Ichaía 17 - Tupanaarü Ore

Ore ya ĩane ya Damácumaxã tá ngupetüxü̃chiga

¹ Ñaa nixĩ i Tupanaarü ore ya ĩane ya Damácuchiga ixĩxü̃. Damácu rü tá inayarüxo nax ĩane yixĩxü̃. Rü natüchixica tátama ngéma nayaxǘ.

² Rü yima ĩane rü ngéma nata̱xmare rü maxẽnecüxü̃ tá nixĩ i nachitaxü̃. Rü naxü̃nagü rü ngéma tá mea nayachibüe rü taxúema tá tanachixewe.

³ Rü Efraíü̃anewa rü tá inayarüxo ya yima norü ĩanegü ya ípoxegugüne. Rü yima ĩane ya Damácu rü ngẽxgumarüxü̃ tá ta inayarüxo. Rü ngẽma Chíriaanewa íyaxügüxü̃ i duü̃xü̃gü rü norü ngẽmaxü̃gü rü Iraétanüxü̃arü tá nixĩgü. Rü Cori ya Tupana ya Guxãétüwa Ngẽxmacü nixĩ ya ngẽma ñacü.

Iraéanecüã̱xgüarü poxcu i tá naxca̱x ínguxü̃

⁴ Rü ngẽma ngunexü̃gu ya Chamária ya Iraéanearü ĩane ya porane, rü tá nangearü poraã̱x, rü tá inayarütauxe i norü ngẽmaxü̃gü.

⁵ Rü yima ĩane ya Chamária rü ñoma wüxi i trigunecü i buxgüxü̃rüxü̃ tá nangeãcu. Rü nüma i tríguarü buruxü̃ rü naxme̱xmaxã nüxü̃ nayayauxãchi rü nayawí i ngẽma trigu i ngẽmaãcü nangeãcu i ngẽma nachitaxü̃. Rü Chamária rü ngẽxgumarüxü̃ tá ta nangeãcu ngẽma Refaíü̃arü doxonexü̃ ngeãcuxü̃rüxü̃ nawena nax marü nabuxuxü̃ i trigu

⁶ Rü ngẽma noxretama i oribugü i ngéma yaxüxü̃rüxü̃acü tá nixĩ i ngẽma noxre i duü̃xü̃gü ya yima ĩanegüwa yaxǘgüxü̃. Rü norü buxwena rü ngẽma taxre rüe̱xna tomaepü̱x i oribuarü o i natanüpe̱xewa rüe̱xna ngẽma ãgümücü rüe̱xna wüxime̱e̱xpü̱x i nachacüüpe̱xewa yaxüxü̃rüxü̃ tá nixĩ. Rü Cori ya Tupana ya Iraétanüxü̃arü Tupana nixĩ ya ngẽma ñacü.

⁷ Rü ngẽma ngunexü̃gu rü nüma ya yatü rü tá nüxna nacua̱xãchi ya yima nango̱xẽẽcü ya Cori ya Tupana ya Üünecü ya Iraétanüxü̃arü Tupana ixĩcü.

⁸ Rü taxũtáma nagu narüxĩnü i ngẽma ãmarearü guruü̃gü rüe̱xna ta̱xacü i to i nümatama naxme̱xmaxã naxüxü̃ nax norü tupanagüxü̃ yacua̱xüü̃güxü̃ca̱x. Rü taxũtáma nagu narüxĩnü i ngẽma naixmena̱xãgü i namaxã natupanaã́xü̃ rü ngẽma ãmarearü guruü̃gü i nawa norü tupananetagüca̱x yaguxü̃ i pumarate̱xe.

⁹ Rü ngẽma ngunexü̃gu ya yima Iraéanearü ĩanegü ya meama ípoxegugüne rü tá nangeãcu. Rü ngẽma duü̃xü̃gü i nagu ãpatagüxü̃ rü tá naxĩgü, yexguma Iraétanüxü̃cha̱xwa norü ĩanegüna naxĩgügurüxü̃ ga Ebéutanüxü̃ rü Amoréutanüxü̃. Rü guxü̃nema ya yima ĩanegü rü nachica i chianexü̃mare nixĩgü,

¹⁰ Erü pemax, Pa Iraétanüxü̃x, rü nüxü̃ perüngümae ya Tupana ya pexü̃ ípoxü̃cü. Rü tama nüxna pecua̱xãchie nax nüma yixĩxü̃ i pexna nadauxü̃ nax taxúema pexü̃ chixewexü̃ca̱x. Natürü i ñu̱xma rü ípenato i mexẽchixü̃ i perü nanetügü rü úbagü nax ngẽmamaxã nüxü̃ picua̱xüü̃güxü̃ca̱x i tupananetagü.

¹¹ Rü ngẽma ngunexü̃ i nagu penatoxü̃ i ngẽma penetügü rü mea nüxna pedau nax moxü̃ãcü naxüxü̃ca̱x. Natürü wüxi i ngunexü̃ tá naxca̱x ínangu i norü da̱xaweane i ngearü üxü̃ã́xü̃ rü pema rü tá ngúxü̃ pingegü i ngẽxguma pexü̃́ nayuegu.

¹² Rü dücax, nüxü̃ pexĩnüe i ngẽma churaragü i muxũchixü̃ i perü uanügü i ãũgatanüxü̃ ñoma már arü yuapegü ãũgaxü̃rüxü̃. Rü ngẽma nixĩ i naga nax wáita naxüexü̃ i nachixü̃anegü i perü uanügü ixĩgüxü̃. Rü naga rü ñoma dexá i yuapexü̃ i tama íyachaxãchixü̃garüxü̃ nixĩ.

¹³ Natürü ngẽxguma Cori ya Tupana nüxna puragügu rü tá na̱xcha̱xwa nibuxmü, rü yáxü̃wama tá nabuxmü, ñoma wüxi i maxẽ i paxü̃ i buanecü ingexü̃ rü máxpü̱xanexü̃gu yanguxü̃rüxü̃ tá nixĩgü. Rü ñoma buanecü ya tacü rü íxã̱ũ̱xẽmacü i chuxchuxü̃ nawo̱xoxochicü rü yáxü̃wa ngexü̃rüüxü̃ tá nixĩgü.

¹⁴ Rü yáuanecü rü poraãcü naxãũcüma i ngẽma uanügü, natürü naxü̃pa nax yangóonexü̃ rü marü nayue. Rü ngẽma tá nüxü̃ nangupetü i ngẽma duü̃xü̃gü i tórü ngẽmaxü̃gü dexü̃ rü tüxü̃ daixü̃.