Echequié 9 - Tupanaarü Ore

Tupana rü Echequiéxü̃ nanawe̱x nax ñuxãcü tá napoxcuãxü̃ ya Yerucharéü̃cüã̱xgü

¹ Rü yemawena nüxü̃ chaxĩnü ga wüxi ga naga ga tagaxü̃ ga cho̱xma̱xchixẽwa ñaxü̃: —Marü ínangugü i ngẽma tá naxca̱x íyaxüãchixü̃ ya yima ĩane nax nagu napogüexü̃ca̱x. Rü wüxichigü i ngẽma uanügüarü churaragü rü naxme̱xgu nayange ya naxne ya namaxã tá nadaiane ya yima ĩanearü duü̃xü̃gü —ñaxü̃.

² Rü ñu̱xũchi nüxü̃ chadau ga 6 ga yatügü ga guma ĩanegu chocuxü̃ nawa ga yema norü ĩã̱x ga dauxchitawaama üxü̃ ga nórtewa. Rü wüxichigü ga yema yatügü rü nayange ga wüxi ga naxne ga ma̱xeruxü̃. Rü yemaarü ngãxü̃tanügu nixũchigü ga wüxi ga yatü ga línuchimaxã ãxchiruxü̃. Rü norü goyexü̃wa nayangaxcuchiweü̃ ga norü ümatüruxü̃. Rü yema yatügü rü Tupanapataa̱xtügu nachocu, rü yema ãmarearü guruxü̃ ga bróũchenaxca̱xü̃tawa nayachaxãchitanü.

³ Rü Tupanaarü üüne rü nüxna nayachü̱xüxãchi ga yema taxre ga ixãxpe̱xatüxü̃ ga noxri norü ngãxü̃wa nayexmaxü̃, rü Tupanapata ga taxü̃nearü ĩã̱xwaama naxĩ. Rü nüma ga Cori ya Tupana rü naxca̱x naca ga yema yatü ga línuchimaxã ãxchiruxü̃ ga norü goyexü̃gu ümatüruxü̃ ingexü̃.

⁴ Rü ñanagürü nüxü̃: —¡Ẽcü, nagu ixũãgüchigü ya daa ĩane ya Yerucharéü̃ rü yaxüégacatü i guxü̃ma i ngẽma duü̃xü̃gü i ñaa ĩanearü chixexü̃gagu ngechaü̃güxü̃ rü ngúxü̃ ingegüxü̃! —ñanagürü.

⁵ Rü yemawena nüxü̃ chaxĩnü ga Cori ya Tupana nax yema togü ga yatügüxü̃ ñaxü̃: —¡Rü ngẽma yatüwe pixĩxü̃tanü nawa ya daa ĩane! Rü guxü̃ma i ngẽma duü̃xü̃gü i ngeégacatüxü̃ ¡rü penadai! ¡Rü tauxü̃táma nüxü̃ pengechaxü̃ rü bai tá i pexü̃́ nax nangechaü̃tümüxü̃güxü̃!

⁶ ¡Rü chopata ya taxü̃newa tá ipenaxügü nax penadaixü̃ rü guxü̃táma pedai rü yaxguã̱xgü, rü ngextü̱xüxü̃gü, rü paxü̃gü, rü buxü̃gü, rü ngexü̃gü! ¡Natürü taxũtáma nüxü̃ pedau i ngẽma ãégacatüxü̃! —ñanagürü. Rü yemaacü inanaxügüe nax nadaiaxü̃ ga yema ãẽ̱xgacügü ga yaxguã̱xgü ga Iraétanüxü̃maxã icua̱xgüxü̃.

⁷ Rü yemawena rü nüma ga Cori ya Tupana rü yema yatügüxü̃ namu rü ñanagürü nüxü̃: —¡Chopata ya taxü̃newa pexĩ rü penaxãũãchixẽxẽ! ¡Rü yuexü̃maxã penapaxẽxẽ i naa̱xtü! —ñanagürü. Rü nüma ga yema yatügü rü ínachoxü̃ rü inanaxügüe ga nax nadaiaxü̃ ga yema ĩanecüã̱x ga duü̃xü̃gü.

⁸ Rü yema ínaxügüyane rü chaxicatama íchayaxü. Rü yexguma ga choma rü ñaxtüanegu chanangücuchi rü poraãcü changechaü̃ãcüma aita chaxü rü ñachagürü: —Pa Corix, rü ñu̱xma nax yima ĩane ya Yerucharéü̃cüã̱xgümaxã nax cunuxü̃ ¿rü tá cunada̱i̱xü̃ i ngẽma noxretama i Iraétanüxü̃ i ngéma yaxügüxü̃? —ñachagürü.

⁹ Rü nüma ga Cori ya Tupana rü choxü̃ nangãxü̃ga rü ñanagürü: —Ngẽma Iraéanecüã̱xgüarü pecadu rü ngẽma Yudáanecüã̱xgüarü pecadu rü nataxüchi. Rü ngẽma nachixü̃ane rü máetagüxü̃maxã nanapá. Rü yima ĩane ya Yerucharéü̃wa rü norü duü̃xü̃gü rü chixeãcü nügümaxã inacua̱xgü. Rü nüma nagu naxĩnüegu rü marü nüxna chixũ i ngẽma nachixü̃ane, rü ngẽmaca̱x tama nüxü̃ chadau i ngẽma naxügüxü̃.

¹⁰ Natürü taxũtáma choxü̃́ nangechaü̃tümüxü̃ i ngẽma duü̃xü̃gü, rü nüxna tá chaca naxca̱x ga yema chixri nax namaxẽxü̃ —ñanagürü.

¹¹ Rü yexguma ga yema yatü ga línuchimaxã ãxchiruxü̃ ga norü goyexü̃wa ümatüruxü̃ ingacuchiweü̃xü̃ rü wenaxarü nataegu rü ñanagürü: —Marü chayanguxẽxẽ i ngẽma choxü̃ cumuxü̃ —ñanagürü.