Édra 5 - Tupanaarü Ore

Wena inanaxügüe nax Tupanapata ga taxü̃ne namexẽxẽgüxü̃

¹ Rü nüma ga Tupanaarü orearü uruü̃gü ga Aguéu rü Chacaría ga Idú nane, rü yema natanüxü̃ ga Yudíugü ga Yudáanecüã̱xmaxã rü Yerucharéü̃cüã̱xmaxã nüxü̃ nayarüxugüe ga yema ore ga Cori ya Tupana namaxã nüxü̃ ixuxü̃.

² Rü yexguma ga Chorobabé ga Charatié nane rü Yochué ga Yochadáx nane rü wenaxarü inanaxügüe nax nawa napuracüexü̃ ga Tupanapata ga taxü̃nearü mexẽxẽ ga Yerucharéü̃wa. Rü nüma ga Tupanaarü orearü uruü̃gü rü ta nüxü̃ narüngü̃xẽẽgü.

^3-4 Natürü nüma ga Tatenái ga taxtü ga Eufrátearü oéstewaamaarü ãẽ̱xgacü, rü nüma ga Chétaru-bonái rü namücügü, rü Yerucharéü̃wa naxĩ rü Yudíugüna nayacagü rü ñanagürügü: —¿Texé pexü̃ tamu nax wena penamexẽẽxü̃ ya daa Tupanapata ya taxü̃ne rü nax peyamexẽxẽgüxü̃ i norü poxeguxü̃ ya daa ĩane? —ñanagürügü. Rü ñu̱xũchi naxca̱x ínaca ga tümaéga ga guxema Tupanapataarü mexẽẽwa puracüexe.

⁵ Natürü nüma ga Tupana rü nüxna nadau ga yema Yudíugü ga yema puracümaxã icua̱xgüxü̃. Rü yemaacü nataxuma ga texé nüxna nachu̱xuxü̃ nax napuracüeamaxü̃ca̱x. Rü yoxni ga yema Yudíugüarü uanügü rü Pérchiaanearü ãẽ̱xgacü ga Daríuca̱x nanaxümatü ga wüxi ga popera nax nüma namexẽẽãxü̃ca̱x ga yema guxchaxü̃.

⁶ Rü yema popera ga Daríuxü̃tawa namugüxü̃ ga Tatenái, rü Chétaru-bonái, rü norü ngü̃xẽẽruü̃gü ga ãẽ̱xgacügü rü ñanagürü:

⁷ —Pa Ãẽ̱xgacüx, Pa Daríux, rü cuxü̃ tarümoxẽgü.

⁸ Rü cumaxã nüxü̃ tixu nax Yudáanewa ítayadauxü̃ ya napata ya taxü̃ne ya yimá Yudíugüarü Tupana ya Guxãétüwa Ngẽxmacü. Rü yima rü ínanamexẽẽgü nuta ya itaxüchicümaxã. Rü ngẽma naxtapü̱x rü meama mürapewamaxã natüchiã. Rü ngẽma puracü rü naxca̱x napaxaãẽgü rü ngẽmaca̱x paxãma inixũ.

⁹ Rü yema Yudíugü ga yema puracümaxã icua̱xgüxü̃na taca nax texé tixĩxü̃ ga namúxe nax wena namexẽẽgüãxü̃ca̱x ya yima Tupanapata ya taxü̃ne, rü mürapewamaxã nax napexgüãxü̃ i naxchiãwaama.

¹⁰ Rü naxca̱x ítacagü ta ga naégagü ga yema puracümaxã icua̱xgüxü̃ rü tayawǘgüéga nax ngẽmaãcü cumaxã nüxü̃ tixuxü̃ca̱x, Pa Ãẽ̱xgacüx.

¹¹ Rü nüma rü toxü̃ nangãxü̃gü rü ñanagürügü: “Toma rü yimá Tupana ya daxũguxü̃ i naanearü üruxü̃ rü ñoma i naanearü üruü̃arü duü̃xü̃gü tixĩgü. Rü ítanamexẽxẽ ya daa napata ya taxü̃ne ga nũxcümaxü̃chima ga torü o̱xigüarü ãẽ̱xgacü ga Charomóü̃ üxü̃ne”, ñanagürügü.

¹² Rü nüxü̃ nixugügü ta rü ñanagürügü: “Rü torü o̱xigü rü Tupana ya daxũcüã̱xü̃ nanuxẽẽgü rü yemaca̱x nüma ga Tupana rü ãẽ̱xgacü ga Nabucudonochóme̱xẽgu nanayixẽxẽ. Rü nüma ga Nabucudonochó rü nagu napogü ga guma Tupanapata ga taxü̃ne, rü yema duü̃xü̃gü rü ínanayauxü̃ rü Babiróniaanewa nanagagü”, ñanagürügü.

¹³ Rü nüma i Yudíugü rü nüxü̃ nixugüe rü gumá nüxíraü̃cü ga taunecü ga nagu Babiróniaanearü ãẽ̱xgacü yixĩcü ga Chíru, rü nüma ga gumá ãẽ̱xgacü rü nanaxunagü nax guma Tupanapata ga taxü̃ne rü tá wena namexẽẽgüãxü̃.

¹⁴ Rü yexgumarüxü̃ ta nüxü̃ nixugüe rü nüma ga ãẽ̱xgacü ga Chíru rü marü nanawoeguxẽxẽ ga yema Tupanapata ga taxü̃nearü yemaxü̃gü ga úirunaxca̱x rü diẽrumünaxca̱x ga Nabucudonochó Yerucharéü̃wa dexü̃ rü Babiróniaanewa yexmane ga norü tupanapatagu yanuxü̃. Rü nüxü̃ nixugüe ta rü yema Tupanapata ga taxü̃nearü yemaxü̃gü rü ãẽ̱xgacü ga Chíru rü wüxi ga yatü ga Chebacháragu ãégaxü̃na nanana. Rü nüma ga Chebachára nixĩ ga Chíru nüxü̃ unetaxü̃ nax Yudáanecüã̱xarü ãẽ̱xgacü yixĩxü̃ca̱x.

¹⁵ Rü nüma ga ãẽ̱xgacü ga Chíru rü guma Chebacháraxü̃ namu nax guma Yerucharéü̃wa yexmane ga Tupanapata ga taxü̃newa nanaaxü̃ca̱x ga yema yemaxü̃gü. Rü ñu̱xũchi nanamu nax wena namexẽẽgüãxü̃ca̱x ga Tupanapata ga taxü̃ne ga noxritama ínaxüxü̃wa.

¹⁶ Rü yemawena ga nüma ga Chebachára rü Yerucharéü̃wa naxũ, rü nananucu ga guma nutagü ga naxtapü̱xgü nawa ixügücü ga guma Tupanapata ga taxü̃ne. Rü ga duü̃xü̃gü rü yexgumaü̃cüxü rü inanaxügüe ga nawa nax napuracüexü̃, natürü taxũta ningu.

¹⁷ Rü ngẽmaca̱x i ñu̱xmax, Pa Ãẽ̱xgacüx, rü cuxna naxca̱x taca nax naxca̱x cudauxü̃ i Babiróniaanearü poperatanügu nax nüxü̃ cucuáxü̃ca̱x rü aixcüma yixĩxü̃ nax ãẽ̱xgacü ga Chíru naxunagüxü̃ nax wena naxügüã̱xü̃ca̱x ya yima Tupanapata ya taxü̃ne i Yerucharéü̃wa. Rü ñu̱xũchi cuxna naxca̱x taca nax tomaxã nüxü̃ quixuxü̃ca̱x rü ta̱xacü yixĩxü̃ i nagu curüxĩnüxü̃ i cuma i ngẽmachiga —ñanagürügü ga norü poperawa.