Ichaía 52 - Tupanaarü Ore

Yerucharéü̃cüã̱xgü rü norü uanügüme̱xẽwa tá ínanguxü̃

¹ ¡Peba̱i̱xãchie, Pa Chióü̃cüã̱xgüx, peba̱i̱xãchie! ¡Ipechigü rü peporae i pema i yima ĩane ya üünene ya Yerucharéü̃arü duü̃xü̃gü nax pixĩgüxü̃! ¡Rü mexü̃ i pexchirugu picu̱xgü! Erü ngẽma perü uanügü i tama choxü̃ cua̱xgüxü̃ rü tagutáma wena pexca̱x ínayaxüãchi.

² ¡Pa Yerucharéü̃cüã̱xgüx, ipechigü! ¡Marütama nax perü uanügüme̱xẽwa pengẽxmagüxü̃ rü pegümaxãtama ipecua̱xgüxü̃! ¡Pa Chióü̃cüã̱xgü, pema nax pepoxcuexü̃, rü ípeyawẽgü ya yimá cadénagü ya perü uanügü namaxã pexü̃ ichotanaxãgücü!

³ Rü ñanagürü ga Tupana: —Perü uanügü rü ngetanüãcü pexü̃ nigagü rü ngẽmaca̱x i ñu̱xma rü ngetanüãcü tá naxme̱xwa pexü̃ íchanguxü̃xẽxẽ.

⁴ Rü nũxcüma ga chorü duü̃xü̃gü rü Equítuanewa nayamaxẽ, rü Equítuanecüã̱xgüarü mugüruxü̃ nixĩgü. Rü yemawena rü Achíriaanecüã̱xgü rü chixri chorü duü̃xü̃gümaxã inacua̱xgü woo chorü duü̃xü̃gü rü taxuxü̃ma ga guxchaxü̃gü namaxã naxügü.

⁵ Rü ñu̱xma rü ¿ta̱xacü e̱xna nixĩ i namaxã ngupetüxü̃ i ngẽma chorü duü̃xü̃gü? Rü Babiróniaanewa nanagagü taxuxü̃ma i ta̱xacürü chixexü̃ naxügüãcüma. Rü ngẽma namaxã icua̱xgüxü̃ rü taãẽãcü nüxü̃ nacugüe rü guxü̃guma ta̱xacü chomaxã nixugüe.

⁶ Natürü wüxi i ngunexü̃ rü chorü duü̃xü̃gü tá nüxü̃ nicua̱xãchitanü nax choma chixĩxü̃ i namaxã chidexaxü̃ —ñanagürü ya Tupana.

⁷ Rü wüxi i taãxẽ nixĩ nax ma̱xpǘneanewa taxca̱x ne naxũxü̃ ya yimá orearü ngeruxü̃ i mexü̃ i ore taxca̱x nua ngecü rü tamaxã nüxü̃ ixucü nax Tupana tá tüxü̃ rüngü̃xẽẽxü̃ rü tüxü̃ ínanguxü̃xẽẽxü̃ naxme̱xwa i tórü uanü. Rü wüxi i taãxẽ tá nixĩ i ngẽxguma Chióü̃cüã̱xgüxü̃ ñaxgu: —Perü Tupana rü marü pemaxã inacua̱x —ñaxgu.

⁸ Rü tá nüxü̃ pexĩnüe i ngẽma Yerucharéü̃arü dauruü̃gü nax taãẽãcü aita naxüexü̃ i ngẽxguma naxetümaxã nüxü̃ nadaugügu nax Tupana rü Chióü̃ca̱x nataeguxü̃.

⁹ ¡Pa Yerucharéü̃cüã̱xgü i Íyaxügüxü̃x, rü taãẽãcü pewiyaegü erü Tupana rü marü nanataãẽxẽxẽ i norü duü̃xü̃gü rü ínananguxuchixẽxẽ ya perü ĩane ya Yerucharéü̃!

¹⁰ Rü Tupana rü guxü̃ i nachixü̃anegüxü̃ nanawe̱x i norü pora. Rü guxü̃ i nachixü̃anegüwa tá nüxü̃ nacua̱xgü nax tórü Tupana tüxü̃ ínguxü̃xẽẽxü̃.

¹¹ Rü pema i Babiróniaanewa ngẽxmagüxe ¡rü Tupanape̱xewa pegü pemexẽxẽgü rü ípechoxü̃! ¡Rü pemax nax peyanaxü̃ i Tupanapataarü ngẽmaxü̃gü i üünexü̃ rü taxṹ i nüxü̃ pedauxü̃ i ta̱xacürü chixexü̃!

¹² ¡Natürü taxuca̱xma ñu̱xãẽãcü ípechoxü̃ rü pibuxmü! Erü nüma ya perü Tupana i pema i Iraétanüxü̃ rü tá pexna nadau i guxü̃ma i ãũcümaxü̃wa.

Ngúxü̃ tá ninge ya yimá Tupanaarü duü̃ ya Cristu natürü tá nüxü̃ narüyexeraama

¹³ Rü nüma ya Cori ya Tupana rü ñanagürü: —Yimá chorü duü̃ rü tá norü uanüxü̃ narüporamae rü tá chanatachigaxẽxẽ.

¹⁴ Natürü muxü̃ma i duü̃xü̃gü rü tá namaxã naba̱i̱xãchie i ngẽxguma nüxü̃ nadaugügu i nachiwe i poraãcü napíxü̃ rü ãũxü̃ rü ngẽmagagu marü tama nanaduü̃xẽchametüraxü̃.

¹⁵ Rü ngẽxgumarüxü̃ ta rü muxü̃ma i duü̃xü̃gü i to i nachixü̃anecüã̱xgü rü tá namaxã naba̱i̱xãchie. Rü ngẽma ãẽ̱xgacügü rü ngẽxguma nüxü̃ nadaugügu i ngẽma naxüxü̃ rü tá nape̱xewa nachianegümare rü taxuxü̃táma nixugüxe, erü tá nüxü̃ nadaugü i ngẽma taguma nüxü̃ nadaugüxü̃ rü tá nüxü̃ nacua̱xgü i ngẽma taguma ñuxgu texéwa nüxü̃ naxĩnüexü̃ —ñanagürü ya Tupana.