Ore i mexü̃ ga Matéu ümatüxü̃ 23 - Tupanaarü Ore

Ngechuchu ínanaxuaxü̃ ga Parichéugü rü ngúexẽẽruü̃gü ga Moichéarü mugüwa ngu̱xẽẽtaegüxü̃

¹ Rü yemawena ga Ngechuchu rü duü̃xü̃güxü̃ rü norü ngúexü̃güxü̃ ñanagürü:

² —Ngẽma ngúexẽẽruü̃gü i mugüwa ngu̱xẽẽtaegüxü̃ rü ngẽma Parichéugü, rü meama nüxü̃ nacua̱xgü ga Tupanaarü ore ga Moiché ümatüxü̃.

³ Rü ngẽmaca̱x name i naga pexĩnüe i guxü̃ma i ngẽma pemaxã nüxü̃ yaxugüxü̃. Natürü tama name i nüma namaxẽxü̃ãcüma pemaxẽ, erü nüma nüxü̃ nixugü i mexü̃ i ore natürü chixri namaxẽ.

⁴ Rü nüma rü duü̃xü̃güxü̃ namu nax naga naxĩnüexü̃ca̱x i mugü i guxchaxü̃ i taxucürüwama texé yáxna namaxã ĩnüxü̃. Natürü woo duü̃xü̃güxü̃ namu nax naga naxĩnüexü̃ca̱x i ngẽma mugü, rü nümagü i ngẽma ngúexẽẽruü̃gü rü ngẽma Parichéugü rü bai i írarüwa naga naxĩnüexü̃ i ngẽma mugü.

⁵ Rü nümagü rü mea namaeneta, rü guxü̃ma i ngẽma naxügüxü̃, rü nanaxügü nax duü̃xü̃gü nüxü̃ daugüxü̃ca̱x. Rü nacatüwa rü nachacüügüwa nayana̱i̱xcuchigü i Tupanaarü ore i ãxchiü̃xü̃. Rü naxchirupechinüwa nanapaicu i bopü̱xüxü̃ i ngã̱xãẽruü̃gü.

⁶ Rü petagüarü õnawa rü ngẽma ngúexẽẽruü̃gü i mugüwa ngu̱xẽẽtaegüxü̃ rü ngẽma Parichéugü rü nanaxwa̱xegü i õnaarü yoraxü̃tawa nax natogüxü̃ nax duü̃xü̃gü ngéma nüxü̃ rüdaunüxü̃ca̱x. Rü ngutaque̱xepataü̃güwa rü nanaxwa̱xegü nax nape̱xewa ügüxü̃ i naxma̱xwe̱xegüwa natogüxü̃.

⁷ Rü ĩanearü plazagüwa rü nanaxwa̱xegü nax duü̃xü̃gü mea nüxü̃ rümoxẽgüxü̃. Rü nanaxwa̱xegü nax duü̃xü̃gü rü: “Pa Ngúexẽẽruxü̃x”, ñagüxü̃ nüxü̃.

⁸ ¡Natürü i pemax, Pa Chorü Duü̃xü̃güx, rü taxũtáma penaxwa̱xe nax duü̃xü̃gü “Pa Ngúexẽẽruxü̃”, ñagüxü̃ pexü̃! Erü guxãma i pema rü pegüenexẽgü pixĩgü, rü wüxixicatama nixĩ ya perü Ngúexẽẽruxü̃ ixĩcü.

⁹ Rü tama name i ñoma i naanewa texéxü̃, Pa Tonatüx, ñapegürü. Erü wüxixicatama nixĩ ya Penatü, rü nüma rü daxũwa nangẽxma.

¹⁰ Rü tama name i texé: “Pa Ngúexẽẽruxü̃”, ñatarügü pexü̃. Erü choma i Cristuxicatama nixĩ i perü Ngúexẽẽruxü̃ chixĩxü̃.

¹¹ Rü yíxema petanüwa nüxü̃ rücua̱xmaexe rü tanaxwa̱xe nax tümamücügüarü ngü̃xẽẽruxü̃ tixĩxü̃.

¹² Erü yíxema tügü írütaxe rü Tupana tá tüxü̃ naxãnexẽxẽ. Natürü yíxema tügü írüxíraxe, rü Tupana tá tüxü̃ nicua̱xüxü̃.

¹³ Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü wüxi i ngechaü̃ nixĩ i pexca̱x erü duü̃xü̃güaxü̃́ penaguxchaxẽxẽ nax Tupanaxü̃tawa nangugüxü̃ca̱x. Rü woo i pema rü taxũtáma ngẽxma pechocu, natürü nüxü̃́ penaguxchaxẽxẽ nax ngẽxma nachocuxü̃ca̱x i ngẽma togü i nüxü̃́ nangúchaü̃xü̃ nax ngẽxma nachocuxü̃.

¹⁴ Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema nixĩ i duü̃xü̃güpe̱xewa mea pemaxẽnetaxü̃. Rü wüxi i ngechaü̃ nixĩ i pexca̱x erü tüxna penapuxü̃ ya tümapata ya yíxema yutegüxe. Rü ñu̱xũchi penama̱xẽxẽ i perü yumüxẽgü nax duü̃xü̃gü nagu rüxĩnüegu rü aixcüma mexü̃ i Tupanaarü duü̃xü̃gü nax pixĩgüxü̃. Rü ngẽmaca̱x pema tá nixĩ i togü i duü̃xü̃güarü yexera pepoxcuexü̃.

¹⁵ Pa Ngúexẽxẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü wüxi i ngechaü̃ nixĩ i pexca̱x erü guxü̃wama pexĩ nax naxca̱x pedauxü̃ nax wüxitama ya duü̃xẽ pexrüxü̃ ixĩxü̃ca̱x. Rü ngẽxguma marü pexü̃ tanguxü̃xgu, rü tüxü̃ pechixexẽxẽ nax düxwa taxree̱xpü̱xcüna perü yexera ãũcümaxü̃wa tangexmaxü̃ca̱x.

¹⁶ Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü ñoma cua̱xruü̃gü i ngexetüxü̃rüxü̃ pixĩgü. Rü wüxi i ngechaü̃ nixĩ i pexca̱x, erü ñaperügügü: “Ngẽxguma texé ya Tupanapata ya taxü̃neégagu ixunetagu, rü nüetama nixĩ ega tama tayangu̱xẽẽgu i ngẽma tümaarü uneta”, ñaperügügü. Natürü ngẽxguma texé Tupanapata ya taxü̃nearü úiruégagu ixunetagu, rü ñaperügügü: “Tanaxwa̱xe i aixcüma tayanguxẽxẽ i ngẽma tümaarü uneta”, ñaperügügü.

¹⁷ Pema rü pengeãẽgü rü ñoma pengexetügüxü̃rüxü̃ pixĩgü. ¿Pexca̱x rü ta̱xacü nixĩ i yexera rümemaexü̃, Tupanapata ya taxü̃nearü úiru rüe̱xna nümatama ya Tupanapata ya taxü̃ne ya nagagu naxüünene i ngẽma úiru?

¹⁸ Rü pema rü ñaperügügü ta: “Rü ngẽxguma texé ya Tupanapataarü ãmarearü guruü̃égagu ixunetagu, rü nüetama nixĩ ega tama tayangu̱xẽẽgu i ngẽma tümaarü uneta. Natürü ngẽxguma texé Tupanapataarü ãmarearü guruü̃wa ngẽxmaxü̃ i ãmareégagu ixunetagu, rü tanaxwa̱xe i aixcüma tayanguxẽxẽ i ngẽma tümaarü uneta”, ñaperügügü.

¹⁹ Pema rü pengeãẽgü rü ñoma pengexetügüxü̃rüxü̃ pixĩgü. ¿Pexca̱x rü ta̱xacü nixĩ i yexera rümemaexü̃, rü ngẽma ãmare i ãmarearü guruü̃wa ngẽxmaxü̃ rüe̱xna nümatama ya ãmarearü guruxü̃ i nagagu naxüünexü̃ i ngẽma ãmare?

²⁰ Erü yíxema ngẽma ãmarearü guruü̃égagu ixunetaxe, rü tama ngẽma guruü̃égaguxicatama itaxuneta, natürü ngẽma ãmarearü guruü̃étüwa ngẽxmaxü̃ i ãmareégagu rü ta itaxuneta.

²¹ Rü yíxema Tupanapata ya taxü̃neégagu ixunetaxe, rü tama yimá Tupanapata ya taxü̃neégaguxicatama itaxuneta, natürü Tupana ya ngéma maxü̃cüégagu rü ta itaxuneta.

²² Rü yíxema daxũguxü̃ i naaneégagu ixunetaxe, rü Tupanaarü toruü̃égagu rü ta itaxuneta, rü ngẽxgumarüxü̃ ta Tupana ya ngéma rütocüégagu rü ta itaxuneta.

²³ Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Pema rü perü mentawa rü aníswa rü comínuwa rü Tupanana penaxã i ngẽma diésmu i nüxna üxü̃, natürü tama naga pexĩnüe i Tupanaarü mugü i guxü̃ i mugüarü yexera ixĩxü̃. Rü wüxi i ngechaü̃ nixĩ i pexca̱x erü tama mea duü̃xü̃gümaxã ipecua̱x, rü tama pexü̃́ nangechaü̃tümüü̃gü, rü tama Tupanamaxã pixaixcümagü. Rü ngẽma mexü̃gü nixĩ ya Tupana naxwa̱xexü̃ nax penaxüxü̃. Rü ngẽxgumarüxü̃ ta name nax Tupanaga pexĩnüexü̃ rü nüxna penaxãxü̃ i ngẽma diésmu i nüxna üxü̃.

²⁴ Pa Cua̱xruü̃gü i Ngexetügüxü̃x, pema rü guxü̃ma i mugü i woo íraxüchixü̃ rü meama penaxaure, natürü tama Tupana naxwa̱xexü̃ãcüma pemaxẽ. Pema rü ñoma duü̃xü̃ i wüxi i tunüca̱x norü axexü̃ bapetüxü̃ rü ñu̱xũchi wüxi i caméyu íga̱xaxü̃rüxü̃ pixĩgü.

²⁵ Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü wüxi i ngechaü̃ nixĩ i pexca̱x, erü ñoma wüxi i axepáü̃ rüe̱xna wüxi ya poratu i düxétüwaxicatama mexü̃rüxü̃ pixĩgü. Rü pema rü perü düxétüxü̃newaxicatama pegü pimexẽxẽ, natürü perü maxü̃wa rü poraãcü pichixe. Erü penawomüxẽẽãcüma naxca̱x pengĩ̱x i duü̃xü̃güarü ngẽmaxü̃gü, rü pegüguxicatama perüxĩnüe.

²⁶ Pa Parichéugü i Ñoma Ngexetüxü̃rüxü̃ Ixĩgüxü̃x, name nixĩ i pegü pimexẽxẽ i perü aixepewa i perü maxü̃wa. Rü ngẽxguma tá nixĩ i perü düxétüwa rü ta pimexü̃.

^27-28 Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü wüxi i ngechaü̃ nixĩ i pexca̱x, erü ñoma yuetachique̱xegü i düxétüwa cómüxü̃maxã chauxetügüxü̃ natürü aixepewa rü yuetachina̱xãmaxã rü naguxü̃raü̃xü̃ i ãũãchixü̃maxã napagüxü̃rüxü̃ pixĩgü. Erü perü düxétüwa i duü̃xü̃gü nüxü̃ ídaugüxü̃waxicatama pime, natürü perü aixepewa i perü ĩnüwa nangẽxma i naguxü̃raü̃xü̃ i chixexü̃.

²⁹ Rü wüxi i ngechaü̃ nixĩ i pexca̱x, Pa Ngúexẽxẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü yema nũxcümaü̃güxü̃ ga Tupanaarü orearü uruü̃güchique̱xegüétüwa penatoxẽxẽ i norü cua̱xruxü̃gü, rü peyamecagü ga naxchique̱xegü ga yema duü̃xü̃gü ga imexü̃ ga yuexü̃.

³⁰ Rü ñu̱xũchi ñaperügügü: “Rü yexguma chi nũxcümaü̃güxü̃ ga tórü o̱xigü maxẽyane imaxẽgu, rü taxũchima nüxü̃ tarüngü̃xẽxẽ nax nadaiaxü̃ ga yema nũxcümaü̃güxü̃ ga Tupanaarü orearü uruü̃gü”, ñaperügügü.

³¹ Rü ngẽma oremaxã rü pegü pengo̱xẽxẽ nax nataagü pixĩgüxü̃ ga yema duü̃xü̃gü ga nũxcümaü̃güxü̃ ga Tupanaarü orearü uruü̃güxü̃ daixü̃.

³² ¡Ẽcüx, noxtacüma peyanguxẽxẽ̱x ga yema chixexü̃ ga nũxcümaü̃güxü̃ ga perü o̱xigü ügüexü̃!

³³ Pa Ãxtapearü Duü̃xü̃güx, pema rü poraãcü pichixe. ¿Ñuxãcü tá naxcha̱xwa pibuxmü ya yimá üxü ya taguma ixoxü̃ne?

³⁴ Rü ngẽmaca̱x i choma rü tá pexü̃tawa chanamugü i Tupanaarü orearü uruü̃gü, rü yatügü i mexü̃gü i nüxü̃ cua̱xüchigüxü̃, rü ngúexẽẽruü̃gü i mexü̃gü. Natürü pema rü tá penadai i ñuxre, rü togü rü curuchawa tá peyapotagü, rü togü rü ngutaque̱xepataü̃gügu tá peyacua̱i̱xgü, rü togü rü ĩanechigüwa tá nawe pingẽxü̃tanü.

³⁵ Rü ngẽmaca̱x Tupana tá pexü̃ napoxcue naxca̱x i guxü̃ma ga norü duü̃xü̃gü ga imexü̃gü ga perü o̱xigü daixü̃. Rü Abéwa nixĩ ga inaxügüãxü̃ ga nax nadaiaxü̃. Rü Chacaría ga Berequía nane ga Tupanapatape̱xegu ga ãmarearü guruü̃xü̃tagu peyama̱xgücügu nixĩ ga iyacuáxü̃.

³⁶ Rü aixcüma pemaxã nüxü̃ chixu rü guxü̃ma ga yema chixexü̃gü ga naxügüxü̃ca̱x rü Tupana tá nanapoxcue i duü̃xü̃gü i ñu̱xma maxẽxü̃ —ñanagürü ga Ngechuchu.

Ngechuchu rü Yerucharéü̃cüã̱x ga duü̃xü̃güca̱x naxaxu

³⁷ Rü ñanagürü ta ga Ngechuchu: —Pa Yerucharéü̃cüã̱x, pema penadai i Tupanaarü orearü uruü̃gü, rü nutamaxã ípenamuxũchigü i ngẽma orearü ngeruü̃gü ya Tupana pexü̃tawa mugüxü̃. Rü ñuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃ ñoma wüxi i ota i naxacüxegü nügütüü̃gu tüxü̃ nutaque̱xexü̃rüxü̃. Natürü pema rü tama penaxwa̱xe.

³⁸ Dücax i ñu̱xma ya perü Tupanapata ya taxü̃ne, rü Tupana tá nüxna nixũ.

³⁹ Rü pemaxã nüxü̃ chixu rü taxũtáma wena choxü̃ pedau ñu̱xmatáta daxũguxü̃ i naanewa ne chaxũ. Rü ngẽxguma rü tá choxü̃ pedaugü rü tá ñaperügügü: “Namexẽchi ya yimá Cori ya Tupana núma namucü”, ñaperügügü tá —ñanagürü ga Ngechuchu.