Ichaía 63 - Tupanaarü Ore

Tupana rü norü uanügüxü̃ napoxcu

¹ —¿Texé tixĩ ya yíxema tümachiru i daucharaxü̃maxã ĩane ya Bochráwa ne ũxẽ i Edóü̃arü naanewa? ¿Rü texé tixĩ ya poraãcü rü nuãcü tümachiru i mexẽchixü̃maxã ngéma ne ũxẽ? Rü choma i Iraétanüxü̃arü Tupana chixĩ i nüxü̃ chixuxü̃ nax charüporamaexü̃. Rü choxü̃́ nangẽxma i pora nax íchananguxü̃xẽẽxü̃.

² ¿Rü tü̱xcüü̃ nadáuchara i cuxchiru ñoma úba namaxã quipumüxü̃rüxü̃?

³ Rü choma rü chanadai i chorü uanügü rü chayapu̱xcutanü ñoma úbaarü bínu ixüxgurüxü̃. Rü chorü numaxã chayapu̱xcutanü, rü yimá nagü i chorü uanügü rü chauxchiruwa nacháixgü.

⁴ Rü marü nawa nangu i ngunexü̃ nax chanaxütanüxü̃ i chorü duü̃xü̃gü nax íchananguxü̃xẽẽxü̃ca̱x.

⁵ Rü guxü̃gu chadawenü rü tataxuma nax texé choxü̃ rüngü̃xẽẽxü̃. Rü chabaixãchi yerü tataxuma nax texé choxü̃ rüngü̃xẽẽxü̃. Rü chorü poramaxãtama nixĩ i charüporamaexü̃ rü chorü nu nixĩ i choxü̃ poraxẽẽxü̃.

⁶ Rü poraãcü chanu rü ngẽmaca̱x chanadai i ngẽma togü i nachixü̃anecüã̱xgü. Rü yimá nagü rü waixü̃müanegu chayaya̱xẽxẽ —ñanagürü.

Tupana rü Iraétanüxü̃xü̃ nangechaü̃

⁷ Pemaxã nüxü̃ chixuxchaü̃ i Tupanaarü ngechaü̃chiga rü chorü wiyaemaxã nüxü̃ chicua̱xüxü̃ naxca̱x i guxü̃ma i ngẽma mexü̃gü i taxca̱x naxüxü̃. Erü poraãcü Iraétanüxü̃maxã namecüma rü poraãcü tüxü̃ nangechaxü̃.

⁸ Rü Tupana rü ñanagürü: —Nümagü rü chorü duü̃xü̃gü nixĩgü, rü chaunegü i aixcüma chauga ĩnüexü̃ nixĩgü —ñanagürü. Rü ngẽmaca̱x norü uanügüme̱xẽwa ínananguxü̃xẽxẽ.

⁹ Rü nüma ya Tupana rü tama togüxü̃ núma namuxü̃ nax norü duü̃xü̃güxü̃ ínanguxü̃ẽẽxü̃ca̱x. Rü nümatama ya Tupana nixĩ ga ínanguxü̃xẽẽãxü̃ nawa ga norü ĩ̱xãchiãxẽ yerü poraãcü nüxü̃ nangechaxü̃ rü nüxü̃́ nangechaü̃tümüxü̃gü. Rü yemaca̱x guxü̃guma norü uanügüme̱xẽwa ínananguxü̃xẽxẽ.

¹⁰ Natürü ga Iraétanüxü̃ rü tama Tupanaga naxĩnüe rü nananuxẽẽgü ga Naãxẽ ya Üünecü. Rü yemaca̱x ga nüma ga Tupana rü yema duü̃xü̃gümaxã narüxuanü rü namaxã nanaxunagü ga nax nadaiaxü̃.

¹¹ Rü nümagü rü nüxna nacua̱xãchie ga yema nũxcüma Moiché üxü̃ ga yexguma Iraétanüxü̃xü̃ ínanguxü̃xẽẽgu. Rü yemaca̱x nügüna nacagüe rü ñanangürügü: —¿Ngexcü nixĩ ya yimá Tupana ga ñoma wüxi ga carnéruarü dauruü̃rüxü̃ Iraétanüxü̃xü̃gümaxã icuácü ga yexguma márwa yachoü̃gu? ¿Rü ñu̱xmax, rü ngextá nixĩ i nangẽxmaxü̃ ya yimá Tupana ga Moichéna namucü ga Naãxẽ ya Üünecü?

^12-13 ¿Rü ngexcü nixĩ i ñu̱xma ya yima Tupana ga norü poramaxã Moichéxü̃ ümücücü? ¿Rü ngexcü nixĩ ya yimá Tupana ga tachigacü ga yexguma már yapachitamaxẽẽgu nax yachoü̃xü̃ca̱x ga norü duü̃xü̃gü ñoma wüxi i cowaru i paanexü̃wa ixüexü̃ i tama iwĩxĩchixü̃rüxü̃?

¹⁴ ¿Rü ngexcü nixĩ ya yimá Tupanaãxẽ ga mea norü duü̃xü̃güxü̃ rüngü̃xẽẽcü ñoma wocagü i metachinüxü̃gu rüngü̃ẽxü̃rüxü̃? —ñanagürügü. Rü Tupanaãẽ rü mea namaxã inacua̱x rü yemaacü Tupana nüxna nadau ga norü duü̃xü̃gü nax natachigaxü̃ca̱x i naéga i üünexü̃.

Iraétanüxü̃arü yumüxẽ i nawa Tupanaarü ngü̃xẽẽca̱x ínacagü

¹⁵ Dücax, Pa Cori Pa Tupanax, cuma nax daxũguxü̃ i naanewa i üünexü̃ i nachicawa nax cumaxü̃xü̃ rü ¿ngexü̃ nixĩ nax aixcüma toxü̃ cungechaxü̃xü̃? ¿Rü ngexü̃ nixĩ i curü pora? ¿Rü ngexü̃ nixĩ nax yáxna tomaxã cuxĩnüxü̃? ¿Ẽ̱xna marü cuxü̃́ inayagu̱x nax cuxü̃́ tangechaxü̃tümüxü̃güxü̃?

¹⁶ Rü cuma nixĩ i tonatü quixĩxü̃. Rü woo Abraáü̃ rü tama toxü̃ cua̱xgu, rü torü o̱xi i Iraé rü tama toxna nacua̱xãchigu, natürü cumax, Pa Cori Pa Tupanax, rü tonatü quixĩ. Rü cuma nixĩ i guxü̃guma torü ngü̃xẽẽruxü̃ quixĩxü̃.

¹⁷ ¿Rü tü̱xcüü̃ toxü̃ cungexrü nax cuxna tixĩgachitanüxü̃ rü tama cuga taxĩnüexü̃? Rü toma nax curü duü̃xü̃gü i Iraétanüxü̃ tixĩgüxü̃ rü cuxna taca nax toxü̃ cungechaü̃xü̃gagu toxca̱x cutaeguxü̃ nax wena toxü̃ cunawéxü̃ca̱x i curü mecüma.

¹⁸ Rü toma rü noxretama ya taunecü nixĩ nax norü yora tixĩgüxü̃ i ñaa tochixü̃ane. Rü ngẽma torü uanügü rü marü nagu napogü ya cupata ya üünene.

¹⁹ Rü ñu̱xma rü toma rü ñoma taguma tomaxã icucuáxü̃rüxü̃ tixĩgü. Rü ñoma taguma cuxü̃ tacuáxü̃rüxü̃ tixĩgü.