Lebítanüxü̃arü puracüchiga 1 - Tupanaarü Ore

Ãmaregü i Tupanana naxãgüxü̃

¹ Nüma ga Cori ya Tupana rü napatawa Moichéca̱x naca, rü ñanagürü nüxü̃:

² —¡Ẽcü namaxã nüxü̃ ixu i ngẽma Iraétanüxü̃ rü ngẽxguma texé ãmare choxna ãxgu rü name nixĩ i tümaarütama wocagüwa rüe̱xna tümaarütama carnérugüwa choxna tanamu!

³ Rü ngẽma tümaarü ãmare rü tá tümaxü̃natama nixĩ. Rü wüxi i woca iyatüxü̃ i taxuwama chixexü̃ tá nixĩ. Rü chopataã̱xtüwa ngẽxmaxü̃ i guruü̃wa tá nixĩ i itayaguxü̃. Rü ngẽxguma i choma ya Cori ya Tupana rü tá chanayaxu.

⁴ Rü naerugu tá nixĩ i taxüméxü̃ nax tüxü̃́ chanayaxuxü̃ca̱x i ngẽma tümaarü ãmare, rü tüxü̃́ nüxü̃ icharüngümaxü̃ca̱x i tümaarü chixexü̃gü.

⁵ Rü ngẽma woca i yatüxü̃ rü chopexegu tá nixĩ i tayawiyenaaxü̃. Rü ngẽma Aróü̃ nanegü i chacherdótegü tá nanayauxgü ya yimá nagü. Rü yimamaxã tá ínanamaxegugü i ngẽma ãmarearü guruxü̃ i chopataarü ĩã̱xpe̱xewa ngẽxmaxü̃.

⁶ Rü yíxema choxna naxãxe i ngẽma naxü̃na nax cha̱u̱xca̱x tayaguxü̃ca̱x rü tá tanacauxcha̱xmüxü̃ i ngẽma naxü̃na rü tá tanachexü̃gü.

⁷ Rü ngẽma chacherdótegü tá nixĩ i yanaixẽẽgüxü̃ ya üxü nawa i ngẽma guruxü̃.

⁸ Rü yima üxüwa tá nixĩ i ínaguaxü̃ i ngẽma namachiarü chexü̃güxü̃ rü naeru rü naü̃nütaarü chíxü̃.

⁹ Rü yíxema cha̱u̱xca̱x inaxãxe i ngẽma naxü̃na rü tá meama dexámaxã tayayauxgü i naü̃nüta rü naparagü. Rü nüma ya chacherdóte rü ngẽma guruü̃wa tá ínanagu i guxü̃ma nax choma namaxã chataãxẽxü̃ca̱x i ngẽma naema i ngẽma ãmare.

Chixexü̃güarü ütanüruxü̃ i ãmaregü

¹⁰ Rü ngẽxguma texé tümaarü carnérutanüwa rüe̱xna chíbutanüwa choxna taxãxgu i wüxi i ãmare nax tayaguxü̃ca̱x rü name i wüxi i naxü̃na iyatüxü̃ i ngearü chixexü̃ã́xü̃ nax yixĩxü̃.

¹¹ Rü ngẽma ãmarearü guruü̃arü nórtecüwagu tá chope̱xegu tayawíyenaxã. Rü ngẽma chacherdótegü i Aróü̃ nanegü tá nanayauxgü ya nagü rü yimamaxã tá ínanamaxegugü i ngẽma ãmarearü guruxü̃.

¹² Rü ngẽmawena rü tá nanachexü̃gü. Rü nüma i chacherdóte rü yima üxü ya ãmarearü guruü̃xétüwa iya̱u̱xranewa tá ínanagu i ngẽma namachi wüxigu namaxã i naeru rü naü̃nütagüarü chíxü̃.

¹³ Rü ngẽmawena ya yíxema Tupanaca̱x ãmare iguxe rü tá dexámaxã tayayauxgü i naü̃nüta rü naparagü. Rü nüma i chacherdóte rü ngẽma guruü̃wa tá ínanagu i guxü̃ma nax choma ya Cori ya Tupana namaxã chataãẽxü̃ca̱x i ngẽma naema i ngẽma ãmare.

¹⁴ Rü ngẽxguma wüxi i naxü̃na i ãxpe̱xatüxü̃ yixĩxgu i ngẽma ãmare i tiguxü̃, rü tanaxwa̱xe i wüxi i muxtucu rüe̱xna wüxi i muxtucuxacü nax yixĩxü̃.

¹⁵ Rü nüma ya chacherdóte tá nayacaweeru i ngẽma ãmare. Rü ngẽmawena tá ãmarearü guruü̃cüwawa nanama̱i̱x ya nagü. Rü ñu̱xũchi ngẽma ãmarearü guruü̃wa tá nayagu i ngẽma naxü̃ne.

¹⁶ Rü tá nanayaxu i norü tüe wüxigu namaxã i naü̃, rü ãmarearü guruü̃arü éstewaama tá nanata̱x i tanimaca ínagüxü̃wa.

¹⁷ Rü ngẽmawena rü tümape̱xatügu tá tüxü̃ narügáute ya yíxema muxtucuxacü, natürü taxũtáma tüxü̃ narügáutexüchi nax ngẽmaãcü wüxichigü ya tümape̱xatü rü tümachipanüwatama nangẽxmaxü̃ca̱x. Rü ngẽmawena i nüma i chacherdóte rü yima üxü ya ãmarearü guruü̃étüwa iya̱u̱xranewa tá tüxü̃ nigu. Rü ngẽma rü wüxi i ãmare i üxüwa iguxü̃ tá nixĩ nax choma rü naemamaxã chataãẽxü̃ca̱x.