Édra 10 - Tupanaarü Ore

Yudíugü rü Tupanamaxã nüxü̃ nixugüe i norü pecadu rü ínanawoxü̃ ga yema ngexü̃gü ga to ga nachixü̃anecüã̱xgü ixĩgüxü̃

¹ Rü yexguma Édra ñaxtüanegu nayangücuchigu norü to̱xma̱xtawa ga guma Tupanapata ga taxü̃ne, rü yéma naxauxãcüma nayumüxẽ, rü Tupanamaxã nüxü̃ nixu ga duü̃xü̃güarü chixexü̃gü. Rü yexgumayane yéma nangugü ga muxü̃ma ga Iraétanüxü̃ ga yatügü, rü ngexü̃gü, rü buxü̃gü, rü Édraxü̃tagu nangutaque̱xe rü wüxigu poraãcü naxauxe.

² Rü yexguma nüma ga Checanía ga Yeié nane ga Eráü̃tanüxü̃ rü ñanagürü Édraxü̃: —Aixcüma nixĩ i Tupanape̱xewa chixexü̃ taxügüxü̃. Erü ngexü̃gü i to i nachixü̃anecüã̱x ixĩgüxü̃ i tama Tupanaaxü̃́ yaxõgüxü̃maxã tixãxma̱xgü i yixema i Iraétanüxü̃. Natürü nangẽxma nax ñuxãcü Tupanape̱xewa tanamexẽẽxü̃ i ngẽma torü chixexü̃.

³ Rü ngẽmaca̱x tórü Tupanape̱xewa tá nüxü̃ tixu nax toxna tixĩgachixü̃ca̱x ya yíxema toxma̱xgü ya tama Tupanaaxü̃́ yaxõgüxe rü yíxema toxocügü ya tümawa toxü̃́ ngẽxmagüxe. Rü ngẽmaãcü ngẽma cuma rü ngẽma togü i duü̃xü̃gü i aixcüma Tupanaga ĩnüexü̃ tomaxã nüxü̃ ixuxü̃rüxü̃ tá naga taxĩnüe ya tórü Cori ya Tupanaarü mugü.

⁴ ¡Rü inachi rü naxü i ngẽma Tupana cuxü̃ muxü̃ nax cunaxüxü̃! Rü toma rü tá cuga taxĩnüe. ¡Ẽcü tomaxã nüxü̃ ixu nax ñuxãcü tá tanamexẽxẽ i ngẽma chixexü̃ i taxüxü̃! —ñanagürü.

⁵ Rü yexguma nüma ga Édra rü inachi rü naxca̱x nangema ga guxü̃ma ga Iraétanüxü̃, rü yema chacherdótegüarü ãẽ̱xgacügü rü norü ngü̃xẽẽruü̃gü ga Lebítanüxü̃. Rü nüxna naca rü tá aixcüma yanguxẽẽgüã ga yema norü unetagü. Rü nümagü rü nanaxuegugü nax yanguxẽẽgüãxü̃ tá.

⁶ Rü yemawena nüma ga Édra rü ínaxũxũ ga Tupanapata ga taxü̃newa rü Yoanáü̃ ga Eriachí nanearü ucapuwa naxũ rü yexma nape ga yema chütaxü̃gu. Rü tama nachibü rü tama naxaxe yerü poraãcüxüchi nangechaü̃ yerü yema Iraétanüxü̃ ga Babiróniawa woeguxü̃ rü tama Tupanaga naxĩnüe.

⁷ Rü yemawena ya Édra rü Yerucharéü̃wa rü Yudáanewa nanaxunagü nax Yerucharéü̃gu naxĩtaque̱xexü̃ca̱x ga guxü̃ma ga yema Iraétanüxü̃ ga Babiróniawa woeguxü̃.

⁸ Rü yema Iraétanüxü̃maxã icua̱xgüxü̃ rü norü ucu̱xẽruü̃gü rü inanaxügü ga wüxi ga mu nax guxü̃ma yexma ĩtaque̱xexü̃ca̱x ga tomaepü̱x ga ngunexü̃gu rü texé ga tama yéma nguxe ga yema tomaepü̱x ga ngunexü̃gu rü tüxna nanapu ga yema tümaarü naane rü tüxü̃ ínata̱xüchigü natanüwa ga yema Babiróniaanewa woeguxü̃.

⁹ Rü yemaacü tomaepü̱x ga ngunexü̃gu rü Yerucharéü̃gu naxĩtaque̱xe ga guxü̃ma ga Yudátanüxü̃ rü Bẽyamíü̃tanüxü̃. Rü meama yimá 9 ya tauemacüarü 20 ga ngunexü̃gu nixĩ ga yexma naxĩtaque̱xexü̃. Rü Tupanapata ga taxü̃neã̱xtüwa narütogü rü yéma nidu̱xrugü yerü namuü̃e naxca̱x ga yema Checanía nüxü̃ ixuxü̃ rü ñu̱xũchi tacü ga pucü naétü nangu.

¹⁰ Rü yexguma ga nüma ga chacherdóte ga Édra rü inachi rü ñanagürü: —Pema rü poraãcü chixexü̃ pexü erü namaxã pixãxma̱xgü i ngẽma ngexü̃gü i to i nachixü̃anecüã̱x ixĩgüxü̃. Rü ngẽmaãcü penayexeraxẽxẽ i Iraétanüxü̃arü chixexü̃gü.

¹¹ Rü ñu̱xma rü name i tórü o̱xigüarü Tupanape̱xewa nüxü̃ pixu nax aixcüma chixexü̃ pexügüxü̃, rü penaxü i ngẽma norü ngúchaü̃. Rü ngẽmaca̱x pemaxã nüxü̃ chixu ¡rü nüxna pixĩgachi i ngẽma duü̃xü̃gü i tama yaxõgüxü̃ rü ngẽma ngexü̃gü i to i nachixü̃anecüã̱xgü ixĩgüxü̃! —ñanagürü.

¹² Rü yexguma yemaxü̃ naxĩnüegu ga guxü̃ma ga yema duü̃xü̃gü rü tagaãcü nanangãxü̃gü rü ñanagürügü: —Ngẽmáacü tá tanaxü i ngẽma toxü̃ cumuxü̃.

¹³ Natürü daa pucü rü tama narüxoéga rü ngẽmaca̱x taxuacüma nua tarütogüecha. Rü ñaa guxchaxü̃ rü taxũtáma wüxi rüe̱xna taxre i ngunexü̃gu name erü toma rü tamuxũchi ya yixema ngẽma pecadu ügüxe.

¹⁴ Rü narümemae i nuxã Yerucharéü̃gu narücho i ngẽma tomaxã icua̱xgüxü̃ nax ngẽmagü toxca̱x idexagüxü̃ca̱x rü namexẽẽgüãxü̃ca̱x i ngẽma torü guxchaxü̃gü. Rü name i to i ngunexü̃gu nua naxĩ i ngẽma to i nachixü̃anecüã̱x i ngexü̃gümaxã ixãxmaxü̃ namaxã i norü ĩanearü ãẽ̱xgacügü i guxchaxü̃güarü mexẽẽruü̃gü. Rü ngẽmaãcü tá tanaxü ñu̱xmata tá tomaxã inangüxmü ya Tupana erü poraãcüma nanu nagagu i torü pecadugü —ñanagürügü.

^15-16 Rü guxü̃ma ga yema Iraétanüxü̃ ga Babiróniawa woeguxü̃ rü norü me nixĩ ga yema ore. Natürü Yonatáü̃ ga Achaé nane rü Yaachía ga Tibá nane rü tama nanayauxgü ga yema ore. Rü Mechuráü̃ rü Chaxtái ga Lebítanüxü̃ rü naétüwa naxügü ga yema taxre. Rü yexguma nümatama ga chacherdóte ga Édra rü nüxü̃ naxuneta ga ñuxre ga yatügü nax natanüxü̃maxãchigü inacua̱xgüxü̃ca̱x nax yemaacü namexẽẽgüãxü̃ca̱x ga wüxíechigüarü guxchaxü̃gü. Rü nümagü ga yema yatügü rü gumá 10 ga tauemacüarü wüxi ga ngunexü̃gu nixĩ ga namaxã nangutaque̱xegüxü̃ nax namexẽẽgüãxü̃ca̱x ga wüxichigüarü guxchaxü̃gü.

¹⁷ Rü gumá nüxíraü̃cü ga tauemacüarü wüxi ga ngunexü̃gu nixĩ ga yagúexü̃ ga nax namexẽẽgüãxü̃ ga norü guxchagü ga guxü̃ma ga yema duü̃xü̃gü ga to ga nachixü̃anecüã̱x ga ngexü̃maxã ixãxma̱xgüxü̃.

¹⁸ Rü yema chacherdótegü ga to ga nachixü̃anecüã̱x ga ngexü̃gümaxã ixãxma̱xgüxü̃ rü ñagü nixĩgü: Yochadáx nane ga Yochuétaagü rü naenexẽgü ga Maachía rü Eriéche rü Yaríx rü Guedaría.

¹⁹ Rü nüma ga yemagü, rü nanaxuegugü nax naxma̱xna tá yaxĩgachitanüxü̃. Rü wüxi ga carnéru tüxü̃ inaxãgü norü ãmareruxü̃ nax Tupana nüxü̃́ nüxü̃ irüngümaxü̃ca̱x ga norü pecadugü.

²⁰ Rü yema Imétaagüwa rü Ananí rü Chebadía nixĩgü.

²¹ Rü yema Aríü̃taagüwa rü Maachía rü Ería rü Chemaía rü Yeié rü Uchía nixĩgü.

²² Rü yema Pachútaagüwa rü Erioenái rü Maachía rü Ismaé rü Natanaé rü Yochabá rü Erachá nixĩgü.

²³ Rü yema Lebítaagüwa rü Yochabá rü Chimí rü Petaía rü Yudá rü Eriéche rü Queraía nixĩgü.

²⁴ Rü yema wiyaeruü̃gütanüwa rü Eriachí nixĩ. Rü yema ĩã̱xarü dauruü̃gütanüwa rü Charúü̃ rü Téreü̃ rü Urí nixĩgü. Rü yema chacherdótegü nixĩ ga to ga nachixü̃anecüã̱x ga ngexü̃gümaxã ixãxma̱xgüxü̃.

²⁵ Rü yema togü ga Iraétanüxü̃ ga yematama guxchaxü̃ nüxü̃́ yexmagüxü̃ rü ñaa nixĩgü: Rü Parótaagüwa rü Ramía, rü Yechía, rü Maquía, rü Miyamíü̃, rü Ereachá, rü Maquía, rü Benaía nixĩgü.

²⁶ Rü Eráü̃taagüwa rü Matanía, rü Chacaría, rü Yeié, rü Axdí, rü Yerimóx, rü Ería nixĩgü.

²⁷ Rü Chatútaagüwa rü Erioenái, rü Eriachí, rü Matanía, rü Yerimóx, rü Chabáx, rü Achichá nixĩgü.

²⁸ Rü Bebáitaagüwa rü Yoanáü̃, rü Ananía, rü Chabái, rü Atái nixĩgü.

²⁹ Rü Banítaagüwa rü Mechuráü̃, rü Marúx, rü Adaía, rü Yachúx, rü Cheá, rü Ramóx nixĩgü.

³⁰ Rü Paxá-moátaagüwa rü Axná, rü Queraá, rü Benaía, rü Maachía, rü Matanía, rü Becharé, rü Binuí, rü Manaché nixĩgü.

^31-32 Rü Aríü̃taagüwa rü Eriéche, rü Ichía, rü Maquía, rü Chemaía, rü Chimeóü̃, rü Bẽyamíü̃, rü Marúx, rü Chemaría nixĩgü.

³³ Rü Achúü̃taagüwa rü Matenái, rü Matáta, rü Chabáx, rü Eriférex, rü Yeremái, rü Manaché, rü Chimí nixĩgü.

^34-37 Rü Banítaagüwa rü Madái, rü Amráü̃, rü Uéx, rü Benaía, rü Bedía, rü Queruí, rü Banía, rü Meremóx, rü Eriachí, rü Matanía, rü Matenái, rü Yaachái nixĩgü.

^38-42 Rü Binuítaagüwa rü Chimí, rü Cheremía, rü Natáü̃, rü Adaía, rü Manadebái, rü Chachaí, rü Charái, rü Acharé, rü Cheremía, rü Chemaría, rü Charúü̃, rü Amaría, rü Yúche nixĩgü.

⁴³ Rü Nébutaagüwa rü Yeié, rü Matatía, rü Chabáx, rü Chebiná, rü Yadaú, rü Yoé, rü Benaía nixĩgü.

⁴⁴ Rü guxü̃ma ga yema Iraétanüxü̃ nixĩ ga to ga nachixü̃anecüã̱x ga ngexü̃gümaxã ixãxma̱xgüxü̃, natürü tümanatügüca̱x tüxü̃ nawoeguxẽxẽ tümaxacügümaxã.