Lebítanüxü̃arü puracüchiga 2 - Tupanaarü Ore

Ãmare i tríguarü o

¹ Rü ngẽxguma texé Cori ya Tupanaxü̃ trigute̱xemaxã ãmareã̱xgu, rü name nax chauxü̃tawa tanangexü̃ i ngẽma trigute̱xe i rümemaexü̃. Rü ngẽmaétü tá nabaxü̃ i chíxü̃ rü tá nagüxü̃xü̃ i pumarate̱xe.

² Rü ngẽmawena rü Aróü̃ nanegü i chacherdótegüxü̃tawa tá tanange. Rü wüxi i ngẽma Aróü̃ nane rü tá wüxi i naxme̱xãcu nayaxu i trigute̱xe i chíxü̃ã́xü̃ rü pumate̱xeã́xü̃. Rü ngẽma ãmarearü guruü̃wa tá nayagu nax ngẽmawa choxna tacua̱xãchixü̃ca̱x. Rü ngẽma naema i ngẽma ãmare, rü choma ya Cori ya Tupana rü tá namaxã chataãxẽ.

³ Rü ngẽma íyaxüxü̃ rü wüxi i ãmare i poraãcüxüchima üünexü̃ nixĩ natanüwa i guxü̃ma i ngẽma ãmaregü i Cori ya Tupanaca̱x íguxü̃. Rü ngẽma rü Aróü̃ca̱x rü nanegüca̱x rü nataagüca̱x tá nixĩ.

⁴ Rü ngẽxguma curü ãmare rü paũ i ornuwa íguxü̃ yixĩxgu, rü name i trigute̱xe irümemaexü̃ i chíxü̃maxã ñumüxü̃wa cunaxü i ngẽma curü paũ. Rü ngẽma rü ngearü pu̱xẽẽruxü̃ã́xü̃ tá nixĩ. Rü name ta i ãmare i gayétagü i ngearü pu̱xẽẽruxü̃ã́xü̃ i chíxü̃maxã ichagüxü̃.

⁵ Rü ngẽxguma curü ãmare rü trigute̱xe i piripáü̃wa íguxü̃ yixĩxgu, rü name i rümemaexü̃ i trigute̱xewa cunaxü rü chíxü̃maxã cunañumüxü̃ rü ñu̱xũchi nangearü pu̱xẽẽruü̃ã́xü̃.

⁶ Rü íxraxü̃gu tá icunawícu rü ñu̱xũchi chíxü̃maxã tá cunamaxcutanü. Erü ngẽma rü wüxi i ãmare i trigute̱xe nixĩ.

⁷ Rü ngẽxguma curü ãmare rü trigute̱xe i buetarewa cumuxraxü̃ yixĩxgu rü name nax rümemaexü̃ i trigute̱xewa cunaxüxü̃. Rü name i chíxü̃maxã cunaxüéü̃.

⁸ Rü ngẽxguma marü ngẽmaãcü cunamexẽẽgu i curü ãmare, rü name i Cori ya Tupanape̱xewa cunange rü chacherdótena cunaxã. Rü nüma rü ãmarearü guruü̃wa tá nanange.

⁹ Rü ngẽma ãmarearü guruxü̃ íngẽxmaxü̃wa rü nüma i chacherdóte rü tá íxraxü̃ nayaxu i ngẽma ãmare. Rü ngẽma ãmarearü guruü̃wa tá nayagu nax ngẽmawa choxna cucua̱xãchixü̃ca̱x. Rü ngẽma naema i ngẽma ãmare, rü choma ya Cori ya Tupana rü tá namaxã chataãxẽ.

¹⁰ Rü ngẽma íyaxüxü̃ rü wüxi i ãmare i poraãcüxüchima üünexü̃ nixĩ natanüwa i guxü̃ma i ngẽma ãmaregü i Cori ya Tupanaca̱x íguxü̃. Rü ngẽma rü Aróü̃ca̱x rü nanegüca̱x rü nataagüca̱x tá nixĩ.

¹¹ Rü tama name i pu̱xẽẽruü̃maxã penaxüéxü̃ i ngẽma ãmare i trigute̱xenaxca̱x i Cori ya Tupanana pexãxü̃, erü wüxi i ãmare i Cori ya Tupanaca̱x íguxü̃ rü tama name nax nüxü̃́ nangẽxmaxü̃ i berure rüe̱xna pu̱xẽẽruxü̃.

¹² Natürü ngẽxguma Cori ya Tupanana penaxãxgu i nüxíraxü̃güxü̃ i penetüarü o, rü name i namaxã Tupanana penaxã i ngẽma pu̱xẽẽruxü̃ rü berure. Natürü taxũtáma ãmarearü guruü̃wa ípenagu i ngẽma pu̱xẽẽruxü̃ rü berure nax naemamaxã nataãẽxü̃ca̱x ya Cori ya Tupana.

¹³ Rü guxü̃ma i ngẽma ãmare i trigute̱xewa cuxüxü̃ rü tá cunayucüra. Rü tama name nax cunangearü yucüraã́xü̃ i curü ãmare i trigute̱xewa cuxüxü̃, erü yima yucüra rü wüxi i cua̱xruxü̃ nixĩ naxca̱x ga yema uneta ga chomaxã pexüxü̃. Rü guxü̃ma i curü ãmare i trigute̱xewa cuxüxü̃ rü name nax cunayucüraxü̃.

¹⁴ Rü ngẽxguma Cori ya Tupanana cunaxãxgu i wüxi i ãmare i triguwa üxü̃, rü name i nüxíra cubuxuxü̃ i triguwa icunaxã. Rü name i trigu i ngexwaca buxü̃ nax yixĩxü̃. Rü name i üxüwa igoxtanüxü̃ rü meama icamüxü̃ nax yixĩxü̃. Rü ngẽma tá nixĩ i curü ãmare i ngẽma nüxíra cubuxu i curü triguwa cuxüxü̃.

¹⁵ Rü ngẽma ãmareétü tá cunaba i chíxü̃ rü tá cunagü i pumarate̱xe. Erü ngẽma rü wüxi i ãmare i trigu i camüxü̃ nixĩ.

¹⁶ Rü ngẽmawena ya chacherdóte rü íxraxü̃ i ngẽma trigu i camüxü̃ tá nayaxu rü wüxigu namaxã i ngẽma chíxü̃ rü pumarate̱xe tá nayagu. Rü ngẽma ãmare i yaguxü̃wa tá nüxna cucua̱xãchi nax choma ya Cori ya Tupana chixĩxü̃ i cuxna chanaxãxü̃ i guxü̃ma i cuxü̃́ ngẽxmaxü̃.