Lebítanüxü̃arü puracüchiga 10 - Tupanaarü Ore

Nadáx rü Abiúarü pecaduchiga

¹ Aróü̃ nanegü ga Nadáx rü Abiú rü wüxichigü nanayaxu ga noxrütama ã́xwepáxü̃. Rü ngexcürüücümare ga ã́xwe ga tama Tupana naxwa̱xecümaxã nanaxüãcugü. Rü gumá ã́xweétügu nanagü ga norü pumarate̱xe rü ñu̱xũchi Tupanape̱xewa nanangegü nax yemamaxã nüxü̃ yacua̱xüü̃güxü̃ca̱x. Rü yemaacü tama nayanguxẽẽgü ga yema Tupana namaxã nüxü̃ ixuxü̃.

² Rü yemaca̱x Tupanawa ínaxũxũ ga üxüema ga ínaguxü̃. Rü yemaacü Tupanape̱xegu nayue.

³ Rü nüma ga Moiché rü Aróü̃xü̃ ñanagürü: —Ñaachiga nixĩ ga yema Cori ya Tupana nüxü̃ ixuxü̃ ga yexguma ñaxgux: “Rü yíxema choxna ngaicamachaü̃xe rü choma rü tá tüxü̃ chanawe̱x nax aixcüma chaxüünexü̃. Rü guxü̃ma i Iraétanüxü̃pe̱xewa tá ichanawe̱x i chorü pora”, ñaxgu —ñanagürü ga Moiché. Rü nüma ga Aróü̃ rü yéma nangea̱xmare.

⁴ Rü ñu̱xũchi nüma ga Moiché rü naxca̱x naca ga Michaé rü Echapáü̃. Rü nümagü rü Aróü̃ nanepü ga Uchié nanegü nixĩ. Rü ñanagürü nüxü̃: —¡Yéa Tupanapatawa ípeyada̱u̱x i ngẽma petanüxü̃ rü peyato i naxü̃negü! ¡Rü duü̃xü̃gü ípegüxü̃arü ĩxpemagu peyata̱xgü! —ñanagürü.

⁵ Rü nümagü ga Michaé rü Echapáü̃ rü yéma naxĩ, rü yema naxchirugümaxãtama nananuquegü. Rü yemaacü nayato ga naxü̃negü rü nayata̱xgü, yema Moiché namaxã nüxü̃ ixuxü̃rüxü̃.

Chacherdótegüarü puracüchiga

⁶ Rü yemawena ga Moiché rü nayaxucu̱xẽ ga Aróü̃ rü nanegü ga Ereachá rü Itamá rü ñanagürü: —¡Taxũtáma pegü pexĩxerugüxẽxẽ rü pegüchirugu pegáugüe nax ngẽmaãcü ipenawéxü̃ca̱x i perü ngechaü̃ naxca̱x i ngẽma yuexü̃! Erü ngẽxguma ngẽmaãcü penaxü̱xgu rü ngürüãchi pema rü tá ta peyue rü guxü̃táma i Iraétanüxü̃maxã nanu ya Tupana. Natürü name nax guxü̃ma i ngẽma togü i Iraétanüxü̃ naxca̱x auxexü̃ i ngẽma taxre i norü chixexü̃gagu Cori ya Tupana daixü̃.

⁷ Natürü i pemax i chacherdótegü nax pixĩgüxü̃ ¡rü taxũtáma nüxna pixĩgachi ya yima Tupanapata nax tama peyuexü̃ca̱x! Erü pema rü woetama Tupanaarü puracüca̱x pexü̃ naxuneta, rü yemaca̱x chíxü̃ i üünexü̃maxã pexü̃ chibaeru —ñanagürü ga Moiché. Rü yema Moiché namaxã nüxü̃ ixuxü̃ãcü nanaxügü.

^8-9 Rü yemawena ga nüma ga Cori ya Tupana rü Aróü̃maxã nidexa rü ñanagürü nüxü̃: —Ngẽxguma cuma rüe̱xna cunegü ngẽxma chopatagu pechocu̱xgu rü tama name ya bínu ya ngúcü rüe̱xna ta̱xacü i to i ngúxü̃ pixaxgü. Rü ñaa pemaxã nüxü̃ chixuxü̃, rü ngẽma nixĩ i wüxi i mu i guxü̃gutáma nagu pexĩxü̃ i cuma rü cunegü rü cutaagü.

^10-11 Erü penaxwa̱xe i mea peãẽxü̃ pecua̱x nax nüxü̃ pecuáxü̃ca̱x i ngexü̃rüüxü̃ nixĩ i ngẽma üünexü̃ rü ngexü̃rüüxü̃ nixĩ i ngẽma tama üünexü̃, rü ngexü̃rüüxü̃ nixĩ i ngẽma Tupanape̱xewa mexü̃ rü ngẽma Tupanape̱xewa ãũãchixü̃. Rü ngẽmaãcü tá meama penangúexẽxẽ i ngẽma Iraétanüxü̃gü nax nagu naxĩxü̃ i guxü̃ma i chorü mugü i Moichéwa pemaxã nüxü̃ chixuxü̃ —ñanagürü ga Tupana.

¹² Rü yemawena nüma ga Moiché rü Aróü̃maxã rü Ereachámaxã rü Itamámaxã nidexa. Rü yema taxre nixĩ ga Aróü̃ nanegü ga íyaxügüxü̃. Rü ñanagürü nüxü̃: —¡Rü ngẽma ãmare i trigute̱xe i Cori ya Tupanaca̱x piguxü̃wa íyaxüxü̃ rü wüxi i paũ i ngearü pu̱xẽxẽruü̃ã́xü̃ nawa pexü̱x! ¡Rü ãmarearü guruxü̃xü̃tawa penangṍ, erü ngẽma trigute̱xe rü naxüünexü̃chi!

¹³ Rü name i wüxi i nachica i üünexü̃wa penangõ̱x, erü ngẽma ãmare i trigute̱xe i Cori ya Tupanaca̱x yagugüxü̃wa íyaxüxü̃ rü cuxrü rü cunegüarü rü cuxacügüarü nixĩ. Rü ngẽma nixĩ i chomaxã nüxü̃ yaxuxü̃ ya Cori ya Tupana nax cumaxã nüxü̃ chixuxü̃ca̱x.

¹⁴ Rü cuxrü rü cunegüarü nixĩ i ngẽma ãmare i naremümachi i chü̱xãcüüãcüma Tupanana pexãxü̃ rü yima naperema i duü̃xü̃gü Tupanana ãgüne. Rü ngẽxguma cuma rü cunegü rü cuxacügü penangõ̱xgu, rü penaxwa̱xe i wüxi i nachica i ngearü ãũãchixü̃ã́xü̃wa penangõ̱x. Erü ngẽma nixĩ i ãmare i Iraétanüxü̃ Tupanaxü̃ namaxã rüngüxmüxẽẽgüxü̃.

¹⁵ Rü yima naperema ya duü̃xü̃gü Tupanana ãxü̃ne rü ngẽma naremümachi i yachü̱xüxãcüüxẽẽãcüma Cori ya Tupanana pexãxü̃ rü ngẽma chíxü̃ i tá piguxü̃ rü wüxigu yachü̱xüxãcüüxẽẽãcüma tá Cori ya Tupanana peyaxã. Rü ngẽmawena rü ãmarearü guruü̃wa tá peyagu i ngẽma chíxü̃, natürü yima naperema rü ngẽma naremümachi rü guxü̃gutáma cuxca̱x rü cunegüca̱x rü cuxacügüca̱x tá nixĩ. Rü ngẽmaãcü nixĩ i Cori ya Tupana nüxü̃ yaxuxü̃ —ñanagürü ga Moiché.

¹⁶ Rü yemawena ga Moiché rü naxca̱x ínaca ga yema chíbu ga yatüxü̃ ga pecaduarü ütanüca̱x ixĩxü̃. Natürü yexguma nüxü̃ nacua̱xgu nax marü yagugüãxü̃, rü nüma ga Moiché rü namaxã nanu ga yema taxre ga Aróü̃ nanegü ga íyaxügüxü̃ ga Ereachá rü Itamá. Rü ñanagürü nüxü̃:

¹⁷ —¿Tü̱xcüü̃ tama wüxi i nachica i üünexü̃wa penangõ̱x i ngẽma chíbu i pecaduarü ütanüca̱x imáxü̃? Erü ngẽma rü wüxi i ãmare i poraãcü üünexü̃ nixĩ. Rü nüma ya Cori ya Tupana rü marü pexna nanaxã i ngẽma chíbu nax namaxã peyanaxoxẽẽxü̃ca̱x i ngẽma Iraétanüxü̃arü chixexü̃ nax ngẽmaãcü Tupana nüxü̃́ nüxü̃ rüngü̃maxü̃ca̱x i norü pecadugü.

¹⁸ Rü yimá nagü i ngẽma chíbu rü tama Tupanapataarü aixepewa penange. Rü pema rü chi name nax ngẽma Tupanapatawa ngẽxmaxü̃ i nachica i üünexü̃wa penangṍxü̃ i ngẽma chíbumachi, ngẽma choma pemaxã nüxü̃ chixuxü̃rüxü̃ —ñanagürü ga Moiché.

¹⁹ Rü nüma ga Aróü̃ rü Moichéxü̃ nangãxü̃ga rü ñanagürü: —Dücax, ngẽma chaunegü rü ñu̱xma rü marü Cori ya Tupanape̱xewa nayagugü i ngẽma chíbu i norü pecaduarü ütanüruxü̃ ixĩxü̃, rü nayagugü i ngẽma naxü̃nagü i wüxichigü i ngunexü̃ca̱x ixĩxü̃. Natürü ñu̱xma nax changechaü̃xü̃ naxca̱x i ngẽma togü i chaunegü i yuexü̃ rü taxucürüwa chanangõ̱x i namachi i ngẽma chíbu i pecaduarü ütanüruxü̃ ixĩxü̃. Rü ngẽxguma chi choma chanangõ̱xgu ¿rü chomaxã chi nataãẽxü̃ ya Cori ya Tupana? —ñanagürü.

²⁰ Rü yexguma yema Aróü̃arü ngãxü̃gaxü̃ naxĩnügu ga Moiché rü taãẽãcü nanayaxu ga yema Aróü̃arü ngãxü̃.