Wenaxarü naxümatü ga Tupanaarü mugü 33 - Tupanaarü Ore

Moiché rü wüxitücumüchigü i Iraétanüxü̃maxã mexü̃ naxuegu

¹ Rü naxü̃pa ga nax nayuxü̃ ga Moiché ga Tupanaarü duü̃ ixĩcü, rü Iraétanüxü̃maxã mexü̃ naxuegu, rü ñanagürü ga Moiché:

² —Cori ya Tupana rü ma̱xpǘne i Chinaíwa ne naxũ. Rü yexguma máxpü̱xanexü̃ i Cheíwa tachopetügu rü tüxü̃ nibáixmaxü̃. Rü yema norü nangóonexü̃ rü máxpüxanexü̃ i Paráü̃wa nanguema, rü ñu̱xmata Meribá-cadéwa nangu. Rü norü tügüneme̱xẽgu nayange i norü mugü i ya̱u̱xracüüxü̃. Rü 10,000 i dauxü̃cüã̱x i norü duü̃xü̃gümaxã ngéma ne naxũ.

³ Rü nüma ya Cori ya Tupana rü norü duü̃xü̃güxü̃ nangechaxü̃, rü nüxna nadau i ngẽma naga ĩnüexü̃. Rü nümagü rü nape̱xegu nacaxã́pü̱xügü rü ínanangu̱xuxẽẽgü i norü ucu̱xẽgü.

⁴ Rü choma i Moiché rü pexna chanaxã i Tupanaarü mugü nax perü meruxü̃ yixĩxü̃ca̱x, Pa Acóbutanüxü̃x.

⁵ Rü yexguma Iraétanüxü̃ norü ãẽ̱xgacügümaxã nangutaque̱xegügu rü Tupana nixĩ ga namaxã icuácü —ñanagürü ga Moiché.

⁶ Rü Moiché rü Rubéü̃tanüxü̃chiga nidexa rü ñanagürü: —¡Namaxẽ i Rubéü̃tanüxü̃! ¡Rü tagutáma inarüxo woo noxretama i yatügü nixĩgü! —ñanagürü.

⁷ Rü Yudátanüxü̃chiga nidexa rü ñanagürü: —¡Pa Cori ya Tupanax, nüxü̃ naxĩnü i Yudátanüxü̃arü yumüxẽ i ngẽxguma curü ngü̃xẽxẽgüca̱x ínacagügu! ¡Rü nüxü̃́ natauxchaxẽxẽ nax wüxiwa naxĩxü̃ rü ngẽmaãcü namücügü i Iraétanüxü̃xü̃ nangü̃xẽẽgüxü̃ca̱x! ¡Rü curü poramaxã ínapoxü̃ i norü uanügüme̱xẽwa! —ñanagürü.

⁸ Rü Lebítanüxü̃chiga nidexa rü ñanagürü: —Pa Cori Pa Tupanax, cuma rü Lebítanüxü̃xü̃ cungechaxü̃ rü naxme̱xwa cunangẽxmagüxẽxẽ ga gumá nutagü ga ixüünecü ga Tumíü̃ rü Uríü̃ ga nawa nüxü̃ nacua̱xgücü i curü ngúchaü̃. Rü cuma rü Macháwa nüxü̃ cuxü i ngẽma Lebítanüxü̃, rü Meribáarü dexáwa namaxã cuporaga.

⁹ Rü ngẽma Lebítanüxü̃ rü nanatüxü̃ rü naéxü̃ nangechaxü̃güarü yexera cuga naxĩnüe rü nayanguxẽxẽ i curü uneta. Rü naenexẽgüxü̃ rü naxacügüxü̃ nangechaxü̃güarü yexera cuga naxĩnüe rü nayanguxẽxẽ i curü uneta.

¹⁰ Rü nümagü ga Lebítanüxü̃ nixĩ ga mea Iraétanüxü̃xü̃ ga Acóbutanüxü̃xü̃ nangúexẽẽxü̃ i curü mugü rü ucu̱xẽgü. Rü nümagü nixĩ i cupe̱xewa curü ãmarearü guruü̃wa yagugüãxü̃ i naxü̃nagü i duü̃xü̃gü cuxna ãmaregüxü̃ rü ñu̱xũchi yagugüãxü̃ i pumarate̱xegü.

¹¹ Rü cuxna chaca, Pa Cori Pa Tupanax nax taãẽxãcü cunayaxuxü̃ i ngẽma puracü i cuxca̱x naxügüxü̃ i ngẽma Lebítanüxü̃. ¡Rü yanaxoxẽxẽ i norü uanügü nax ngẽmaãcü tama wena naxca̱x íyaxü̃ãchixü̃ca̱x i ngẽma naxchi aiexü̃! —ñanagürü.

¹² Rü nüma ga Moiché rü Bẽyamíü̃tanüxü̃chiga nidexa rü ñanagürü: —Cori ya Tupana pexü̃ nangechaxü̃ rü ngẽmaca̱x taãẽãcüma pemaxẽ. Rü nüma rü guxü̃guma pexna nadau rü guxü̃gutáma naxme̱xtüü̃wa pengẽxmagü —ñanagürü.

¹³ Rü Moiché rü Yúchetanüxü̃chiga nidexa rü ñanagürü: —Cori ya Tupana tá pexü̃ narüngü̃xẽxẽ, rü ngẽma perü naanegu tá nananguxẽxẽ i cherena i daxũguxü̃ i naanewa ne ũxü̃. Rü ñu̱xũchi tá pexna nanaxã i ngẽma dexá i waixü̃mütüü̃wa ngẽxmaxü̃.

¹⁴ Rü ngẽmaãcü wüxichigü ya taunecügu rü tá namu i penetüarü o i pebuxuxü̃ rü wüxichigü ya tauemacügu rü tá namu i ngẽma rümemaexü̃ i penetüarü o.

¹⁵ Rü ngẽma nũxcüma yexmaxü̃ i máxpü̱xanexü̃wa rü Tupana tá pexna nanaxã i ngẽma rümemaexü̃ i penetügüarü o.

¹⁶ Rü nüma ya Cori ya Tupana ya chuchuxü̃ ga iya̱u̱xraxétaxü̃étüwa ngócü pexü̃ nangechaxü̃ rü tá pexna nanaxã i ngẽma ñoma i naanewa rümemaexü̃ i nanetüarü o. Rü Yúche ga naenexẽtanüwa Tupana nüxü̃ unetacü, rü yimátanüxü̃ca̱x tá ínangu i guxü̃ma i ngẽma mexü̃gü.

¹⁷ Rü ngẽma Yúchetanüxü̃ rü tá namexẽchi ñoma woca i yatüxü̃xacü i nüxíra buxü̃rüxü̃. Rü tá naporaxüchi ñoma wüxi i búfalorüxü̃. Rü guxü̃ma i duü̃xü̃gütücumügü i ñoma i naanewa ngẽxmagüxü̃maxã tá napora. Rü ngẽmaãcü tá nixĩ i ngẽma muxũchixü̃ i Efraíü̃tanüxü̃ rü ngẽma muxü̃ i Manachétanüxü̃ —ñanagürü.

¹⁸ Rü Moiché rü Chaburóü̃tanüxü̃chiga rü Ichacátanüxü̃chiga nidexa rü ñanagürü: —Pemax, Pa Chaburóü̃tanüxü̃x, rü tá petaãẽgü i ngẽxguma perü puracüwa pexĩxgu. Rü pemax, Pa Ichacátanüxü̃x, rü tá petaãẽgü i ngẽxguma pepatagü i naxchirunaxca̱xwa pengẽxmagügu.

¹⁹ Rü pema rü tá naxca̱x pengẽma i ngẽma togü i duü̃xü̃gütücumügü nax perü máxpü̱xanexü̃wa Cori ya Tupanaca̱x nadaiaxü̃ rü yagugüãxü̃ i norü ãmaregü ya Tupana naxwa̱xexü̃. Rü pexme̱xwa tá nangẽxmagü i ngẽma ngẽmaxü̃gü i márwa ngẽxmagüxü̃ rü ñu̱xũchi ngẽma mexü̃gü i to i nachixü̃anegüarü türegüwa naxca̱x petaxexü̃ —ñanagürü.

²⁰ Rü Moiché rü Gáxtanüxü̃chiga nidexa rü ñanagürü: —Namexẽchi ya Cori ya Tupana ya taxü̃ i naane pexna ãcü. Rü ngẽma naanewa rü pema i Gáxtanüxü̃ rü ñoma leóü̃ i iyauxexü̃ i naeru íwaexü̃ rü nachacüügü íwaexü̃rüxü̃ pixĩgü.

²¹ Rü pema i Gáxtanüxü̃ rü penayaxu i ngẽma naane i rümemaexü̃ ñoma duü̃xü̃güarü ãẽ̱xgacüna ixãxü̃rüxü̃. Rü yexguma nangutaque̱xegügu ga Iraétanüxü̃arü ãẽ̱xgacügü rü pema rü Tupanaga pexĩnüe rü peyangu̱xẽxẽ ga norü mugü rü ucu̱xẽgü ga norü duü̃xü̃güna naxãxü̃ —ñanagürü.

²² Rü nüma ga Moiché rü Dáü̃tanüxü̃chiga nidexa rü ñanagürü: —Dáü̃tanüxü̃ rü ñoma wüxi i leóü̃xacü i Bacháü̃anewa ne yuxuxü̃rüxü̃ nixĩgü —ñanagürü.

²³ Rü Netarítanüxü̃chiga nidexa rü ñanagürü: —Rü pemax, Pa Netarítanüxü̃x, rü Cori ya Tupana poraãcü pexü̃ narüngü̃xẽxẽ rü pemaxã nataãxẽ. Rü nüma rü pexna nanaxã i ngẽma naane ya nataxa ya Gariréawa ixügüxü̃ ñu̱xmata yimaarü súrgu yacuá —ñanagürü.

²⁴ Rü Moiché rü Achétanüxü̃chiga nidexa rü ñanagürü: —Pa Achétanüxü̃x, Cori ya Tupana rü guxü̃ma i Iraétanüxü̃arü yexera tá pexü̃ rüngü̃xẽxẽ, rü guxü̃ma i nümagü rü tá pexü̃ nangechaü̃gü. Rü tagutáma pexü̃́ nataxu i perü oribuarü chíxü̃.

²⁵ Rü perü ĩanegüarü poxeguxü̃arü chotaruxü̃gü rü fierunaxca̱x rü bróũchenaxca̱x tá nixĩgü. Rü ngẽma perü pora i pexü̃́ ngẽxmaxü̃ rü tá natai i guxü̃ma i ngẽma ngunexü̃gü i nagu pemaxẽxü̃gu —ñanagürü.

²⁶ Rü yema namaxã yagúexẽẽãxü̃ ga norü dexa ga Moiché rü ñanagürü: —Pa Iraétanüxü̃x, rü nataxuma i to i perü Tupanamaxã wüxiguxü̃. Rü nüma rü norü poramaxã dauxü̃guxü̃ i caixanexü̃gu nixũ nax perü ngü̃xẽẽwa naxũxü̃ca̱x.

²⁷ Rü yimá Cori ya Tupana ya guxü̃guma ngẽxmacü, rü nüma nixĩ i perü poxü̃ruxü̃ yixĩxü̃. Rü ngẽma norü pora i guxü̃guma nüxü̃́ ngẽxmaxü̃ rü perü ngü̃xẽẽruxü̃ nixĩ. Rü nüma nixĩ i pexna yabuxmüxẽẽãxü̃ i perü uanügü, rü nüma nixĩ i pexü̃ namuxü̃ nax penada̱i̱xü̃ca̱x.

²⁸ Rü pemax, Pa Iraétanüxü̃x, rü taxuxü̃táma pexü̃ nachixewe i perü naanewa. Rü petaagü rü taãẽãcüma tá nawa namaxẽ. Rü perü naanewa rü tá pexü̃́ nangẽxma i perü triguchitaü̃gü rü úbachitaxü̃gü. Rü tagutáma pexü̃́ nataxu ya pucü ya dauxü̃wa ne ũcü.

²⁹ ¡Pa Iraétanüxü̃x, petaãxẽgü! Pema rü taxúema pemaxã tawüxigu erü nümatama ya Cori ya Tupana nixĩ i pexü̃ ínapoxü̃xü̃, rü pexü̃ nangü̃xẽẽxü̃. Rü nüma nixĩ i perü tara i namaxã perü uanügüxü̃ pedaixü̃. Rü perü uanügü rü pepe̱xegu tá nacaxã́pü̱xügü. Rü pema rü tá penaxãnexẽxẽ rü penapu̱xcuchigüama —ñanagürü ga Moiché.