Popera ga Yudíugü ga yaxõgüxü̃ca̱x ümatüxü̃ 5 - Tupanaarü Ore

¹ Rü guxü̃ma i ngẽma chacherdotegüarü ãẽ̱xgacügü rü yatügütanüwa nüxü̃ naxunetagü nax nüma rü duü̃xü̃güxü̃ ínapoxü̃ i Tupanape̱xewa rü Tupanaca̱x inaxããxü̃ca̱x i ãmaregü rü nadaiaxü̃ca̱x i naxü̃nagü nax ngẽmaãcü Tupana duü̃xü̃güaxü̃́ nüxü̃ iyanangümaxü̃ca̱x i norü pecadugü.

² Natürü ngẽma chacherdotegüarü ãẽ̱xgacü rü duü̃xü̃tama nixĩ rü ngẽmaca̱x nüxü̃ nacua̱x nax yáxna namaxã naxĩnüxü̃ i duü̃xü̃gü i ngẽxguma naechitamare pecadu naxüegu.

³ Rü ngẽma chacherdotegüarü ãẽ̱xgacü rü tama ngẽma duü̃xü̃güarü pecaduca̱xicatama nixĩ i Tupanaca̱x ínaguaxü̃ i naxü̃nagü, natürü noxrütama pecaduca̱x rü ta nixĩ i ínaguaxü̃ i naxü̃nagü nax ngẽmaãcü Tupana nüxü̃́ nüxü̃ rüngü̃maxü̃ca̱x i noxrütama pecadugü rü ngẽma duü̃xü̃güarü pecadugü rü ta.

⁴ Rü taxúema tügütama tingucuchixẽxẽ nax chacherdotegüarü ãẽ̱xgacü tixĩxü̃ca̱x. Natürü Tupana nixĩ ya tüxü̃ unetacü rü tüxna naxãcü i ngẽma puracü nax chacherdotegüarü ãẽ̱xgacü tixĩxü̃ca̱x, yexgumarüxü̃ ga Tupana rü Aróü̃xü̃ nax yangucuchixẽẽxü̃rüxü̃ nax chacherdotegüarü ãẽ̱xgacü yixĩxü̃ca̱x.

⁵ Rü yexgumarüxü̃ ga Ngechuchu rü tama nügütama ningucuchixẽxẽ nax Tupanape̱xewa tórü poxü̃ruxü̃ i chacherdotegüarü ãẽ̱xgacü yixĩxü̃ca̱x. Natürü Tupana nixĩ ga yangucuchixẽẽcü. Yerü Tupanatama nixĩ ga nüxü̃ ñacü: “Cuma nixĩ i Chaune. Rü ñu̱xma chanango̱xẽxẽ nax Chaune quixĩxü̃”, ñacü.

⁶ Rü tóxnamana i Tupanaarü ore i ümatüxü̃wa rü ñanagürü ta: “Cuma nixĩ i guxü̃gutáma duü̃xü̃güarü poxü̃ruxü̃ i chacherdotegüarü ãẽ̱xgacü quixĩxü̃, gumá chacherdóte ga Melquichedéxrüxü̃”, ñanagürü.

⁷ Rü yexguma Cristu ñoma ga naanewa maxü̃gu, rü poraãcü nayumüxẽ rü tagaãcü rü naxauxãcü Tupanana naca nax nüxü̃ nangü̃xẽẽxü̃ca̱x nax naga naxĩnüxü̃ca̱x, yerü Tupana rü naporachire̱x nax nawa ínanguxuchixẽẽãxü̃ca̱x ga yema yu. Rü Tupana rü Cristuxü̃ naxĩnü yerü Tupanaga naxĩnü.

⁸ Rü nüma ga Cristu rü woo Tupana Nane nax yixĩxü̃, rü yema ngúxü̃ ga yangexü̃wa nangu̱x nax Tupanaga naxĩnüxü̃.

⁹ Rü yemaacü Tupanaga naxĩnü rü curuchagu nayu nax tümaarü maxẽxẽẽruxü̃ yixĩxü̃ca̱x ya guxãma ya yíxema naga ĩnüexe.

¹⁰ Rü Tupana rü Nanexü̃ ningucuchixẽxẽ nax tórü poxü̃ruxü̃ i chacherdotegüarü ãẽ̱xgacü yixĩxü̃ca̱x yema chacherdóte ga Melquichedéxrüxü̃.

Wüxi i ãũcümaxü̃chixü̃ nixĩ nax nüxü̃ rüxoexü̃ nax yaxõgüxü̃

¹¹ Rü ñu̱xma rü toxü̃́ nangẽxma i muxũchixü̃ma i ore i Cristuchiga ixĩxü̃ i pemaxã nüxü̃ tixuxchaü̃xü̃. Natürü naguxchaxüchi nax meama pemaxã tanango̱xẽẽxü̃ i ngẽma, erü pema rü tama pexü̃́ natauxcha nax nüxü̃ pecuáxü̃.

¹² Rü marü ñuxgumama nüxü̃ nax pecuáxü̃ i Tupanaarü orechiga, rü pema rü chi marü namaxã pengúexẽẽtae. Natürü i pema rü ñu̱xma rü ta penaxwa̱xe nax wena pemaxã tanango̱xẽẽxü̃ i ngẽma Tupanaarü ore i tauxchaxü̃ i nawa inaxügüxü̃ nax Tupanachigaxü̃ icuáxü̃. Rü tama nüxü̃ pecua̱xgüéga i ngẽma Tupanaarü ore i yexeraãcü tamaxã nüxü̃ ixuxü̃ i Cristuchiga. Rü ngẽmaãcü i pemax, rü ñoma õxchana i naégünenixü̃wa mãĩxü̃rüü̃tama pixĩgü.

¹³ Rü yíxema yaxṍxe ya tama mea Tupanaarü orexü̃ cuáxe, rü ñoma õxchana i maixü̃rüxü̃ tixĩ. Rü tama nüxü̃ tacua̱x i ta̱xacü nixĩ i mexü̃ rü ta̱xacü nixĩ i chixexü̃.

¹⁴ Natürü yíxema yaxṍxe ya nüxü̃ cuáxe nax mea tanangugüxü̃ nax ta̱xacü yixĩxü̃ i ngu̱xẽẽtae i mexü̃ rü ẽ̱xna chixexü̃, rü aixcüma nüxü̃ tacua̱x i Tupanaarü ore. Rü yíxema rü ñoma wüxi i duü̃xü̃ i yáxü̃ i namachimaxã ãwemüxü̃rüxü̃ tixĩ.