Ester 10 - Tupanaarü Ore

Natachiga ga Maduquéu

¹ Rü nüma ga ãẽ̱xgacü ga Achuéru rü nanaxunagü nax nüxü̃́ naxütanügüãxü̃ca̱x ga yema nachixü̃anegü ga naxme̱xwa yexmagüxü̃ ga dauxchitaanewa rü márpechinüanewa yexmagüxü̃.

² Rü guxü̃ma ga yema Achuéru üxü̃ ga yexguma ãẽ̱xgacü yixĩxgu rü yema norü porachiga rü yema popera ga Médiaanearü rü Pérchiaanearü ãẽ̱xgacügüchiga nagu ümatüxü̃gu naxümatü. Rü yexgumarüxü̃ ta yema poperagu naxümatü nax ñuxãcü Maduquéuxü̃ natachigaxẽẽxü̃ ga Achuéru rü ñuxãcü norü ngü̃xẽẽruxü̃ ga poraxü̃ nax yixĩxü̃.

³ Rü nüma ga Maduquéu rü ãẽ̱xgacü ga Achuérutüxü̃wa nayexma, rü naeru nixĩ ga guxü̃ma ga yema ãẽ̱xgacüarü ngü̃xẽẽruü̃gü. Rü nüma ga Maduquéu rü guxü̃ma ga Yudíugütanüwa rü ãẽ̱xgacü ga naãẽxü̃ cuácü nixĩ. Rü guxü̃ma ga natanüxü̃ rü nüxü̃ nangechaü̃gü yerü meama namaxã inacua̱x rü guxü̃guma naxca̱x nadau nax ñuxãcü nüxü̃ nangü̃xẽẽxü̃.