Ester 5 - Tupanaarü Ore

Ãẽ̱xgacüxü̃tawa ixũ ga Ité

¹ Rü tomaepü̱x ga ngunexü̃guwena rü ngĩma ga Ité rü nagu iyacu̱x ga ngĩrü ãẽ̱xgacüma̱xchiru rü ñu̱xũchi ãẽ̱xgacüpatagu ixücu. Rü yema ucapu ga ãẽ̱xgacü nawa rütoxü̃arü ĩã̱xarü we̱xgu iyachi ga ãẽ̱xgacü mea ngĩxü̃ ídauxü̃wa.

² Rü nüma ga ãẽ̱xgacü rü yexguma ngĩxü̃ nada̱u̱xgu ga Ité nax yexma nachixü̃, rü ngĩmaxã nataãxẽ rü nanawe̱xnagü ga norü úirumena̱xã. Rü ngĩma ga Ité rü naxca̱x iyaxũ rü norü úirumena̱xãpe̱xegu iyarüngógü.

³ Rü nüma ga ãẽ̱xgacü rü ngĩxna naca rü ñanagürü: —¿Ta̱xacü cuxü̃ nangupetü, Pa Itéx? ¿Rü ta̱xacü cunaxwa̱xe? ¡Rü woo chi ngãxü̃gu i chauchixü̃aneca̱x choxna cuca̱xgu rü chi cuxna chanaxã! —ñanagürü. Rü Ité rü inangãxü̃ rü ngĩgürügü:

⁴ —Rü ngẽxguma chi curü me yixĩxgu, Pa Ãẽ̱xgacüx, rü cuxna chaxu nax chauxü̃tawa cuxũxü̃ca̱x erü cuxca̱x rü Amáü̃ca̱x chanaxü i wüxi i õna i mexü̃ i ñu̱xmax —ngĩgürügü.

⁵ Rü nüma ga ãẽ̱xgacü rü norü duü̃xü̃güxü̃ namu rü ñanagürü: —¡Naxca̱x peda̱u̱x ya Amáü̃ rü nua naxũ nax ngẽmaãcü nataãẽxü̃ca̱x i Ité! —ñanagürü. Rü ñu̱xũchi ga nüma ga ãẽ̱xgacü rü Amáü̃ rü yéma naxĩ nawa ga yema õna ga Ité naxca̱x üxü̃.

⁶ Rü yexguma ínachibüeyane rü nüma ga ãẽ̱xgacü rü Itéxü̃ ñanagürü: —¡Choxna naxca̱x naca i ta̱xacü i cuma cunaxwa̱xexü̃ rü tá cuxna chanaxã woo chitama ngãxü̃gu i chauchixü̃aneca̱x choxna cuca̱xgu! —ñanagürü.

⁷ Rü ngĩma ga Ité rü inangãxü̃ rü ngĩgürügü: —Ñaaxicatama nixĩ i ngẽma chanaxwa̱xexü̃ i tá cuxna naxca̱x chacaxü̃.

⁸ Pa Ãẽ̱xgacüx, ngẽxguma chi aixcüma choxü̃ cungechaü̃gu, rü chi curü me yixĩxgu i ngẽma chanaxwa̱xexü̃, rü chi choxna cunaxãxchaü̃gu i ngẽma cuxna naxca̱x chacaxaxü̃, rü cuxna chaxu nax moxü̃arü ngunexü̃gu Amáü̃maxã nua chauxü̃tawa pexĩxü̃ naxca̱x i to i õna i pexca̱x tá chamexẽxẽxü̃. Rü ngéma tá nixĩ i cumaxã nüxü̃ chixuxü̃, Pa Ãẽ̱xgacüx, i ngẽma choxna naxca̱x cuca̱a̱xü̃ —ngĩgürügü.

Amáü̃ rü Maduquéuca̱x nanaxü ga wüxi ga wẽxnaachicaxü̃

⁹ Rü nüma ga Amáü̃ rü poraãcü nataãẽãcüma nataegu nawa ga chibü. Natürü yexguma ãẽ̱xgacüpataarü ĩã̱xwa ínaxũxũxgu rü poraãcü nanu, yerü ga Maduquéu ga ĩã̱xwa yexmacü rü tama inachi rü bai ga nax naxĩã̱xãchixü̃ ga yexguma nüxü̃ nada̱u̱xgu ga yéma nax naxüpetüxü̃.

¹⁰ Natürü nüma ga Amáü̃ rü yexgumatama tama nügü nango̱xẽxẽ ga nax nanuxü̃. Rü yexguma nachiü̃wa nanguxgu rü namücügüca̱x nangema rü ngĩxca̱x nangema ga Chére ga naxma̱x.

¹¹ Rü yema namücügüpe̱xewa inanaxügü ga nügü nax yacua̱xüü̃xü̃. Rü nüxü̃ nixu nax ñuxãcü namuarü ngẽmaxü̃ã̱xü̃chixü̃ rü namuxacüxüchixü̃ rü ñuxãcü ãẽ̱xgacü nüxü̃ icua̱xüü̃xü̃ natanüwa ga yema norü ngü̃xẽẽruü̃gü, rü yemaca̱x yema togüétüwa nanaxǘxẽxẽ ga ãẽ̱xgacü.

¹² Rü ñanagürü ta: —Rü chaxicatama nixĩ i choxna naxuxü̃ i Ité i ãẽ̱xgacü naxma̱x nawa i ngẽma õna i ñu̱xma ãẽ̱xgacüca̱x naxca̱x nangemaxü̃. Rü wenaxarü choxna ixu nawa i ngẽma õna i moxü̃ tá ãẽ̱xgacüca̱x naxüxü̃.

¹³ Natürü ngẽxguma nüxü̃ chada̱u̱xgu i ngẽma Yudíu i Maduquéu i ãẽ̱xgacüpataarü ĩã̱xwa rütoxü̃ rü chauãẽwa nangu̱x erü tama choxü̃ nicua̱xüxü̃. Rü ngẽmagagu choxna niña i ngẽma chorü taãxẽ i ãẽ̱xgacü naxma̱x cha̱u̱xca̱x üxü̃ —ñanagürü ga Amáü̃.

¹⁴ Rü yexguma ga naxma̱x rü namücügü rü ñanagürügü nüxü̃: —¡Ẽcü duü̃xü̃güxü̃ naxüxẽxẽ i wüxi i wẽxnaxãchica i 22 metru i norü máchane, rü moxü̃ pa̱xmama rü ãẽ̱xgacüna naca nax ngẽmagu nawẽxnaxãgüaxü̃ca̱x i Maduquéu! ¡Rü ñu̱xũchi ngẽmaãcü chibüwa naxũ namaxã ya ãẽ̱xgacü! Erü marü taxugutáma curüxĩnü i ngẽxguma —ñanagürügü. Rü yema ĩnü rü norü me nixĩ ga Amáü̃ rü yemaca̱x duü̃xü̃güxü̃ nanaxüxẽxẽ ga wüxi ga wẽxnaxãchica.