Echequié 15 - Tupanaarü Ore

Cori ya Tupana rü wüxi i úbanegu nanangu i Iraétanüxü̃

^1-2 Nüma ga Cori ya Tupana rü chomaxã nidexa rü choxü̃ ñanagürü: —¿Ta̱xacüwa yixĩxü̃ i wüxi ya naixmena̱xã i úbanexü̃ namemaexü̃?

³ ¿Rü ngẽma úbane rü taxuwama name? Rü bai i wüxi i ngẽmaxü̃güarü chogüruü̃wa nixĩ nax namexü̃.

⁴ Rü üxüwaxicatama nixĩ i namexü̃. Rü ngẽxguma nape̱xegüwa nanguxgu nax yaxãxü̃, rü ngẽma norü ngãxü̃mena̱xã rü ã́xwe nixĩ, rü taxuwama name.

⁵ Rü ngẽxguma tama yaxaxgu rü taxuwama namexü̃, rü yexera i ñu̱xma nax yaxãxü̃ rü taxuwama name.

⁶ Rü ngẽmaca̱x i choma i Cori ya Tupana rü ñachagürü: “Rü ngẽma úbane i üxüxétüwa ita̱xcuchixü̃ nax yaya̱u̱xraxü̃ca̱x, rü ngẽxgumarüxü̃ tá ta nixĩ i ngẽma Yerucharéü̃cüã̱xgü nax üxüwa chayawocuxü̃.

⁷ Choma rü tá chaugü chixu nax Yerucharéü̃arü uanü chixĩxü̃. Rü norü duü̃xü̃gü rü wüxi ya üxücha̱xwa tá nibuxmü, natürü nai ya üxü tá ínanagu. Rü ngẽxguma chaugü chixuxgu nax perü uanü chixĩxü̃, rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ i Cori ya Tupana.

⁸ Rü chianexü̃ tá chayaxũxẽxẽ i ngẽma pechixü̃ane, nagagu nax tama choxü̃́ peyaxõgüxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma” —ñanagürü.