxü̃maxã.

⁴⁹ Rü yexguma ga nüma ga Ngechuchu rü inayachiãchi, rü ñanagürü: —¡Naxca̱x peca! —ñanagürü. Rü gumá ngexetücüca̱x nacagü, rü ñanagürügü: —¡Nataãxẽ rü inachi! Rü cuxca̱x nixĩ i naca̱xaxü̃ —ñanagürügü.

⁵⁰ Rü gumá ngexetücü rü yexa nanaña ga norü gáuxü̃chiru. Rü inayuxnagü rü Ngechuchuca̱x nixũ.

⁵¹ Rü Ngechuchu nüxna naca, rü ñanagürü nüxü̃: —¿Ta̱xacü nixĩ i cunaxwa̱xexü̃ nax cuxca̱x chaxüxü̃? —ñanagürü. Rü nüma ga gumá ngexetücü, rü nanangãxü̃, rü ñanagürü: —Pa Ngúexẽxẽruxü̃, chanaxwa̱xe nax chidauuchixü̃ —ñanagürü.

⁵² Rü yexguma ga Ngechuchu, rü ñanagürü nüxü̃: —¡Ẽcü, nataegu! Rü marü cuxca̱x nitaane erü cuyaxõ —ñanagürü. Rü yexgumatama ga gumá ngexetücü rü nidauuchi, rü Ngechuchuwe narüxũ ga namawa.