Lebítanüxü̃arü puracüchiga 3 - Tupanaarü Ore

Ãmaregü i Tupanaarü ngüxmüxẽẽruü̃chiga

¹ Rü ngẽxguma texé tümaarü woca i ngexü̃ rüe̱xna yatüxü̃ Cori ya Tupanana taxãxgu nax naxca̱x tayamáxü̃ca̱x rü tayaguxü̃ca̱x nax ngẽmamaxã tanangüxmüxẽẽxü̃ca̱x ya Cori ya Tupana, rü name i wüxi i naxü̃na i taxuwama chixexü̃ nax yixĩxü̃.

² Rü yíxema ãmare ixãxẽ rü tá naerugu tanuxme̱x i ngẽma tümaarü ãmare i Tupanana taxãxü̃. Rü ñu̱xũchi Tupanapatape̱xegu tá tayama̱x. Rü ngẽma Aróü̃ nanegü i chacherdótegü tá nanayauxgü ya yimá nagü. Rü yimámaxã tá nanama̱xcugü i nacüwagü i ngẽma ãmarearü guruxü̃.

^3-4 Rü yíxema tümaxü̃na ixãxẽ nax Cori ya Tupanaca̱x tayamáxü̃ca̱x nax ngẽmamaxã tanangüxmüxẽẽxü̃ca̱x, rü name i Cori ya Tupanaca̱x tayagu i norü chíxü̃ i naü̃nütawa ngẽxmaxü̃, rü yima taxre ya norü ñuxmigü guxü̃ i norü chíxü̃maxã, rü ngẽma chíxü̃ i namachica̱xwe̱xwa ngẽxmaxü̃ rü ngẽma nacaarü chíxü̃ i wüxigu norü ñuxmigümaxã nayaxuxü̃.

⁵ Rü nüma i chacherdótegü tá nixĩ i ãmarearü guruü̃arü üxü i yauranewa ínaguaxü̃ wüxigu ngẽma naxü̃namaxã. Rü ngẽma naema i ngẽma ãmare, rü Cori ya Tupana rü tá namaxã nataãxẽ.

⁶ Rü ngẽxguma texé tümaxü̃natanüwa Cori ya Tupanana naxãxgu i wüxi i carnéru nax Cori ya Tupanaca̱x tayamáxü̃ca̱x nax ngẽmamaxã tanangüxmüxẽẽxü̃ca̱x, rü name nax wüxi i naxü̃na i yatüxü̃ rüe̱xna ngexü̃ i taxuwama chixexü̃ nax yixĩxü̃.

^7-8 Rü ngẽxguma texé choxna namuxgu i wüxi i carnéru, rü yíxema ãmare ixãxẽ rü tá naerugu tingõgü i ngẽma tümaarü ãmare i Tupanana taxãxü̃. Rü ñu̱xũchi Tupanapatape̱xegu tá tayama̱x. Rü ngẽma Aróü̃ nanegü i chacherdótegü tá nanayauxgü ya yimá nagü. Rü yimámaxã tá nanama̱xcugü i nacüwagü i ngẽma ãmarearü guruxü̃.

^9-10 Rü yíxema tümaxü̃na ixãxẽ nax Cori ya Tupanaca̱x tayamáxü̃ca̱x nax ngẽmamaxã tanangüxmüxẽẽxü̃ca̱x, rü name i Cori ya Tupanaca̱x tayagu i norü chíxü̃, rü narexü̃ i nawemüxü̃ íyacuáxü̃gu idaene, rü norü chíxü̃ i naü̃nütawa ngẽxmaxü̃, rü yimá taxre ya ñuxmigü guxü̃ i norü chíxü̃maxã, rü ngẽma chíxü̃ i namachica̱xwe̱xwa ngẽxmaxü̃ rü ngẽma nacaarü chíxü̃ i wüxigu norü ñuxmigümaxã nayaxuxü̃.

¹¹ Rü ñu̱xũchi ngẽma chacherdóte rü ãmarearü guruü̃étüwa tá ínanagu i guxü̃ma i ngẽma ãmare. Rü ngẽma ãmare rü õna i Cori ya Tupanaca̱x íguxü̃ nixĩ.

^12-13 Rü ngẽxguma texé choxna namuxgu i wüxi i cabra, rü yíxema ãmare ixãxẽ rü tá naerugu tingõgü i ngẽma tümaarü ãmare. Rü ñu̱xũchi Tupanapatape̱xegu tá tayama̱x. Rü ngẽma Aróü̃ nanegü i chacherdótegü tá nanayauxgü ya yimá nagü, rü yimámaxã tá nanama̱xcugü i nacüwagü i ngẽma ãmarearü guruxü̃.

^14-15 Rü yíxema tümaxü̃na ixãxẽ nax Cori ya Tupanaca̱x tayamáxü̃ca̱x rü tayaguxü̃ca̱x, rü name i Cori ya Tupanaca̱x tayagu i guxü̃ma i norü chíxü̃ i naü̃nütawa ngẽxmaxü̃, rü yimá taxre ya ñuxmigü guxü̃ i norü chíxü̃maxã, rü ngẽma chíxü̃ i namachica̱xwe̱xwa ngẽxmaxü̃ rü ngẽma nacaarü chíxü̃ i wüxigu norü ñuxmigümaxã nayaxuxü̃.

¹⁶ Rü ñu̱xũchi ngẽma chacherdóte rü ãmarearü guruü̃étüwa tá ínanagu i guxü̃ma i ngẽma ãmare. Rü ngẽma ãmare rü õna i Cori ya Tupanaca̱x íguxü̃ nixĩ. Rü ngẽma naema i ngẽma õna rü Cori ya Tupana rü tá namaxã nataãxẽ. Rü guxü̃ma i ngẽma chíxü̃ rü Cori ya Tupanaarü nixĩ.

¹⁷ Rü ngẽma nixĩ i wüxi i mu i guxü̃gutáma ngẽxmaechaxü̃ i pexacügüwa rü petaagüwa pexüexẽẽchigüxü̃ i ngextá ípemaxẽxü̃wa. ¡Rü taxũtáma penangõ̱x i ngẽma chíxü̃ rü yimá nagü! —ñanagürü.