Ichaía 61 - Tupanaarü Ore

Nanaxunagü nax ínanguxü̃xü̃ tá i Iraétanüxü̃

¹ Tupanaãxẽ i Üünexü̃ rü chowa nangẽxma, erü Tupana rü choxü̃ naxuneta rü choxü̃ inamuãchi nax yíxema ngearü diẽruã̱xgüxemaxã nüxü̃ chixuxü̃ca̱x i mexü̃ i ore rü tüxü̃ chataãẽxẽẽgüxü̃ca̱x ya yíxema naxĩ̱xãchiãẽgüxe. Rü choxü̃ naxuneta nax yíxema to i nachixü̃anewa gagüxemaxã nüxü̃ chixuxü̃ca̱x nax paxa tá ítanguxü̃xü̃ rü yíxema poxcupataxü̃wa ngẽxmagüxe rü tá ta ítanguxü̃xü̃

² Rü choxü̃ namu nax nüxü̃ chixuxü̃ca̱x rü daa nixĩ ya taunecü ya Tupana nüxü̃ unetacü nax nagu tüxü̃ ínanguxü̃xẽẽxü̃ rü nadaiaxü̃ i tórü uanügü. Rü choxü̃ namu nax tüxü̃ chataãẽxẽẽgüxü̃ca̱x ya guxãma ya yíxema ngechaü̃güxe.

³ Rü ngẽma Chióü̃cüã̱xgü i ngúxü̃ ingegüxü̃, rü Tupana choxü̃ namu nax chanataãẽxẽẽgüxü̃ca̱x nax tama yexü̃cürü ngechaü̃ãcü tanimacaétüwa natogüeechaxü̃ca̱x. Erü nüma ya Tupana rü nanaxwa̱xe nax taãẽxü̃ nanguxuchixü̃ i norü ngechaü̃gü rü taãẽruxü̃ i wiyaegüxü̃ nanguxuchixü̃ i norü ĩ̱xãchiãẽgü. Rü ngẽxguma i duü̃xü̃gü rü tá pexü̃ ñanagürügü: —Tupana rü ñoma poraxü̃ i naigü i roblegü i nüma inatogüxü̃rüxü̃ pewa nanango̱xẽxẽ i norü pora —ñanagürügü tá pexü̃.

⁴ Rü pemax, Pa Yerucharéü̃cüã̱xgüx, rü tá peyamexẽẽgü ya yima ĩanegü ya ü̃pama ichixegüne.

⁵ Rü duü̃xü̃gü i to nachixü̃anecüã̱x rü tá núma naxĩ rü tá nüxna nayadaugü i pexü̃nagü, rü peanegü rü perü úbanecügu.

⁶ Rü tá ñaãcü naxugü: —Tupanaarü chacherdótegü pixĩgü, rü Tupanaarü duü̃xü̃gü pixĩgü —ñanagürügü tá. Rü ngẽma togü i nachixü̃anegüarü ngẽmaxü̃gü rü pexrü tá nixĩgü. Rü norü ngã̱xãẽruü̃gümaxã tá pegü pinga̱xãẽgü.

⁷ Rü pema, Pa Chorü Duü̃xü̃güx, rü taxree̱xpü̱xcüna ngúxü̃ pingegü rü chixexü̃ pemaxã nixugüe rü yemagagu ãne pingegü. Rü ngẽmaca̱x i ñu̱xmax rü taxree̱xpü̱xcüna tá penayaxu i ngẽma pexna üxü̃. Rü guxü̃gutáma petaãẽgü.

⁸ Erü nüma ya Tupana rü naxchi naxai i ngẽma ngĩ́ta̱a̱x rü máeta, natürü nüxü̃ nangechaü̃ i ngẽma aixcüma mexü̃. Rü tá pexna nanaxã i taxü̃ma i perü natanü, rü pemaxã tá nanaxü i wüxi i uneta i tagutáma yagúxü̃.

⁹ Rü guxü̃ma i nachixü̃anegüwa rü tá natachiga i petaagü. Rü ngẽxguma duü̃xü̃gü nüxü̃ daugügu rü tá nüxü̃ nicua̱xãchitanü nax Tupana petaagüxü̃ narüngü̃xẽxẽxü̃.

¹⁰ Choma rü Tupanamaxã chataãxẽ. Rü aixcüma poraãcü namaxã chataãxẽ i chorü Tupana erü nüma choxü̃ ínanguxuchixẽxẽ rü pora choxna naxã nax nüxü̃ charüporamaexü̃ca̱x i chorü uanügü. Rü ñoma wüxi i ãxma̱xchaü̃xü̃rüxü̃ chamexchiruxüchi rü ñoma wüxi i ãtechaü̃xü̃rüxü̃ chaugü changa̱xãẽ.

¹¹ Rü ñoma naxchiregü waixü̃müwa rüxügünerüxü̃ rü ñoma wüxi i naanewa nanetü rüxügüxü̃rüxü̃ rü Tupana rü ngẽxgumarüxü̃ tá ta nanango̱xẽxẽ i nacüma i aixcüma mexü̃ nax guxü̃ma i nachixü̃anegüwa nüxü̃ yacua̱xüü̃güxü̃ca̱x.